சென்னை: தமிழக சட்டப்பேரவையில் நேற்று காவல்துறை மானிய கோரிக்கை மீதான விவாதம் நடைபெற்றது. இதில் பேசிய ஸ்டாலின், “எதிர்க்கட்சி தலைவர் எடப்பாடி கே.பழனிசாமி சில சம்பவங்களைப் பட்டியலிட்டு கூறுகிறார். ஆனால் அந்த சம்பவத்திற்கு நடவடிக்கை எடுக்கவில்லை என்று கூறுகிறார். சம்பவம் நடந்த உடன் உடனுக்குடன் நடவடிக்கை எடுத்து வருகிறது திமுக ஆட்சி.
ஸ்டெர்லைட் விவகாரம் நடக்கும் பொழுது தொலைக்காட்சியைப் பார்த்து தான் தெரிந்து கொண்டேன் என்று சொன்னது போல் இல்லை எங்கள் ஆட்சி. அதிமுக ஆட்சியில் கல்லால் அடித்தே எழும்பூர் நீதிமன்றத்தில் வழக்கறிஞர் கொல்லப்பட்டதாகவும் கூறினார். மேலும், திமுக ஆட்சியில் எங்கெங்கெல்லாம் சம்பவம் நடக்கிறதோ அது ஆளும் கட்சியாக இருந்தாலும், எந்த கட்சியாக இருந்தாலும் அவர்கள் மீது உடனடியாக உடனுக்குடன் நடவடிக்கை எடுத்து கைது செய்யப்பட்டுள்ளது. அதற்கு எல்லாம் ஆதாரம் உள்ளது. அதையெல்லாம் நாளை பதில் உரையில் விளக்கமாக தெரிவிக்க இருக்கிறேன்” என்றார்.
அதற்குப் பதில் அளித்த எடப்பாடி பழனிசாமி, “நான் தொலைக்காட்சியில் பார்த்து தான் ஸ்டெர்லைட் விவகாரம் தெரிந்து கொண்டேன் என்று முதல்வர் சொன்னது உண்மைதான். நான் அன்று ஆய்வுக் கூட்டத்தில் இருந்தேன். அதனால் நிருபர்கள் கேட்ட கேள்விக்கு தொலைக்காட்சியில் பார்த்து தான் தெரிந்து கொண்டேன் என்று கூறினேன்.
அதன்பின்பு பாதுகாப்பு ஏற்பாடுகளை அங்கு எங்களின் அரசு செய்தது என்றார். தொடர்ந்து அங்கு ஸ்டெர்லைட் ஆலையை மூட வேண்டும் என்று போராட்டம் நடைபெற்றது. முழுமையாக காவல்துறை பாதுகாப்பு வழங்கப்பட்டது என்றார். மேலும், 144 தடை உத்தரவு போடப்பட்ட பிறகும் சட்டமன்ற உறுப்பினர் எப்படி போராட்டம் நடத்தினார் என குற்றம் சாட்டினார்.
அதற்குப் பதில் அளித்த சமூக நலத்துறை அமைச்சர் கீதா ஜீவன், “உண்மைக்கு புறம்பான செய்தியை கூறுகிறார்கள். 100 நாளுக்கும் மேலாக போராட்டம் நடைபெற்றது. ஆட்சியில் இருந்தவர்கள் எந்த நடவடிக்கையும் எடுக்கவில்லை. மக்களால் தேர்ந்தெடுக்கப்பட்ட நான் மக்களோடு இருக்கும்பொழுது காவல்துறையினரால் கைது செய்யப்பட்டேன். அந்த சம்பவம் நடைபெற்றதற்கு அப்போது ஆட்சியில் இருந்தவர்களின் நிர்வாக சீர்கேடு தான் காரணம் எனவும் சம்பவம் நடைபெற்ற போது ஆட்சி தலைவர் ஊரில் இல்லை” என்றார்.
தொடர்ந்து பேசிய துரைமுருகன், “தடை உத்தரவு போட்ட பிறகு எப்படி போராடலாம் என்று எதிர்க்கட்சித் தலைவர் கேட்கிறார். தடை உத்தரவு போட்ட இடத்திற்குச் செல்லவில்லை. அப்படியே இருந்தாலும் சரி அதற்காக வண்டிக்கு மேல் நின்று சுடுவதா? காக்கா குருவிகளைச் சுடுவது போல் வேன் மேல் ஏறி அன்று துப்பாக்கிச் சூடு நடைபெற்றதாகக் கூறினார். மேலும், 100 நாள் போராட்டம் நடத்தி மாவட்ட ஆட்சித் தலைவரைச் சந்தித்து மனு கொடுப்பதற்காக வருகிறார்கள் அந்த நேரத்தில் ஆட்சித் தலைவர் ஊரில் இருந்து இருக்க வேண்டும். இந்த போராட்டம் வெடிப்பதற்கு உங்கள் ஆட்சித் தலைவரும் ஒரு காரணம் எனக் கூறினார்.
