சென்னை: ஏர்டெல் நிறுவனத்தின் சிம் கார்டுகளை பயன்படுத்தி சட்டவிரோதமாக இணையதளம் மூலம் சர்வதேச தொலைத் தொடர்பு கட்டமைப்பை உருவாக்கிய இருவரை போலீசார் கைது செய்து விசாரணை நடத்தி வருகின்றனர். மயிலாப்பூரில் உள்ள ஏர்டெல் அலுவலகத்தின் நோடல் அலுவலர் ஜெயகுமார் என்பவர் பல்லாவரம் காவல் நிலையத்தில் புகார் அளித்தார்.
அதில் கடந்த சில நாட்களாக பல்லாவரம் பகுதியில் சட்ட விரோதமாக ஏர்டெல் நிறுவனத்தின் தொலை தொடர்பை எவரோ பயன்படுத்தி வருவாய் இழப்பு ஏற்படுத்தி வருவதாக அந்த புகாரில் தெரிவித்து இருந்தார்.
அந்த புகாரின் பேரில் அவர் கொடுத்த விவரங்களை வைத்து போலீசார் தீவிர விசாரணை நடத்தினர். அப்போது பல்லாவரம் ஒலிம்பியா கிராண்ட் அடுக்குமாடி குடியிருப்பில் வசிக்கும் ஒருவர் தொழில் நுட்பத்தை சட்டவிரோதமாக பயன்படுத்தி வெளிநாட்டு அழைப்புகளை உள்ளூர் அழைப்புகளாக மாற்றி சட்டவிரோத செயலில் ஈடுபட்டு வந்தது கண்டுபிடிக்கப்பட்டது.
அதே போல் பெரும்பாக்கம் பொலினேனி அடுக்குமாடி குடியிருப்பு, தாழம்பூர் டிஎல்எப் கிராண்ட் சிட்டி ஆகிய பகுதிகளில் தங்கி தொழில் நுட்ப சாதனைங்களை பயன்படுத்தி போலியாக சிம்கார்டு ஆக்டிவேட் செய்து சட்டவிரோதமாக பயன்படுத்தி ஏர்டெல் நிறுவனத்திற்கு வருவாய் இழப்பை ஏற்படுத்தியதும் அந்த விசாரணையின் போது தெரிய வந்துள்ளது.
இதனையடுத்து பல்லாவரத்தில் தங்கி இருந்த கேரளாவை சேர்ந்த பாஹத் முகமது (25) மற்றும் சித்தாலபாக்கத்தில் தங்கியிருந்த சாஹல் (25) ஆகிய இருவரையும் கைது செய்து அவர்கள் வைத்து இருந்த மோடம், ரவுட்டர் மற்றும் ஆயிரத்து 200 க்கும் மேற்பட்ட சிம் கார்டுகள் ஆகியவற்றை போலீசார் பறிமுதல் செய்தனர்.
விசாரணையில் கடந்த 5 மாதங்களாக இன்ஸ்டாகிராம் மூலம் அறிமுகமான முகம் தெரியாத நபர் மூலம் இதனை கற்றுக் கொண்டு, வெளிநாட்டு அழைப்புகளை உள்ளூர் அழைப்புகளாக இருவரும் மாற்றி வந்தது தெரிய வந்தது. மாதம் 15 ஆயிரம் ரூபாய் சம்பளம், மற்ற வசதிகள் செய்து தருவதாக கூறியதன் பேரில் அவர்கள் இந்த சட்ட விரோத செயலில் ஈடுபட்டு வந்தது தெரிய வந்துள்ளது. இது போன்ற தொழில் நுட்பத்தை தவறாக பயன்படுத்திய குற்றத்திற்காக அவர்கள் இருவர் மீதும் கூட்டுச்சதி, ஐடி பிரிவு உள்ளிட்ட நான்கு பிரிவுகளின் கீழ் வழக்குப்பதிவு செய்த போலீசார் நீதிமன்றத்தில் ஆஜர்படுத்தி சிறையில் அடைத்தனர்.
அதேபோல் இந்த சர்வதேச அழைப்புகளை உள்ளூர் அழைப்புகளாக மாற்றியதில் ஏதேனும் மர்மம் உள்ளதா, சட்ட விரோத நடவடிக்கைகள் மேற்கொள்ளப்பட்டதா என்றும் போலீசார் தொடர்ந்து விசாரணை நடத்தி வருகின்றனர்.
இதையும் படிங்க: "க்யூ ஆர் கோடு மூலம் நொடியில் டிக்கெட்" - ரயில் பயணிகள் வரவேற்பு!
