சென்னை : வேளச்சேரியில் கடந்த 17ஆம் தேதியன்று நடந்து சென்ற பெண்ணிடம் 7 சவரன் தங்க செயினை இருசக்கர வாகனத்தில் வந்த இரு நபர்கள் பறித்துச்சென்றதாக வேளச்சேரி காவல் நிலையத்தில் பாதிக்கப்பட்டவர் புகார் அளித்தார். அதேபோன்று இரண்டு இடங்களில் செயின் பறிப்பு முயற்சி சம்பவங்களும் நடந்தன. இதுதொடர்பாக வேளச்சேரி காவல் துறையினர் வழக்குப்பதிவு செய்து அங்குள்ள சிசிடிவி காட்சிகளை ஆய்வு செய்து விசாரணை நடத்தி வந்தனர்.
இதனையடுத்து கடந்த 18ஆம் தேதி, அதேபோல பம்மல் பகுதியில் 6 சவரன்செயின் பறிக்கப்பட்டது. இதன்தொடர்ச்சியாக 17,18,19ஆம் தேதிகளில் பல இடங்களில் செயின் பறிப்பு சம்பவங்கள் நடைபெற்று, சுமார் 30-க்கும் மேற்பட்ட தங்க செயின்கள் பறிக்கப்பட்டதாக காவல் நிலையங்களில் புகார்கள் குவிந்தன.
இதனால் உடனடியாக கிண்டி தனிப்படை போலீசார் செயின் பறிப்பு சம்பவங்கள் நடந்த பகுதியிலிருந்த சிசிடிவி காட்சிகளை ஆய்வு செய்தபோது, ஒரே நபர் அனைத்து இடங்களிலும் செயின் பறிப்பில் ஈடுபட்டது காவல் துறையினருக்குத் தெரியவந்தது. ஆனால், சிசிடிவி காட்சிகளில் செயின் பறிப்பு கொள்ளையர்களின் நம்பர் பிளேட் பதிவாகாததால் காவல் துறையினருக்கு கொள்ளையர்களை நெருங்குவதில் சிரமம் ஏற்பட்டது.
இதனையடுத்து செயின் பறிப்பு கொள்ளையர் சென்ற வேளச்சேரி காமாட்சி மருத்துவமனை அருகே உள்ள சிசிடிவி காட்சிகளை ஆய்வு செய்ய தனிப்படை காவலர்கள் சென்றுள்ளனர். சிசிடிவி காட்சிகளை ஆய்வு செய்த பின்பு இருசக்கர வாகனத்தில் தனிப்படை காவல்துறையினர் புறப்படும்போது, சிசிடிவி காட்சிகளில் பதிவான அதே இருசக்கர வாகனம் அவ்வழியாகச் சென்றதைக்கண்டு அதிர்ந்துள்ளனர். உடனடியாக காவலர்கள் அந்த இருசக்கர வாகனத்தை துரத்தும் போது, காவல்துறை வருவதை அறிந்த அந்த நபர்கள் அதிவேகமாக இருசக்கர வாகனத்தில் சென்றுள்ளனர்.
இருந்தும் காவலர்கள் விடாமல் சினிமா பட பாணியில் சுமார் 4 கி.மீ., துரத்திச்சென்று இரு நபர்களையும் மடக்கிப் பிடித்து விசாரணை நடத்தினர். விசாரணையில் தொடர் செயின் பறிப்பில் ஈடுபட்ட கொள்ளையர்கள் என்பது தெரியவந்தது. இதனையடுத்து இருவரையும் கைது செய்து காவல் நிலையத்திற்கு அழைத்துச்சென்று விசாரணை நடத்தும்போது திடுக்கிடும் தகவல் வெளியானது.
சென்னை சைதாப்பேட்டை பகுதியைச்சேர்ந்த அக்கீம்(24), மற்றும் கண்ணகி நகரைச் சேர்ந்த ஜான் பாஷா என்பதும், இவர்கள் இருவரும் சகோதரர்கள் என்பதும் தெரியவந்தது. இவர்கள் அளித்த தகவலின் பேரில் செயில் பறிப்பில் ஈடுபட செல்லும்போது இருசக்கர வாகனத்தை ஓட்ட பயன்படுத்தும் மற்றொரு நபரான நீலாங்கரையைச்சேர்ந்த சந்தோஷ் குமார்(22) என்பவரையும் காவலர்கள் கைது செய்தனர்.
கடந்த 17,18,19ஆம் தேதிகளில் வேளச்சேரி, பம்மல், பல்லாவரம், மடிப்பாக்கம் உட்பட பல இடங்களில் 30 சவரன் நகைகளை அவர்கள் பறித்துள்ளதாக காவல் துறையினர்களின் விசாரணையில் தெரியவந்தது. இதேபோல வேளச்சேரி காமாட்சி மருத்துவமனை அருகே செயின் பறிப்பில் ஈடுபட சென்றபோது போலீசாரிடம் சிக்கியதாக வாக்குமூலம் அளித்துள்ளனர். மேலும் பறிக்கப்பட்ட நகைகளை குறைந்த விலையில் விற்பனை செய்து விலையுயர்ந்த கஞ்சா உள்ளிட்ட போதைப்பொருட்களை பயன்படுத்தி சொகுசு வாழ்க்கை வாழ்ந்து வந்ததும் தெரியவந்தது.
இவர்கள் மீது மடிப்பாக்கம், பம்மல், பல்லாவரம், உளுந்தூர்பேட்டை உட்பட சென்னை முழுவதும் பல காவல் நிலையங்களில் 25 வழக்குகள் நிலுவையில் உள்ளன என்பது குறிப்பிடத்தக்கது.
இருமுறை மட்டுமே காவல்துறையிடம் சிக்கியிருப்பதாகத் தெரிவித்துள்ளனர். மேலும் வண்டியின் பின் அடையாளங்களை வைத்து துப்பு துலக்கிய சுவாரஸ்ய சம்பவமும் அரங்கேறி இருப்பதாக காவல் துறையினர் தெரிவித்தனர்.
கைது செய்யப்பட்ட இவர்களிடமிருந்து பறிப்பில் ஈடுபட பயன்படுத்திய இருசக்கரவாகனம் மற்றும் 15 சவரன் நகைகளை பறிமுதல் செய்து நீதிமன்றத்தில் ஆஜர்படுத்தி சிறையில் அடைத்தனர்.
இதையும் படிங்க: பிகார்: மகளை பெற்றோரே பாலியல் தொழிலில் ஈடுபடுத்திய கொடூரம்!
