சென்னை கிண்டியில் உள்ள ராஜ்பவன் வளாகத்தில் நடந்த காசி தமிழ் சங்கமம் நிகழ்ச்சிக்கு தமிழ்நாட்டில் இருந்து சென்று திரும்ப ஏற்பாடுகளை செய்த அமைப்பாளர்கள் மற்றும் தன்னார்வலர்களை கௌரவிக்கும் நிகழ்ச்சியில் ஆளுநர் ஆர்.என்.ரவி கலந்து கொண்டு காசி தமிழ் சங்கமம் நிகழ்ச்சி ஏற்பாட்டாளர்கள் மற்றும் தன்னார்வலர்களைப் பாராட்டினார்.
பின்பு பேசிய ஆளுநர் ஆர்.என்.ரவி, "காசி தமிழ் சங்கம் வெற்றி பெற காரணமாக இருந்த எல்லோருக்கும் நன்றிகள். குறுகிய காலத்துக்குள் காசி தமிழ் சங்கமம் நிகழ்ச்சி சிறப்பாக நடைபெறுவதற்கு ஏற்பாடு செய்ததற்கு எனது நன்றியை தெரிவித்துக் கொள்கிறேன். பிரதமர் மோடியின் எண்ணத்தில் தோன்றியது தான் இந்த காசி தமிழ் சங்கமம் நிகழ்வு. மிகக் குறுகிய காலத்தில் இந்த நிகழ்ச்சி நடத்தி முடிக்கப்பட்டுள்ளது. இதில், ஒவ்வொருவரின் உழைப்பும் முக்கியத்துவம் வாய்ந்தது. காசி தமிழ் சங்கமம் தொடக்கம் தான். அங்கு சென்று வந்தவர்கள் தங்கள் நண்பர்கள், உறவினர்களிடம் அனுபவங்களைக் கூற வேண்டும். இதனை மக்கள் இயக்கமாக கொண்டு செல்ல வேண்டும்.
திட்டங்களை அதிகாரிகள், அலுவலர்கள் மட்டும் சிறப்பாக செய்துவிட முடியாது. அது மக்கள் இயக்கமாக மாறினால் தான், அது சிறப்பாக மக்களை சென்றடையும் என்று பிரதமர் மோடி கூறுவார். தூய்மை இந்தியா திட்டம், கழிப்பறை கட்டும் திட்டம், கரோனா எதிர்ப்பு இப்படி எல்லாமே மக்கள் இயக்கமாக மாறியதே வெற்றிக்கு காரணம்.
தமிழ்நாட்டில் வித்தியாசமான ஒரு அரசியல் சூழல் உள்ளது. எல்லாவற்றிற்கும் நாங்கள் திராவிடர்கள் என்று சொல்கிறார்கள், இந்தியா முழுவதும் ஒரு செயல் திட்டம் இருந்தால் தமிழ்நாடு அதை வேண்டாம் என்று சொல்கிறது. தமிழ்நாடு என்பதைவிட தமிழகம் என்று சொல்வதே சரியாக இருக்கும். பொய் பரப்புரையை நாம் முறியடிக்க வேண்டும். எது உண்மை என்று மக்களுக்கு சொல்ல வேண்டும்.
பிரதமர் நரேந்திர மோடியின் நோக்கம் வேறு, அவரது நோக்கம் நாட்டில் உள்ள அனைவரும் ஓர் குடும்பம், அனைவரும் குடும்பம் உறுப்பினர்கள் என்பதாகும். ஆங்கிலேயர் காலத்தில் தான் இந்தியாவில் மாநிலங்கள் உருவாக்கப்பட்டது. ஆகவே, பாரதத்தின் பகுதியே தமிழகம். தமிழகம் பாரதத்தின் அடையாளம். காசி தமிழ் சங்கமம் என்பது தொடக்கம் தான். இதன் பயணம் தொடரும். அடுத்த 25 ஆண்டுகளுக்கு நாம் தான் தலைமையாக இருக்கப் போகிறோம். இந்தியா தான் அனைத்து நாடுகளுக்கும் தலைமையாக இருக்க போகிறது" என்று பேசி இருந்தார்.
