காதலன் இறந்த துக்கத்தில் பள்ளி மாணவி தற்கொலை!

சென்னை: காதலன் தற்கொலை செய்துகொண்டதை அடுத்து அதைத் தாங்க முடியாத பள்ளி மாணவியும் தற்கொலை செய்துகொண்ட சம்பவம் அப்பகுதி மக்களை பெரும் சோகத்தில் ஆழ்த்தியுள்ளது.

சென்னை கொருக்குப்பேட்டை பாரதிநகர் வீட்டுவசதி வாரியத்தில் வசித்துவரும் சிவலிங்கம் என்பவரின் இரண்டாவது மகன் இளங்கோவிற்கும் (18) அதேப் பகுதியில் வசிக்கும் அண்ணாதுரை என்பவரின் மூத்த மகளான அர்ச்சனாவிற்கும் (16) காதல் ஏற்பட்டு இருவரும் பல மாதங்களாக காதலித்து வந்ததாகக் கூறப்படுகிறது. அர்ச்சனா பதினோராம் வகுப்பு படித்துவந்தார்.

இந்நிலையில், அர்ச்சனாவின் வீட்டிற்கு அவரின் காதல் விவகாரம் பற்றி தெரியவந்தவுடன் கடும் எதிர்ப்புக் கிளம்பியது. அதன் விளைவாக இருவரையும் சந்திக்கவிடாமல் அர்ச்சனாவின் பெற்றோர் அவரை வீட்டிலேயே அடைத்து வைத்துள்ளனர்.

இதனால் அர்ச்சனாவை சந்திக்க முடியாமல் மனமுடைந்த இளங்கோ, கடந்த இரண்டு வாரத்திற்கு முன்பு தூக்கிட்டு தற்கொலை செய்துகொண்டுள்ளார். இதையறிந்த அர்ச்சனா மிகவும் மன வருத்தத்தில் இருந்து வந்துள்ளார். இரண்டு வாரமாக அர்ச்சனா யாருடனும் பேசாமல் தனிமையில் இருந்து-வந்துள்ளார்.

இதைத் தாங்கிக்கொள்ள முடியாத அர்ச்சனாவின் பெற்றோர் அவரை அருகில் உள்ள அவரின் பாட்டி வீட்டிற்கு அனுப்பிவைத்துள்ளனர். அங்கேயும் மன வருத்தத்துடன் இருந்துவந்த அர்ச்சனா, வீட்டில் யாரும் இல்லாத நேரத்தில் தூக்கிட்டு தற்கொலை செய்துகொண்டுள்ளார்.

இச்சம்பவம் குறித்து அர்ச்சனாவின் உறவினர்கள் காவல் துறைக்கு தகவல் தெரிவித்தனர். உடனே சம்பவ இடத்திற்கு விரைந்துவந்த ஆர்.கே. நகர் காவல் துறையினர் உடலை கைப்பற்றி உடற்கூறு ஆய்வுக்காக அரசு ஸ்டான்லி மருத்துவமனைக்கு அனுப்பிவைத்தனர்.

ஒரே மாதத்துக்குள் அடுத்தடுத்து காதலர் இருவர் தூக்கிட்டு தற்கொலை செய்துகொண்ட சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.