சரவணபவன் ஓட்டல் உரிமையாளர் ராஜகோபால்(71) தனது ஓட்டலில் பணியாற்றும் ஊழியரின் மகளான ஜீவஜோதி மீது ஆசைப்பட்டார். இதனால் ஜீவஜோதியின் கணவர் பிரின்ஸ் சாந்தகுமாரை கூலிப்படை வைத்து கொலை செய்ததாக புகார் எழுந்தது. இந்த வழக்கில் பூவிருந்தவல்லி நீதிமன்றம், ராஜகோபாலுக்கு 10 ஆண்டுகள் சிறைத்தண்டனை வழங்கி உத்தரவிட்டது.
இதனை எதிர்த்து அவர் தொடர்ந்த மேல்முறையீட்டு வழக்கில் உயர்நீதிமன்றம் அவருக்கு 10 ஆண்டு சிறைத்தண்டனையை, ஆயுள் தண்டனையாக மாற்றி உத்தரவிட்டது. இதனையடுத்து உச்சநீதிமன்றத்தில் தொடரப்பட்ட மேல்முறையீட்டு வழக்கில் உச்சநீதிமன்றம் ராஜகோபாலின் ஆயுள் தண்டனை தீர்ப்பை உறுதி செய்து ஜீலை 7ஆம் தேதிக்குள் சரணடைய வேண்டும் என உத்தரவிட்டது.
இந்நிலையில், அவர் நேற்று பூவிருந்தவல்லி நீதிமன்றத்தில் சரணடைந்திருக்க வேண்டும். ஆனால், நேற்று நீதிமன்றம் விடுமுறை என்பதால் சரணடையவில்லை. மேலும், 71 வயதாகும் ராஜகோபால் உடல்நிலை பாதிக்கப்பட்டுள்ளதாகக் கூறி தனியார் மருத்துவமனையில் சிகிச்சை பெற்று வருகிறார்.
மேலும், உடல்நலத்தை காரணம் காட்டி சரண் அடைவதில் இருந்து விலக்கு கேட்டு உச்சநீதிமன்றத்தில் மனுதாக்கல் செய்திருந்தார். இந்த வழக்கை விசாரித்த உச்சநீதிமன்றம் ராஜகோபாலுக்கு அளித்த காலக்கெடு முடிந்துவிட்டது எனக் கூறி இந்த வழக்கை ஒத்திவைத்தது. உச்சநீதிமன்றம் தரப்பில் எந்த தடை உத்தரவும் பிறப்பிக்காத நிலையில், விரைவில் அவர் கைது செய்யப்படுவார் என்று எதிர்பார்க்கப்படுகிறது.
