மொகாலி (பஞ்சாப்): இந்தியாவில் சுற்றுப்பயணம் மேற்கொண்டுள்ள ஆப்கானிஸ்தான் அணி, மூன்று போட்டிகள் கொண்ட டி20 தொடரில் பங்கேற்கிறது. இத்தொடரின் முதல் போட்டி பஞ்சாப் மாநிலம் மொகாலியில் நாளை தொடங்குகிறது. இத்தொடர் டி20 உலகக் கோப்பைக்கு முன்னதாக நடைபெறும் ஒரே டி20 தொடர் என்பதால், இந்திய தேர்வுக்குழு உறுப்பினர்கள் சீனியர் வீரர்களான கோலி மற்றும் ரோகித் சர்மா ஆகியோரது ஆட்டத்திறனை கூர்ந்து கவனிப்பர்.
விராட் கோலி மற்றும் ரோகித் சர்மா ஆகியோர் 14 மாதத்திற்குப் பிறகு டி20 போட்டிகளில் களமிறங்குகின்றனர் என்பது குறிப்பிடத்தக்கது. முதல் போட்டியில் ஆப்கானிஸ்தான் அணியின் நட்சத்திர ஆட்டக்காரர் ரஷித் கான் விளையாட மாட்டார் என தகவல் வெளியாகியுள்ளது. ரோகித் மற்றும் கோலி ஆகியோர் இந்திய அணியை பல்வேறு போட்டிகளில் வெற்றி பெற வைத்துள்ளனர்.
ரோகித் சர்மா மற்றும் கோலி ஆகிய இருவரும் இத்தொடரில் தங்களது சிறப்பான ஆட்டத்தை வெளிப்படுத்தி, உலகக் கோப்பை டி20 அணியில் இடம்பிடித்து, கோப்பை வெல்ல முனைப்பு காட்டுவர் என நம்பப்படுகிறது. முதல் டி20 உலகக் கோப்பை இந்திய அணியில், ரோகித் சர்மா இடம் பெற்றிருந்தார். ரோகித், கோலி ஆகிய இருவரும் நாளைய போட்டியில் ரன் வேட்டை நடத்தும் பட்சத்தில், இந்திய அணி எளிதில் வெற்றி பெறும். ஜிதேஷ் சர்மா ஆப்கானிஸ்தான் தொடரில் விக்கெட் கீப்பராக களமிறங்குவார் என எதிர்பார்க்கப்ப்டுகிறது.
இந்திய அணியின் ஃபினிஷராக ரிங்கு சிங் அல்லது சிவம் துபே களமிறங்குவார் என தெரிகிறது. உள்ளூர் மைதானத்தில் களம் காணும் அர்ஷ்தீப் சிங், இந்திய பவுலிங் குழுவிற்கு தலைமை வகிப்பார். இத்தொடரில், இந்திய சுழற்பந்து வீச்சாளர்கள் வீசும் 8 ஓவர்கள் முக்கியமானதாக பார்க்கப்படுகிறது.
இந்திய அணி ஆப்கானிஸ்தானுக்கு எதிரான தொடரை முழுமையாக கைப்பற்றும் என ரசிகர்கள் எதிர்பார்க்கும் நிலையில், ஆப்கானிஸ்தான் ஒரு போட்டியிலாவது வென்று, இந்திய அணிக்கு அதிர்ச்சி கொடுக்கும் என்பதால், நாளைய போட்டியில் விறுவிறுப்புக்கு பஞ்சமிருக்காது. நாளைய போட்டியில் டாஸ் வெல்லும் அணி, பேட்டிங் தேர்வு செய்யும் என எதிர்பார்க்கப்படுகிறது. முதல் போட்டி மொகாலிக்கு அடுத்து இரண்டாவது மற்றும் மூன்றாவது போட்டிகள் இந்தூர், பெங்களூருவில் நடைபெறுகிறது.
இந்தியா: ரோகித் சர்மா (கேப்டன்), சுப்மன் கில், யாஷஸ்வி ஜெய்ஸ்வால், விராட் கோலி, திலக் வர்மா, ரிங்கு சிங், ஜிதேஷ் சர்மா, சஞ்சு சாம்சன், சிவம் தூபே, வாஷிங்டன் சுந்தர், அக்சர் பட்டேல், ரவி பிஷ்னாய், குல்தீப் யாதவ், அர்ஷ்தீப் சிங், அவேஷ் கான், முகேஷ் குமார்.
ஆப்கானிஸ்தான்: இப்ராஹிம் சத்ரான் (கேப்டன்), ரஹ்மானுல்லா குர்பாஸ், இக்ரம் அலிகில் (கீப்பர்), ஹஸ்ரத்துல்லா சசாய், ரஹ்மத் ஷா, நஜிபுல்லா சத்ரான், முகமது நபி, கரீம் ஜனத், அஸ்மவுல்லா ஒமர்சாய், ஷாராஃபுதீன் அஷ்ரஃப், முஜிபூர் ரஹ்மான், ஃபசல் ஹக் ஃபரூகி, ஃபரீத் அகமது, நவீன் உல் ஹக், நூர் அகமது, முகமது சலீம், கயீஸ் அகமது, ரஷீத் கான், குல்பதீன் நயீப்
இதையும் படிங்க: டி20 போட்டியில் 2-1 என்ற கணக்கில் தொடரைக் கைப்பற்றியது ஆஸ்திரேலியா..!