பிறகு பேசிய பழனிசாமி, “திமுக ஆட்சியில் எத்தனை துப்பாக்கிச் சூடு நடந்தது என்று நான் தெரிவிக்கவா, திமுக ஆட்சியில் அன்று நடந்ததை நாங்கள் ஆதாரத்தோடு தெரிவிக்கிறோம் என்றார். தொடர்ந்து பேசிய முதலமைச்சர், “நூறு நாட்களுக்கு மேல் அந்த போராட்டம் நடந்து கொண்டிருந்தது ஏன்? முதலமைச்சர், அமைச்சர் போராட்டக்காரர்களை அழைத்துப் பேசவில்லை. அதன் பிறகு தான் நூறாவது நாள் மாவட்ட ஆட்சித் தலைவரை சந்திப்பதற்காக போராட்டக்காரர்கள் சென்றார்கள்.
அப்போது ஆட்சித் தலைவர் இல்லாதது ஏன்? என்று கேள்வி எழுப்பினார். அதிமுக ஆட்சியில் நடைபெற்ற குற்றச் சம்பவங்கள் குறித்து என்னிடமும் நிறையப் பட்டியல் இருக்கிறது நானும் வெளியிடுவேன் எனக் கூறினார். துப்பாக்கிச் சூடு நடந்ததற்கு அனுமதி கொடுத்தது யார் என்றார்.
இதனைத் தொடர்ந்து பேசிய பழனிசாமி, 20 ஆண்டு காலமாக நடைபெறும் போராட்டம் அது. உங்கள் ஆட்சிக் காலத்தில் விரிவாக்கம் ஏற்படும் என்று அறிவித்ததால் தான் இந்த போராட்டமே நடைபெற்றது. திமுக ஆட்சியில் எத்தனை துப்பாக்கிச் சூடு நடந்தது என்று முழு விவரம் எங்களுக்குத் தெரியும் என்றார்.
பிறகு பேசிய சட்டத்துறை அமைச்சர் ரகுபதி, “அருணா ஜெகதீசன் அறிக்கையிலேயே தெளிவாகச் சொல்லப்பட்டிருக்கிறது காக்கை குருவிகளைச் சுடுவது போல் வாகனத்தின் மீது ஏறி நின்று பொதுமக்கள் சுட்டுக் கொல்லப்பட்டிருக்கிறார்கள். அருணா ஜெகதீசன் அளித்த அறிக்கையில், தூத்துக்குடி துப்பாக்கிச் சூடு நடைபெற்ற அந்த கடைசி மூன்று நாட்களும் ஒவ்வொரு விஷயத்தையும் தொடர்ச்சியாக முதலமைச்சருக்கு (அப்போதைய) தெரியப்படுத்திக் கொண்டுதான் இருந்தார்கள் என்று அறிக்கையில் குறிப்பிட்டுள்ளார்” என்றார்.
தொடர்ந்து பேசிய ஊரக வளர்ச்சித்துறை அமைச்சர் ஐ.பெரியசாமி, “விவசாயத்திற்கான மின்சார கட்டணத்தைக் குறைக்கச் சொல்லி போராடிய விவசாயிகள் மீது துப்பாக்கி நடத்தியது அதிமுக அரசு என்றார். பின்னர் பேசிய பழனிசாமி, “ஸ்டெர்லைட் ஆலையை விரிவாக்கம் செய்வதற்கு யார் நிலம் கொடுத்தது. அதையெல்லாம் விரிவாகச் சொல்ல வேண்டும் என்றால் என்னிடம் எல்லாம் இருக்கிறது. தவறு என்றால் அப்போதே ஸ்டெர்லைட் ஆலையை நிறுத்தி இருக்க வேண்டும் ஆனால் விரிவாக்கம் செய்வதற்கு நிலம் கொடுத்தது திமுக அரசு” எனக் குற்றம் சாட்டினார்.
மேலும், “கூலி உயர்வு கேட்டு மாஞ்சோலை தோட்டத் தொழிலாளர்கள் நடத்திய ஆர்ப்பாட்டத்தில் துப்பாக்கிச் சூடு நடத்தி 17 பேர் மரணிக்கக் காரணமாக இருந்தது திமுக ஆட்சியில் தான் எனவும், போராட்டத்தில் ஈடுபட்ட விவசாயிகளையும் சுட்டுக்கொன்றது திமுக எனவும் ஒவ்வொரு ஆட்சி ஏற்படும் போது விரும்பத்தகாத சம்பவங்கள் தொடர்ந்து நடைபெற்றுக் கொண்டுதான் இருக்கிறது அதிமுக ஆட்சியில் மட்டும் நடைபெறுவது போல் பேசக்கூடாது” எனத் தெரிவித்தார்.
அதற்குப் பதில் அளித்த முதலமைச்சர், “எதிர்க்கட்சித் தலைவர் சொல்வதை நான் ஏற்றுக்கொள்கிறேன், ஒவ்வொரு ஆட்சி நடைபெறும் போது அசம்பாவிதங்கள் நடைபெறுகின்றது தான். அப்படி நடைபெறும் பொழுது அதற்கு நடவடிக்கை எடுப்பது எங்கள் ஆட்சி எனவும் பொள்ளாச்சி என்ன ஆச்சு? கொடநாடு சம்பவம் என்ன அச்சு? அதற்கும் நாங்கள் தான் நடவடிக்கை எடுத்து வருகிறோம்” எனத் தெரிவித்தார்.
இதையும் படிங்க: ஓபிஎஸ்ஸை பயன்படுத்தி திமுக நாடகம் - அங்கீகாரத்துக்குப்பின் கர்ஜித்த ஈபிஎஸ்!
