மக்களவைத் தேர்தலோடு தமிழ்நாட்டில் காலியாக இருக்கும் 22 சட்டப்பேரவைத் தொகுதிகளுக்கும் இடைத்தேர்தல் நடைபெற்றது. ஏப்ரல் 18ஆம் தேதி 18 தொகுதிகளுக்கும், மே 19ஆம் தேதி மீதம் இருக்கும் நான்கு தொகுதிகளுக்கும் வாக்குப்பதிவு நடந்தது. இதனையடுத்து மக்களவைத் தேர்தல் முடிவுகளோடு இடைத்தேர்தல் முடிவுகளும் வெளியாகும் என தெரிவிக்கப்பட்டுள்ளது. அதன்படி இன்று காலை எட்டு மணிக்கு வாக்குகள் எண்ணப்பட இருக்கின்றன.
நாடே மக்களவைத் தேர்தல் முடிவுக்காக காத்திருந்தாலும் தமிழ்நாடு மக்கள் இடைத்தேர்தல் முடிவுக்காக காத்திருக்கின்றனர். 22 சட்டப்பேரவை தொகுதிகளுக்கு முடிவுகள் வெளியாகும் பட்சத்தில் பெரும்பான்மைக்கு 118 எம்.எல்.ஏ.க்கள் தேவைப்படும். இச்சூழலில் அதிமுக தற்போது 113 எம்.எல்.ஏ.க்களுடன் ஆட்சியைத் தொடர்ந்து கொண்டிருக்கிறது. திமுக 97 எம்.எல்.ஏ.க்களுடன் எதிர்க்கட்சியாக இருந்துவருகிறது.
இந்த 22 சட்டப்பேரவைத் தொகுதிகள் இடைத்தேர்தலில், அதிமுக ஐந்து தொகுதிகளில் வென்றால் ஆட்சியை தக்கவைத்துக் கொள்ளும். இருப்பினும், ரத்தின சபாபதி, கலைச்செல்வன், பிரபு ஆகியோரின் நிலைப்பாடு என்னவென்பது தெளிவாகத் தெரியவில்லை. மேலும், அவர்களுக்கு அனுப்பிய நோட்டீஸ் மீது உச்ச நீதிமன்றம் இடைக்கால தடை விதித்திருப்பதால் அவர்கள் அநேகமாக அதிமுகவுக்கு எதிரான மனப்பான்மையில் இருப்பர் என கூறப்படுகிறது.
அதுமட்டுமின்றி, கருணாஸ், தமிமுன் அன்சாரி, தனியரசு ஆகியோரும் அதிமுகவுக்கு எதிராக இருக்கும்பட்சத்தில் அக்கட்சி இந்த இடைத்தேர்தலில் 11தொகுதிகளில் வென்றால் அதிமுகவுக்கு கூடுதல் பலமே.
ஆனால் தேர்தலுக்கு பிந்தையக் கருத்து கணிப்பில் 22 தொகுதிகளில் திமுக பெரும்பான்மையான இடங்களில் வெல்லும் என தெரியவந்திருப்பதால் எடப்பாடி அண்ட் கோ கடும் அப்செட்டில் இருப்பதாக அரசியல் நோக்கர்கள் கருதுகின்றனர்.
எனவே, இன்று வெளியாக இருப்பது இடைத்தேர்தல் முடிவு இல்லை அதிமுக அரசின் ஆயுளை முடிவு செய்வது. அதன் ஆயுள் ரேகை இன்று நீண்டு அதிமுக ஆட்சி நிலைக்குமா இல்லை தேய்ந்து அந்த ஆட்சி கலையுமா என்பது இன்னும் சில மணி நேரங்களில் தெரிந்துவிடும் என்பது அரசியல் பார்வையாளர்களின் கருத்தாக உள்ளது.
