சென்னையில் கடந்த 2015ஆம் ஆண்டில் ஏற்பட்ட பெரு வெள்ளத்தால் ஆற்றின் கரையோரங்களில் வசித்த பொதுமக்கள் அங்கிருந்து வெளியேறப்பட்டு நகரின் பல்வேறு பகுதிகளில் குடியமர்த்தப்பட்டனர்.
ஆனாலும் அவர்கள் மேற்படி பகுதிகளில் வசிக்க முடியாத காரணத்தால் மீண்டும் தங்களை நகரின் மையப்பகுதியில் குடியமர்த்த அரசு நடவடிக்கைகள் எடுக்க வேண்டும் என கோரிக்கை வைத்திருந்தனர்.
அதன்படி, அடையாறு ஆறு தூர்வாரப்பட்டு வெள்ளத் தடுப்புச் சுவர் அமைக்கும் பணி, கரையோரப் பகுதிகளில் உள்ள மக்களை மறுகுடியமர்வு செய்யும் பணியும் நடந்து வருகிறது.
இவர்களின் வாழ்வாதாரம் நகரின் மையப் பகுதியில் இருப்பதால் நகருக்குள்ளே வீடுகளை ஒதுக்கி மறுகுடியமர்வு செய்ய வேண்டும் என்ற அவர்களின் கோரிக்கையை ஏற்று அரசுத் தரப்பில் அவர்களை மறுகுடியமர்வு செய்வதற்கு மாநகராட்சி நிர்வாகம் ஏற்பாடுகள் செய்து வருகிறது.
இதன் ஒருபகுதியாக திருநீர்மலை முதல் முகத்துவாரம் வரை 25 கிமீ அடையாறு ஆற்றை தூர் வாரும் பணிகள் முடியும் நிலையில் உள்ளது.
சுமார் 11,400 ஆக்கிரமிப்புகளை அகற்றுதல், ஆற்றினை அகலப்படுத்துதல், ஆற்றின் இரு கரைகளிலும் வெள்ளத் தடுப்புகளை அமைத்தல், பாதிப்புக்குள்ளான பகுதிகளில் 1,800 மீட்டர் நீளத்திற்கு கான்க்ரீட் வெள்ளத் தடுப்பு சுவர் அமைத்தல், எட்டு இடங்களில் வெள்ளத்தடுப்பு உள்வாங்கிகள் அமைத்தல் உள்ளிட்ட பணிகள் நடந்து வருகிறது.
இதனைத்தொடர்ந்து, சென்னை மாநகரின் நதிகள் சீரமைப்பு திட்டத்தின் அடிப்படையில், சென்னை கோட்டூர்புரத்தில் ஏழு கோடி ரூபாயில் பூங்கா ஒன்று அமைக்க சென்னை மாநகராட்சி முடிவு செய்துள்ளது.
மேலும் சுமார், 23,340 கன மீட்டர் பரப்பளவில் அமைக்கப்படவுள்ள இந்தப் பூங்காவில் நடைபாதை, சைக்கிள் பாதை, குழந்தைகளுக்கான விளையாட்டு கூடம், உணவகங்கள், வணிக வளாகம் அமைக்கப்பட இருக்கிறது.
பூங்காவிற்குள் பல்வேறு நாட்டு மரங்கள், மூலிகை மரங்கள் நடப்படவும் திட்டமிடப்பட்டுள்ளதாக தகவல்கள் வெளியாகியுள்ளன.
இந்த இடத்தில் பூங்கா அமைக்க கடற்கரை ஒழுங்குமுறை ஆணையம் அனுமதி உள்பட பல்வேறு துறைகளிலும் அனுமதியும் பெற்றாகிவிட்ட நிலையில், இந்த இடத்தில் மியாவாக்கி முறையில் அடர் காடுகள் அமைக்கும் திட்டமும் செயல்படுத்தப்பட்டு வருகிறது.
இதனையடுத்து கோட்டூர்புரத்தில் ஆக்கிரமிப்பு செய்யப்பட்டிருந்த மாநகராட்சிக்கு சொந்தமான நிலம் சமீபத்தில் மீட்கப்பட்டு 10 ஏக்கர் பரப்பளவில் பூங்கா அமைக்கவும் திட்டமிடப்பட்டுள்ளது.
அதில் ஐந்து ஏக்கர் பரப்பளவில் விளையாட்டு வளாகம் அமைத்து, கால்பந்து, கூடைப்பந்து, இறகுப்பந்து உள்ளிட்ட பல்வேறு விளையாட்டுகளுக்கான மைதானங்கள் அமைக்கப்படும் எனவும் அதிகாரிகள் கூறுகிறார்கள்.
இவைதவிர, கூவம் மறுசீரமைப்பு திட்டத்தின் கீழ் 60 கிலோமீட்டர் நீளத்திற்கு 4 லட்சம் மரங்களை நட நதிகள் சீரமைப்பு கழகம் முடிவு செய்துள்ளது. இரண்டு முதல் நான்கு மீட்டர் வரை மாங்குரோவ் என பலவகையான மரங்கள் நடப்பட உள்ளது என்பதால் அப்பகுதி மக்கள் மகிழ்ச்சி அடைந்துள்ளனர்.
இதையும் படிங்க: நகர்ப்புற அடர் காடுகள் வளர்க்கும் திட்டத்தை ஆய்வு செய்த அமைச்சர்!
