காதலை ஏற்க மறுத்த ஒரே காரணத்திற்காக தனது 15 வயதில் ஆசிட் வீச்சு தாக்குதலுக்கு ஆளானவர் லட்சுமி அகர்வால். கடந்த 2005-ல் நடைபெற்ற இந்த சம்பவம் இந்தியாவையே உலுக்கியது. ஆசிட் வீச்சால் தனது அழகான முகத்தை இழந்து சிதைந்த முகத்துடன் காணப்பட்ட லட்சுமி அகர்வால் பல இன்னல்களை அனுபவித்தார். ஆனாலும் மனம் தளராத லட்சுமி 'சான்வ் பவுண்டேசன்' என்ற பெயரில் தொண்டு நிறுவனத்தை தொடங்கி ஆசிட் வீச்சால் பாதிக்கப்பட்ட பெண்களுக்கு பல நலத்திட்ட உதவிகளை செய்து வருகிறார். இதற்காக லட்சுமி அகர்வால் சர்வதேச விருதுகளையும் வென்றுள்ளார்.
இந்நிலையில், ராஸி படத்தை இயக்கிய மேக்னா குல்சார் லட்சுமி அகர்வாலின் வாழ்க்கை வரலாற்றை படமாக இயக்க இருக்கிறார். இப்படத்திற்கு 'சப்பாக்' என பெயரிடப்பட்டுள்ளது. லட்சுமி அகர்வாலாக பாலிவுட் நடிகை தீபிகா படுகோனே நடிக்கிறார். மேக்னா குல்சார் இயக்கும் 'சப்பாக்' படத்தை பாக்ஸ் ஸ்டார் நிறுவனத்துடன் இணைந்து தீபிகா படுகோனே தயாரிக்கிறார்.
தற்போது, இப்படத்தின் ஃபர்ஸ்ட் லுக் போஸ்டர் வெளியாகியுள்ளது. அதில் ஆளே அடையாளம் தெரியாத அளவிற்கு தீபிகா படுகோனே லட்சுமியாக மாறியுள்ளார். மேலும், இப்படம் அடுத்த வருடம் ஜனவரி 10 ஆம் தேதி வெளியாகும் என படக்குழுவினர் அறிவித்துள்ளனர்.
'சப்பாக்' படத்தின் ஃபர்ஸ்ட் லுக் போஸ்டர் இணையத்தை கலங்கடித்து வருகிறது.
