ஸ்ரீஹரிகோட்டா: இந்திய விண்வெளி ஆராய்ச்சி மையம் சார்பில் ஜி.எஸ்.எல்.வி-எப் 12 ராக்கெட் ஆனது இந்திய நேரப்படி 10.42 மணிக்கு ஆந்திராவின் ஸ்ரீஹரிகோட்டாவில் உள்ள சதீஷ் தவான் ராக்கெட் ஏவு தளத்திலிருந்து விண்ணில் ஏவப்பட்டது. இந்த ராக்கெட் 51.7 மீட்டர் உயரமும் 420 டன் உந்துவிசை எடையும் கொண்டது. ஜி.எஸ்.எல்.வி. வரிசையில் இது 15வது ராக்கெட் எனபது குறிப்பிடத்தக்கது.
இந்த ராக்கெட்டின் மூலம் என்.வி.எஸ் -01 என்கிற 2232 கிலோ எடை கொண்ட வழிகாட்டும்(navigation) வகை செயற்கைக்கோள் விண்ணில் செலுத்தப்பட்டது. இந்த செயற்கைக்கோள் இரண்டாம் தலைமுறை தொழில்நுட்பம் கொண்ட நேவிகேஷன் செயற்கைக்கோளாகும். இதன் மூலம் இந்தியா மற்றும் அதன் சுற்றுப்புற பகுதிகளில் உள்ள பயனர்களுக்கு நிலை, வேகம், இடம் மற்றும் நேரத் தகவலை துல்லியமாக வழங்க முடியும் என கூறப்படுகிறது.
இந்த செயற்கைக்கோள் மூலம் நிலத்திலும் கடற்பரப்பிலும் பயணிக்கும் இடத்தையும் தொலைவையும் மிகவும் துல்லியமாக கணிக்க முடியும் என கூறப்படுகிறது. மேலும் இந்திய எல்லைக்கு அப்பால் 1500 கிலோமீட்டர் வரை கண்காணிக்க முடியும் என கூறப்படுகிறது. இதனைத் தொடர்ந்து மீனவர்கள் கடலுக்குள் எல்லைப்பகுதியை அறிந்துகொள்ளவும், அதேபோல் விவசாயிகளுக்கு நிலத்தின் தன்மையை அறிவதிலும் உதவும். இந்த தொடர் சேவைகளை விரிவுபடுத்த கூடுதலாக L1 பேண்ட் சிக்னல்களை உள்ளடக்கியுள்ளது.
முதன்முறையாக, உள்நாட்டு அணுக் கடிகாரம் என்விஎஸ்-01ல் பறக்கவிடப்பட்டுள்ளது. இந்த செயற்கைகோள் வெற்றிகரமாக விண்ணில் ஏவப்பட்டு புவிநிலைச் சுற்றுப்பாதையில் 18 நிமிடங்கள் 37 நொடிகளில் சென்று சேர்ந்தது. இது குறித்து செய்தியாளர்களிடம் பேசிய இஸ்ரோ தலைவர் சோம்நாத், “என்.வி.எஸ் -01 செயற்கைக்கோள் வெற்றிகரமாக விண்ணில் நிலை நிறுத்தப்பட்டது. மேலும் இதே போன்று நான்கு செயற்கைக்கோள் விண்ணில் செலுத்தப்படும். கடைசியாக ராக்கெட் ஏவும் போது கிரயோஜினிக் என்ஜினில் பிரச்சனை ஏற்பட்டது.
அது இந்த முறை சரி செய்யப்பட்டுள்ளது. கடந்த முறை நடந்த தவறுகளை சரி செய்து உள்ளோம். அதே போல் கடந்த முறை எரிபொருள் சேமிப்பு பகுதியில் தான் சிக்கல், ராக்கெட்டில் இல்லை. இந்த வழிகாட்டுமுறை மிகவும் துல்லியமானது. சந்திராயன் செயற்கை கோள் விண்ணில் ஏவுவது பற்றி விரைவில் அறிவிக்கப்படும். ககன்யான் திட்டத்திற்கு தேவையான பாராசூட், இருக்கை, மற்றும் பயணி அமைப்பு ஆகியவை சோதனை செய்யப்பட்டு வருகிறது. சோதனை வாகன ஏவும் திட்டம் ஜூலை ஆகஸ்டில் செயல்படுத்த உள்ளோம்.
