சென்னை: 10,11,12 ஆம் வகுப்பு பொதுத்தேர்வினை எழுதுவதற்கு தனித்தேர்வர்கள் டிசம்பர் 27ஆம் தேதி முதல் 2024 ஜனவரி 10 ஆம் தேதி வரை விண்ணப்பிக்கலாம் என அரசுத் தேர்வுத்துறை அறிவித்துள்ளது. இது குறித்து அரசுத் தேர்வுத்துறை இயக்குனர் சேதுராமவர்மா வெளியிட்டுள்ள செய்திக்குறிப்பில், 10, 11மற்றும்12 ஆம் வகுப்பிற்கான பொதுத்தேர்வு 2024 மார்ச், ஏப்ரல் மாதம் நடைபெறுகிறது.
பொதுத்தேர்வுகளுக்கு விண்ணப்பிக்க விரும்பும் தகுதியான தனித்தேர்வர்களிடமிருந்து, இணையதளம் மூலம் விண்ணப்பங்கள் வரவேற்கப்படுகின்றன. ஏற்கனவே, நேரடித் தனித்தேர்வராக 11ஆம் வகுப்பு பொதுத்தேர்வெழுதி தேர்ச்சி பெற்ற, தேர்ச்சி பெறாத, வருகை புரியாத தேர்வர்கள் அனைவரும், தற்போது 12ஆம் வகுப்பு பொதுத்தேர்வெழுதுவதற்கும், 11ஆம் வகுப்பு பொதுத்தேர்வில் தேர்ச்சி பெறாத பாடங்களை மீண்டும் எழுதுவதற்கும் சேர்த்து விண்ணப்பிக்கலாம்.
10,11 மற்றும் 12ஆம் வகுப்பு பொதுத்தேர்வுகளுக்கு விண்ணப்பிக்க விரும்பும் தனித்தேர்வர்கள் டிசம்பர் 27ஆம் தேதி முதல் ஜனவரி 10ஆம் தேதி வரை காலை 11 மணி முதல் மாலை 5 மணி வரை கல்வி மாவட்ட வாரியாக அமைக்கப்பட்டுள்ள அரசுத்தேர்வுகள் இயக்கக சேவை மையங்களுக்கு (Service centre) நேரில் சென்று கட்டணத்தை செலுத்தி இணையதளம் மூலம் தங்களது விண்ணப்பத்தினை பதிவு செய்து கொள்ளலாம்.
தத்கல்(சிறப்பு அனுமதி) முறையில் 2024 ஜனவரி 11 மற்றும் 12 ஆகிய தேதிகளில் தேர்வுக்கட்டணத்துடன் 11 மற்றும் 12ஆம் வகுப்பிற்கு கூடுதலாக ரூ.1000, 10ஆம் வகுப்பிற்கு கூடுதலாக ரூ.500 சிறப்புக் கட்டணமாக செலுத்தி ஆன்லைனில் தத்கல் முறையில் விண்ணப்பித்துக் கொள்ளலாம்.
அரசுத்தேர்வுகள் இயக்கக தனித் தேர்வர்களுக்கான அறிவுரைகள் மாவட்ட வாரியாக அமைக்கப்பட்டுள்ள அரசுத் தேர்வுகள் இயக்கக சேவை மையங்களின் விபரங்கள், (Government Examinations Service centres) மற்றும் ஆன்லைனில் விண்ணப்பங்களை பதிவு செய்தல் குறித்த தனித்தேர்வர்களுக்கான தகுதி ஆகியவற்றை www.dge.tn.gov.in இணையதளத்தில் விண்ணப்பதாரர்கள் அறிந்து கொள்ளலாம்.
மேலும், அனைத்து முதன்மைக் கல்வி அலுவலகங்கள், சம்பந்தப்பட்ட அனைத்து மாவட்டக் கல்வி அலுவலகங்கள் மற்றும் அனைத்து அரசுத்தேர்வுகள் உதவி இயக்குநர் அலுவலகங்களிலும் அறிந்து கொள்ளலாம்.
தொழிற் பயிற்சி(ITI) பயின்ற மாணவர்கள்: 8 ஆம் வகுப்பு தேர்ச்சி பெற்று தொழிற்கல்வி பயின்ற மாணவர்கள், 10 ஆம் வகுப்பு தமிழ் மற்றும் ஆங்கில பாடத் தேர்வுகளுக்கும், 10 ஆம் வகுப்பு தேர்ச்சி பெற்று தொழிற்கல்வி பயின்ற மாணவர்கள் 11 மற்றும் 12 ஆம் வகுப்பிற்கான தமிழ் மற்றும் ஆங்கிலப் பாடத்தேர்வுகளுக்கும், அரசுத் தேர்வுகள் இயக்கக சேவை மையங்களின் மூலம் மேற்குறிப்பிட்ட நாட்களில் விண்ணப்பிக்கலாம்.
மேலும், தேர்வுக்கால அட்டவணை www.dge.tn.gov.in என்ற இணையதளத்தில் அறிந்து கொள்ளலாம் என அதில் கூறப்பட்டுள்ளது.
இதையும் படிங்க: தூத்துக்குடி வெள்ளத்தில் மூழ்கிய வீடு.. வேதனையிலும் இன்று புரோ கபடியில் களமிறங்கும் தமிழக வீரர் மாசானமுத்து!
