தமிழ்நாட்டில் கரோனா தொற்றின் இரண்டாவது அலை பாதிப்பைக் கட்டுப்படுத்த, கடந்த மாதம் 10ஆம் தேதிமுதல் ஊரடங்கு அமல்படுத்தப்பட்டது. ஆனால் தொற்று பாதிப்பு குறையாததால், தளர்வுகள் இல்லாத முழு ஊரடங்கு மே 24ஆம் தேதி அமல்படுத்தப்படுவதாக அறிவிக்கப்பட்டது.
இந்த ஊரடங்கு வருகிற 7ஆம் தேதி வரை நீட்டிக்கப்பட்டுள்ளது. தற்போது, தமிழ்நாட்டில் சராசரியாக நாள்தோறும் 25 ஆயிரம் பேர் கரோனா தொற்றால் பாதிக்கப்பட்டுள்ளனர்.
கரோனா தடுப்பு நடவடிக்கை, ஊரடங்கு உள்ளிட்டவை குறித்து முதலமைச்சர் மு.க. ஸ்டாலின் மருத்துவர்கள், வல்லுநர் குழுவினருடன் ஆலோசனை நடத்திவருகிறார். கரோனா நடவடிக்கைகள் குறித்து தங்களது பரிந்துரைகளை அரசுக்குப் பரிசீலனை செய்துவருகிறார்கள்.
அதன்படி, தமிழ்நாட்டில் ஊரடங்கு தளர்வை படிப்படியாக அமல்படுத்த வேண்டும் என்று வல்லுநர் குழு பரிந்துரை செய்துள்ளதாகக் கூறப்படுகிறது.
இந்நிலையில், தலைமைச் செயலகத்தில் முழு ஊரடங்கில் தளர்வுகள் அளிப்பது குறித்து முதலமைச்சர் மு.க. ஸ்டாலின் தலைமையில் இன்று (ஜூன் 4) காலை 11.30 மணியளவில் தலைமைச் செயலர், காவல் துறைத் தலைவர், சுகாதாரத் துறை முதன்மைச் செயலர் ஆகியோருடன் ஆலோசனை நடத்துகிறார்.
கரோனா பாதிப்பு குறைந்த மாவட்டங்களில் தளர்வுகள் அளிக்க வாய்ப்புள்ளதாகத் தகவல் வெளியாகியுள்ளது.
