சென்னை: கிண்டியில் உள்ள ராஜ்பவன் ஆளுநர் மாளிகை முன்பு கடந்த அக்டோபர் மாதம் 25ஆம் தேதி, இரண்டு பெட்ரோல் குண்டுகள் வீசப்பட்ட சம்பவம் சென்னையில் பரபரப்பை ஏற்படுத்தியது. இதையடுத்து, இந்த விவகாரம் தொடர்பாக சென்னை தேனாம்பேட்டையைச் சேர்ந்த சரித்திர பதிவேடு குற்றவாளியான கருக்கா வினோத் என்கிற ரவுடியை கிண்டி காவல் துறையினர் கைது செய்து விசாரணை மேற்கொண்டனர்.
விசாரணையைத் தொடர்ந்து, 5 பிரிவின் கீழ் கருக்கா வினோத் மீது வழக்கு பதிவு செய்யப்பட்டது. இதையடுத்து அவரை சைதாப்பேட்டை நீதிமன்றத்தில் ஒப்படைத்து மூன்று நாட்கள் நீதிமன்ற காவலில் கிண்டி போலீசார் எடுத்து விசாரணை மேற்கொண்டனர். அந்த விசாரணையில், நீட் தேர்வு விளக்கு வேண்டும் என்றும் நீண்ட நாட்களாக சிறையில் இருப்பவர்களை நன்னடத்தை அடிப்படையில் விடுதலை செய்ய வேண்டும் உள்ளிட்ட கோரிக்கைகளை முன்வைத்து பெட்ரோல் குண்டுகளை வீசியதாக கருக்கா வினோத் வாக்குமூலம் அளித்திருந்தார்.
அதையடுத்து, ரவுடி கருக்கா வினோத் மீது ஏற்கனவே சென்னை பாஜக அலுவலகம் மீது பெட்ரோல் குண்டு வீசிய வழக்கு, தேனாம்பேட்டை காவல் நிலையம் மீது பெட்ரோல் குண்டு வீசிய வழக்கு, மதுபான கடை மீது பெட்ரோல் குண்டு வீசிய வழக்கு உள்ளிட்ட 14 வழக்குகள் நிலுவைவில் இருப்பது தெரியவந்தது. இதனால் ரவுடி கருக்கா வினோத்தை குண்டர் தடுப்புச் சட்டத்தின் கீழ் கிண்டி போலீசார் சிறையில் அடைத்தனர்.
இந்த நிலையில், தமிழ்நாட்டின் ஆளுநர் மாளிகை முன்பு பெட்ரோல் குண்டு வீசியதால், இந்த வழக்கின் முக்கியத்துவம் கருதி மத்திய உள்துறை அமைச்சகத்தின் உத்தரவின் பேரில், தேசிய புலனாய்வு முகமை (National Investigation Agency) அதிகாரிகள் மூன்று பிரிவின் கீழ் கருக்கா வினோத் மீது வழக்கு பதிவு செய்து விசாரணை அதிகாரிகள் நியமிக்கப்பட்டனர்.
இந்த நிலையில், தேசிய புலனாய்வு முகமை அதிகாரிகள் சார்பில் இந்த வழக்கு தொடர்பான ஆவணங்களை தங்களிடம் ஒப்படைக்க வேண்டும் என தமிழ்நாடு காவல்துறை டிஜிபிக்கு கடிதம் எழுதப்பட்டுள்ளது. அதன் அடிப்படையில், சென்னை காவல் ஆணையர் சந்தீப் ராய் ரத்தோர் பெட்ரோல் குண்டு வீசப்பட்ட சம்பவம் தொடர்பான ஆவணங்களை தேசிய புலனாய்வு முகமை அதிகாரிகளிடம் ஒப்படைக்க உத்தரவிட்டுள்ளார்.
மேலும், ஆளுநர் மாளிகை முன்பு பெட்ரோல் குண்டு வீசப்பட்ட வழக்கு தொடர்பான முழு ஆவணங்களைப் பெற்ற பின்பு தேசிய புலனாய்வு முகமை அதிகாரிகள் அடுத்த கட்ட நடவடிக்கைகளை மேற்கொள்வார்கள் என தெரிவிக்கப்பட்டு உள்ளது.
இதையும் படிங்க: ஆளுநரும், முதலமைச்சரும் அமர்ந்து பேச வேண்டும்: மசோதாக்கள் நிலுவை வழக்கில் உச்ச நீதிமன்றம் கருத்து!
