சென்னை: தமிழக கோயில்களில் அறங்காவலர்கள் நியமனம் செய்வது குறித்து நீதிமன்றத்துக்கு உதவியாக வரும் 31ஆம் தேதி நேரில் ஆஜராகும்படி, இந்து சமய அறநிலையத் துறை ஆணையருக்கும், சிறப்புப் பணி அதிகாரிக்கும் சென்னை உயர் நீதிமன்றம் உத்தரவிட்டு உள்ளது.
தமிழ்நாடு அரசின் இந்து சமய அறநிலையத்துறை கட்டுப்பாட்டின் கீழ் உள்ள திருக்கோயில்களை நிர்வகிப்பதற்கான அமைப்பாக அறங்காவலர்கள் குழு அமைக்கப்படுகிறது. தமிழகத்தில் இந்து சமய அறநிலையத் துறை கட்டுப்பாட்டில் உள்ள கோயில்களுக்கு அறங்காவலர்கள் நியமனம் செய்வது தொடர்பான வழக்குகள், நீதிபதிகள் மகாதேவன் மற்றும் ஆதிகேசவலு ஆகியோரின் அமர்வில் முன் விசாரணைக்கு வந்தது.
அப்போது இந்து சமய அறநிலையத் துறை தரப்பில் சிறப்பு அரசு வழக்கறிஞர் அருண் நடராஜன் ஆஜராகி வாதிட்டார். அறங்காவலர்கள் தேர்வு தொடர்பாக 38 மாவட்டங்களிலும், மாவட்ட குழுக்கள் அமைக்கப்பட்டுவிட்டதாக அவர் தெரிவித்தார்.
மேலும், 2024ஆம் ஆண்டு மே மாதத்தில் அறங்காவலர்கள் நியமிக்கப்படுவார்கள் எனவும் அவர் உறுதி தெரிவித்தார். அப்போது குறுக்கிட்ட நீதிபதிகள், கடந்த 2021ஆம் ஆண்டு பிறப்பித்த உத்தரவில் 12 வாரங்களுக்குள் அறங்காவலர்களை நியமிக்க உத்தரவிட்ட நிலையில், 2024 மே வரை அவகாசம் கோரப்படுவதை குறித்து கேள்வி எழுப்பினர்.
மேலும், அறங்காவலர்கள் நியமனம் தொடர்பான முன்னேற்றம் குறித்து மாதந்தோறும் அறிக்கை தாக்கல் செய்ய நீதிபதிகள் அறிவுறுத்தினர். அறங்காவலர்கள் தேர்வுக்கான விண்ணப்பங்களை ஆன்லைன் மூலம் மட்டுமே பெற வேண்டும் எனவும், இதற்காக இ-சேவை மையத்தின் சேவையை பயன்படுத்துமாரும் நீதிபதிகள் வலியுறுத்தினர்.
பின்னர், அறங்காவலர் நியமனம் தொடர்பான வழக்குகளில், நீதிமன்றத்துக்கு உதவியாக வரும் 31ஆம் தேதி நேரில் ஆஜராகும்படி இந்து சமய அறநிலையத் துறை ஆணையருக்கும், சிறப்பு அலுவல் அதிகாரிக்கும் நீதிபதிகள் உத்தரவிட்டனர்.
