சென்னை: தமிழ்நாட்டில் மாநிலப் பாடத்திட்டத்தின் கீழ் 2022 - 2023ஆம் கல்வி ஆண்டில் 12ஆம் வகுப்பு படித்த மாணவர்களுக்கான பொதுத் தேர்வு, கடந்த மார்ச் 13ஆம் தேதி முதல் ஏப்ரல் 3ஆம் தேதி வரை நடைபெற்றது. இதனையடுத்து, மாணவர்களின் விடைத்தாள் திருத்தம் செய்யப்பட்டு, மே 8ஆம் தேதி அரசுத் தேர்வுத்துறை மூலம் தேர்வு முடிவுகள் வெளியிடப்பட்டது.
இதன்படி, தமிழ்நாட்டில் 8 லட்சத்து 3 ஆயிரத்து 385 மாணவர்கள் தேர்வை எழுதிய நிலையில், 7 லட்சத்து 55 ஆயிரத்து 451 மாணவர்கள் தேர்ச்சி பெற்றனர். அதேநேரம், தேர்வில் மதிப்பெண் குறைவாக பெற்ற மாணவர்கள், தங்களின் விடைத்தாள் நகலைப் பெற்று, அதில் தவறுகள் இருந்தால் மதிப்பெண்களை திருத்தம் செய்ய மறுகூட்டல் அல்லது மறுமதிப்பீட்டிற்கு விண்ணப்பிக்கலாம் என அரசுத் தேர்வுத்துறை அறிவித்தது.
இதன்படி விண்ணப்பித்து விடைத்தாள் நகலை மாணவர்கள் பெற்றுள்ளனர். இந்த நிலையில், இவ்வாறு விடைத்தாள் நகல் பெற்ற மாணவர்களுக்கு அதிர்ச்சி அளிக்கும் வகையில் மதிப்பெண்கள் அதிகமாக போடப்பட்டு இருந்தது தெரிய வந்துள்ளது. அதிலும், மாணவர்கள் பெற்ற மதிப்பெண்களைக் காட்டிலும் கூடுதலாக வழங்கப்பட்டுள்ள தகவலும் வெளியாகி உள்ளது.
விடைத்தாள் நகலில் மதிப்பெண்கள் வழங்கிய விபரத்தை பதிவு செய்ததைக் காட்டிலும், மாணவர்களுக்கு வழங்கப்பட்ட தேர்வு முடிவுக்கான மதிப்பெண் பட்டியலில் கூடுதலாக மதிப்பெண்கள் வழங்கப்பட்டுள்ளது. தேர்ச்சி பெற்ற மாணவர்களுக்கு கூடுதலாக 5 மதிப்பெண்கள் முதல் 7 மதிப்பெண்கள் வரை போடப்பட்டுள்ளதும் தெரிய வந்துள்ளது.
குறிப்பாக ஒரு மாணவரின் விடைத்தாள் நகலில் கணினி பாடத்தில் பெற்ற மொத்த மதிப்பெண்கள் 66 என இருக்கின்ற நிலையில், இணையத்தில் வெளியான தேர்வு முடிவில் 69 என இருக்கிறது. மேலும், பொதுத்தேர்வின்போது விடைத்தாள் திருத்தும் ஆசிரியர்களுக்கு பல்வேறு கட்டுப்பாடுகள் விதிக்கப்படுகிறது.
அதேபோல் விடைத்தாள் திருத்தும் மையங்களிலேயே மதிப்பெண்கள் இணையத்தில் பதிவேற்றம் செய்யப்படுகிறது. எனவே, தேர்வின்போது பெற்ற மதிப்பெண்களை விட, கூடுதலாக மதிப்பெண்களை பதிவு செய்த ஆசிரியர்கள் மீது கடுமையான நடவடிக்கை எடுக்க வேண்டும் எனவும், மாணவர்களுக்கு கூடுதலாக மதிப்பெண்களை வழங்கியது யார் என்பது குறித்து தெளிவுபடுத்த வேண்டும் எனவும் மாணவர்களின் பெற்றோர் கோரிக்கை விடுத்துள்ளனர்.
அதுமட்டுமல்லாமல், பொதுத் தேர்வில் மாணவர்களின் தேர்ச்சி விகிதத்தை அதிகரித்துக் காட்டுவதற்கு இது போன்று மதிப்பெண்கள் வழங்கப்பட்டதா எனவும் பெற்றோர் தரப்பில் கேள்வி எழுப்பப்பட்டுள்ளது. மேலும், சில மாணவர்களுக்கு கூடுதலாக மதிப்பெண் வழங்கப்பட்டால், பிற மாணவர்கள் உயர் கல்வியில் சேர்வதற்கான தர வரிசையில் பெரிதும் பாதிக்கப்படுவார்கள் என கல்வியாளர்கள் கருதுகின்றனர்.
இதையும் படிங்க: பொதுத்தேர்வு எழுத 75 சதவீதம் வருகை அவசியம் - அன்பில் மகேஷ் விளக்கம்