மனிதர்கள் இல்லாமல் ஏவும் திட்டம் அடுத்த ஆண்டு செயல்படுத்த உள்ளோம். குலசேகரபட்டினத்தில் ராக்கெட் ஏவுதளம் அமைக்கும் பணிகள் விரைவாக நடந்து வருகிறது. சிறிய அளவிலான ராக்கெட் ஏவுதளமாக குலசேகரபட்டினம் செயல்பட வாய்ப்புள்ளது. குறிப்பாக வணிக ரீதியிலான தனியார் ராக்கெட் செலுத்துவதற்கு எதிர்காலத்தில் பயன்படும். 99.9% நிலம் கையகப்படுத்தும் பணிகள் பெரும்பாலும் முடிந்து விட்டது. சிறிய அளவிலான இடம் மட்டுமே கையகப்படுத்த வேண்டியுள்ளது.
கட்டுமானப்பணிக்கான டெண்டர் விரைவில் விடப்பட உள்ளது. கட்டுமான வேலை தொடங்கினால், குறைந்தபட்சம் இரண்டு ஆண்டுகளில் செயல்பட தொடங்கும். தற்போது வரை 2000ஏக்கர் நிலம் கையகப்படுத்தப்பட்டுள்ளது. தமிழக அரசு மிகுந்த ஒத்துழைப்பு வழங்கி வருகிறது. சந்திராயன்-3 ராக்கெட் இந்திய விண்வெளி ஆராய்ச்சி மையத்தில் இருந்து ஜூலை 3ம் தேதி விண்ணில் ஏவப்பட உள்ளது. ஆகஸ்ட் மாதம் இரண்டாம் வாரத்தில் நிலவை சென்றடையும்” என பல்வேறு தகவல்களைத் தெரிவித்தார்.
“கம்யூனிகேஷனுக்கு அடுத்து நேவிகேஷன் தான் முக்கியமானது” - URSC இயக்குனரின் சிறப்பு பேட்டி
இது ஒரு புறம் இருக்க விண்ணில் ஏவப்பட்ட ராக்கெட்டின் செயல் மற்றும் திறன்கள் குறித்து URSC-யின் இயக்குனரிடம் கேட்டபோது, இந்த நேவிகேஷன் மூலம் புதிய வேலைவாய்ப்புகளை உருவாக்க முடியும் என இதன் பயன்கள் மற்றும் செயல்பாடுகள் குறித்து எம். சங்கரன் இயக்குனர்(URSC) ஈ.டிவி பாரத்திற்கு சிறப்பு பேட்டி வழங்கியுள்ளார். அதில் அவர் கூறியதாவது, “இந்த செயற்கைக்கோள் விண்ணில் செலுத்தியதன் மூலம் நேவிகேஷனுக்கு ஒரு தீர்வு கிடைக்கும்.
இதில் புதிதாக எல் ஒன் பாண்ட் சேர்த்திருப்பதால் அனைத்து மொபைல் மென்பொருளில் நேவிகேஷன் மூலம் பயன்படுத்தப்படும். இதுதான் முக்கிய நோக்கமாகும். யாருக்கு மைக்ரோ செகண்ட், நானோ செகண்ட் தெரியவேண்டுமோ அவர்களுக்கு இது பயன்படும். கம்யூனிகேஷனுக்கு அடுத்து நேவிகேஷன் தான் முக்கியமானது. இந்த நேவிகேஷன் மூலம் புதிய வேலைவாய்ப்புகளை உருவாக்க முடியும். மேலும் இதன் மூலம் அனேக புதிய தனியார் ஒப்பந்தங்களை கொண்டு வர முடியும்” என தெரிவித்தார்.
இதையும் படிங்க: விண்ணில் சீறிப்பாய்ந்தது GSLV-F12 ராக்கெட்!
