மத்திய நுகர்வோர் விவகாரங்கள், உணவு மற்றும் பொது விநியோக அமைச்சருடனான காணொலி மாநாட்டுக் கூட்டத்தில், தமிழ்நாட்டின் உணவுத் துறை அமைச்சர் காமராஜ் கோரிக்கை விடுத்துள்ளார். அதன்படி, ”கரோனா தொற்று பரவுவதைக் குறைக்க சென்னை, உள்ளிட்ட நான்கு மாவட்டங்களில் 19.06.2020 முதல் 30.06.2020 வரை முழு ஊரடங்கை தமிழ்நாடு முதலமைச்சர் அறிவித்துள்ளார். மக்களின் துன்பங்களைப் போக்க, அனைத்து அரிசி அட்டை வைத்திருக்கும் குடும்பங்களுக்கும் 1000 ரூபாய் விநியோகிப்பதாக முதலமைச்சர் அறிவித்துள்ளார்.
தமிழ்நாடு அரசு, ஏற்கனவே 2019 செப்டம்பர் 20ஆம் தேதி ’ஒன் நேஷன் ஒன் கார்டு’ திட்டத்தை செயல்படுத்த உத்தரவுகளை பிறப்பித்துள்ளது. அதன்படி மத்திய அரசுடன் புரிந்துணர்வு ஒப்பந்தத்தில் கையெழுத்திட்டது.
பயோ மெட்ரிக் சாதனங்களை கொள்முதல் செய்தல், நிறுவுதல், ஈ-போஸ் சாதனங்களுடன் ஒருங்கிணைத்தல், ’ஒன் நேஷன் ஒன் கார்டு’ திட்டத்திற்கான கணினி ஒருங்கிணைப்பாளரை தயார் நிலையில் வைத்திருத்தல் உள்ளிட்டவை செப்டம்பர் 2020க்குள் தயாராக இருக்கும்” எனத் தெரிவித்தார்.
கூட்டுறவு, உணவு மற்றும் நுகர்வோர் பாதுகாப்புத் துறையின் கூடுதல் தலைமைச் செயலாளர், தமிழ்நாடு சிவில் சப்ளைஸ் கார்ப்பரேஷனின் நிர்வாக இயக்குநர், சிவில் சப்ளை, நுகர்வோர் பாதுகாப்புத் துறை ஆணையர் ஆகியோர் இந்த மாநாட்டில் பங்கேற்றனர்.
இதையும் படிங்க : வெண்ணெய்மலை கோயிலில் தார்ச்சாலை அமைக்கும் பணிகள் - தொடங்கி வைத்த அமைச்சர்
