சென்னை மாநகரில் நிரந்தர போக்குவரத்து மேம்பாடு, சி.எம்.ஆர்.எல் மற்றும் மழை நீர் வடிகால் வாரியம், போராட்டம் போன்ற ஒரு குறிப்பிட்ட தற்காலிக சூழ்நிலையைச் சமாளிக்கப் பல நேரங்களில் குறிப்பிட்ட சாலையை ஒரு வழி அல்லது இரு வழிகளையும் மூட வேண்டியுள்ளது. மூடப்பட்டுள்ள சாலைகளின் விவரங்களைக் கூகுள் மேப் உடனடியாக காட்டுவதில்லை.
இதனால் பொதுமக்கள் சிரமத்திற்குள்ளாவதை அறிந்து லெப்டன் நிறுவனத்துடன் இணைந்து போக்குவரத்து காவல்துறை குறிப்பிட்ட சாலையை மூடுவது மற்றும் அதன் கால அளவு குறித்து 15 நிமிடங்களுக்குள் தெரிவிக்கும் வகையில் ”road ease” எனும் செயலியைத் தயார் செய்துள்ளனர்.
இந்த செயலி மூலமாகக் கூகுள் மேப்பில் புள்ளியிடப்பட்ட சிறப்புக் கோட்டுடன் மூடப்பட்ட சாலைகளைக் காண்பிக்கும் வகையில் உருவாக்கப்பட்டுள்ளது. இந்த ”road ease” என்ற செயலியை இன்று காவல் ஆணையர் சங்கர் ஜிவால் துவக்கி வைத்தார்.
இதனைத் தொடர்ந்து செய்தியாளர்களைச் சந்தித்த காவல் ஆணையர் சங்கர் ஜிவால்,“சென்னையில் போக்குவரத்து நெரிசல் மற்றும் பொதுமக்களுக்கு இடையூறு ஏற்படுத்தாத வகையில் ”road ease” என்ற செயலியை அறிமுகம் செய்து வைத்துள்ளோம். சென்னையில் மழை நீர் வடிகால் வாரியம் மற்றும் சி.எம்.ஆர்.எல் பணிகள் தொடர்பாக சாலை மூடல் மற்றும் மாற்று பாதைகள் என மொத்தம் 151 சாலை மாற்றங்கள் செய்துள்ளோம்.
மத்திய அரசு கொண்டு வந்த புதிய அபராத தொகையைச் சென்னையில் கொண்டு வரும் படி தமிழ்நாடு அரசுக்குச் சென்னை காவல்துறை சார்பில் பரிந்துரை செய்துள்ளோம். அதன்படி புதிய அபராத விதி வருகிற 28ஆம் தேதி முதல் அமலுக்கு வரவுள்ளது.
புதிய மோட்டார் வாகன திருத்தச் சட்டத்தின் படி ஹெல்மெட் அணியாமல் வாகனம் ஓட்டினால் 500 ரூபாய் முதல் 1500 ரூபாயும், ஸ்டாப் லைன் தாண்டினால் 500 முதல் 1,500 ரூபாயும், புட் போர்டு விதிமீறலுக்கு 500 ரூபாய் முதல் 1500 ரூபாயும், மொபைல் போன் பேசிக்கொண்டு வாகனம் ஓட்டினால் 1,000 முதல் 10,000 வரையும் அபராதம் விதிக்கப்படும்.
மேலும் பைக் ரேஸிங், சாகசம் விதிமீறலில் ஈடுபட்டால் 15,000 முதல் 25,000 ரூபாயும், குடிபோதையில் வாகனம் ஓட்டினால் 10,000 ரூபாயும் அபராதம் விதிக்கப்படும். புதிய அபராத தொகையை பயன்படுத்தி வாகன ஓட்டிகளிடம் போக்குவரத்து காவல்துறையினர் லஞ்சம் வாங்கினால் பொதுமக்கள் சமூக வலைதளம் அல்லது நேரிடையாக வந்து புகார் அளிக்கலாம் எனவும் அவர்கள் மீது உரிய நடவடிக்கை எடுக்கப்படும்” எனவும் கூறினார்.
மேலும் தொடர்ந்து பேசிய அவர்,”தீபாவளியின் போது அரசு கட்டுப்பாடுகளை மீறி பட்டாசு வெடிப்பவர்கள் மீது தகுந்த நடவடிக்கை எடுக்கப்படும். கடந்தாண்டு மட்டும் 848 வழக்குகள் பதிவு செய்யப்பட்டது. இதுவரை 338 பட்டாசு கடைகளுக்குப் பட்டாசுகள் விற்க லைசன்ஸ் கொடுக்கப்பட்டுள்ளது.
தீபாவளி பண்டிகையை ஒட்டி தி நகர், புரசைவாக்கம், வண்ணாரப்பேட்டை போன்ற பகுதிகளில் பாதுகாப்பைப் பலப்படுத்தி இருப்பதாகவும், வாட்ச் டவர், பாடி வோர்ன் கேமரா, 300 சிசிடிவி கேமராக்கள் பொருத்திக் கண்காணிப்பில் ஈடுபட்டு வருவதாகவும், இந்த ஆண்டு குற்றங்கள் குறைவு” எனவும் கூறினார்.
இதையும் படிங்க: கழிவுநீர்த்தொட்டியை சுத்தம் செய்ய தனி நபரை நியமித்தால் கடும் நடவடிக்கை - சென்னை மாநகராட்சி
