சென்னை நெசப்பாக்கம் பகுதியைச் சேர்ந்தவர் ரவி. இவர் எம்ஜிஆர் நகர் பகுதியில் உள்ள 40 அடி உயரமுள்ள மரத்தில் ஏறி, கீழே குதித்து தற்கொலை செய்யப்போவதாக மிரட்டல் விடுத்தார். மேலும் கையில் ஒரு பாட்டிலில் பெட்ரோலையும் வைத்திருந்தார்.
இதைக் கண்ட அப்பகுதி மக்கள் உடனடியாக காவல் கட்டுப்பாட்டு அறைக்கு தகவல் தெரிவித்தனர். தகவலறிந்து தீயணைப்புத் துறையினருடன் சம்பவ இடத்திற்கு வந்த எம்.ஜி.ஆர் நகர் காவல்துறையினர், அந்நபரை மீட்பதற்கான முயற்சியில் ஈடுபட்டனர்.
பின்னர் தீயணைப்புத் துறையினர் தண்ணீரை பீய்ச்சியடித்த போது, அந்த நபர் வைத்திருந்த பெட்ரோல் பாட்டில் கீழே விழுந்தது. இதையடுத்து மேலும் அதிக உயரத்திற்கு சென்ற நபரிடம் தீயணைப்புத் துறையினர், இரண்டு மணி நேரத்திற்கும் மேலாக சமாதான பேச்சுவார்த்தையில் ஈடுபட்டனர்.
பின்னர், அவரை மீட்டு தீயணைப்புத் துறையினர் விசாரணை மேற்கொண்டதில், எம்.ஜி.ஆர் நகர் பகுதியில் ரவுடிகளின் தொல்லை அதிகமாக இருப்பதாகவும், அவர்களை ஒடுக்க நடவடிக்கை எடுக்கவேண்டும் என்பதற்காகவே தற்கொலை முயற்சியில் ஈடுபட்டதாக தெரிவித்தார்.
இதைத்தொடர்ந்து அந்நபரை காவல்துறையிடம் தீயணைப்புத் துறையினர் ஒப்படைத்தனர். ரவுடிகளை ஒடுக்க வேண்டும் என்பதற்காக தற்கொலை மிரட்ட விடுத்த நபரால் அப்பகுதியில் சிறிது பரபரப்பான சூழல் உருவாகியது.
இதையும் படிங்க: ரியல் எஸ்டேட் அதிபர் கொலை வழக்கில் தலைமறைவாக இருந்த 5 பேர் கைது!
