விஜயவாடா: இந்தியாவின் உள்ளூர் டி20 தொடரான சையத் முஸ்தாக் அலி கோப்பை 2021-22 நவ. 4ஆம் தேதி தொடங்கியது. நாட்டின் பல இடங்களில் நடைபெறும் தொடர்களில் ஐந்து எலைட் பிரிவுகளின் கீழ், தலா ஆறு அணிகள் இடம்பெற்றுள்ளன. மேலும், பிளேட் குரூப் எனப்படும் பிரிவில் எட்டு அணிகள் இடம்பெற்றுள்ளன.
இந்நிலையில், பிளேட் குரூப்பில் இடம்பெற்றுள்ள விதர்பா - மணிப்பூர் அணிகள் நேற்று (நவ. 8) விஜயவாடாவில் உள்ள ஏசிஏ மைதானத்தில் மோதின. இப்போட்டியில், டாஸ் வென்ற விதர்பா அணி, முதலில் பேட்டிங்கை தேர்வு செய்து 20 ஓவர்களில் 222 ரன்களைக் குவித்தது.
கர்னேவார்: 4-4-0-2
ஜித்தேஷ் சர்மா 71 (31), அபூர்வ் வான்கடே 49 (16) ரன்களைக் குவித்தனர். இதையடுத்து, விளையாடிய மணிப்பூர் அணி 16.3 ஓவர்களில் 55 ரன்களுக்கு ஆல்-அவுட்டாக, விதர்பா அணி 167 ரன்கள் வித்தியாசத்தில் வெற்றிபெற்று நாக்-அவுட் சுற்றுக்கான வாய்ப்பை உறுதிசெய்துள்ளது.
இப்போட்டியில், விதர்பா அணியின் சுழற்பந்துவீச்சாளர் அக்ஷய் கர்னேவார் 4 ஓவர்களை வீசி ஒரு ரன்னைக் கூட கொடுக்காமல் இரண்டு விக்கெட்டுகளையும் கைப்பற்றியுள்ளார்.
இடது கை ஆஃப் ஸ்பின்னரான கர்னேவார், டி20 வரலாற்றில் வீசிய நான்கு ஓவர்களையும் மெய்டனாக்கிய முதல் வீரர் என்ற சாதனையைப் படைத்துள்ளார் என்பது குறிப்பிடத்தக்கது.
இதையும் படிங்க: T20 WORLDCUP: ஐபிஎல் தொடரால் தப்பித்தேன் - வில்லியம்சன் வெளிப்படை