தமிழ்நாடு - தமிழன் - தமிழ் என்றால் ஆளுநருக்கு கசக்கிறது: தமிழ்நாடு பெயர் குறித்து ஆளுநர் ரவி பேசியது தற்போது பெரும் சர்சையாக வெடித்துள்ளது. ஆளுநர் ரவியின் இந்த பேச்சுக்கு, திமுக நாடாளுமன்ற உறுப்பினர்களின் தலைவர் டி.ஆர். பாலு கடுமையான கண்டணங்களைத் தெரிவித்து அறிக்கை வெளியிட்டுள்ளார். ”அனைவரும் 'இந்தியர்' என்று மேடைதோறும் பேசி வரும் ஆளுநரால், அந்த ஒற்றுமை உணர்வுக்கு விரோதமான மதவாத அரசியலை கண்டிக்க முடியுமா? தமிழ்நாடு - தமிழன் - தமிழ் என்பவை ஆளுநர் ரவிக்கு கசப்பானவையாக இருக்கின்றன. ஏற்கனவே தமிழ்நாட்டில் பா.ஜ.க.விற்கு ஒரு மாநிலத் தலைவர் இருப்பதால், ரவி அவர்கள் அரசியல் சட்டப்படி பணியாற்றுவதே அவருக்கு சிறந்தது” என்று என காட்டமாக கூறியுள்ளார்.
மேலும் படிக்க: தமிழகம் வளர்கிறது என ஆளுநர் ரவிக்கு ஆத்திரம் - டி.ஆர்.பாலு விமர்சனம்
சங்கரலிங்கனார் தியாகம் தெரியுமா..?: ஆங்கிலேயர் காலத்தில் ஆந்திரா, கேரளா, கர்நாடகா, ஒடிசாவின் பகுதிகளை உள்ளடக்கியதாக சென்னை மாகாணம் இருந்தது. அது மொழிவாரி மாநிலமாக பிரிக்கப்பட்டபோது மெட்ராஸ் மாகாணம் அல்லது சென்னை மாகாணம் என்ற பெயரை மாற்றிவிட்டு, தமிழ்நாடு என்று பெயர்சூட்ட வலியுறுத்தி விருதுநகர் மாவட்டத்தைச் சேர்ந்த சங்கரலிங்கனார் 1956-ல் உண்ணாவிரதப் போராட்டத்தை தொடங்கினார்.
எத்தனையோ தலைவர்கள் கேட்டுக்கொண்டும் 76 நாட்கள் தன் உண்ணாவிரதப் போராட்டத்தைக் கைவிடாமல் தமிழ்நாடு என்று பெயர் சூட்டுவதற்காக தன் இன்னுயிரை தியாகம் செய்தவர், சங்கரலிங்கனார். அவரது தியாகத்தால் தமிழ்நாடு என்று பெயர் சூட்ட வேண்டும் என்கிற கோரிக்கை மக்கள் கோரிக்கையாக மாறியது.
பல ஆண்டுகால நெடும் போராட்டத்திற்குப் பின் 1968-ம் ஆண்டு ஜூலை 18-ம் தேதி தமிழ்நாடு பெயர் மாற்ற சட்டத்தை சட்டசபையில் ஒருமனதாக நிறைவேற்றினார், அன்றைய முதலமைச்சர் பேரறிஞர் அண்ணா. இவ்வாறு நீண்ட நெங்காலமாக பல்வேறு தலைவர்களின் தியாகத்தால் கிடைத்த உரிமையை ஏளனம் செய்வது போல் ஆளுநர் பேசியுள்ளார். தமிழ்நாடு என்று பெயர் சூட்டப்பட்ட பின் ஒருவர் கூட அதை தமிழகம் என்று தான் அழைக்க வேண்டும் என்று கூறியதில்லை என்று தமிழார்வலர்கள் கொதிக்கின்றனர்.
இதையும் படிங்க: இரட்டை பதவி விவகாரத்தில் ஆளுநரை தகுதி நீக்கம் செய்யக்கோரிய வழக்கு தள்ளுபடி
