ஷாருக் கான், கஜோல் நடிப்பில், கடந்த 1995ஆம் ஆண்டு அக்டோபர் 20ஆம் தேதி வெளியாகி இந்தியர்களின் மனதில் நீங்கா இடம்பிடித்த காதல் காவியம் ’தில்வாலே துல்ஹனியா லே ஜாயிங்கே’. ஆதித்யா சோப்ரா இயக்கத்தில் உருவான இந்தத் திரைப்படம் வெளியாகி இன்றுடன் 25 ஆண்டுகள் நிறைவடைந்துள்ளது.
’டிடிஎல்ஜே’ என சுருக்கமாகவும் செல்லமாகவும் ரசிகர்களால் அழைக்கப்படும் இந்தத் திரைப்படம், பாலிவுட் தாண்டி அனைத்து இந்தியர்களின் வீடுகளையும் சென்றடைந்து, அனைத்து தரப்பு மக்களும் கொண்டாடித் தீர்த்த ஒரு படமாகவே இன்று வரை விளங்கி வருகிறது.
தான் நேரில் பார்த்திராத இந்தியர் ஒருவருடன் நிச்சயிக்கப்பட்ட லண்டன் வாழ் இந்தியப் பெண்ணான சிம்ரன், திருமணத்திற்கு முன் தன் நண்பர்களுடன் ஐரோப்பிய சுற்றுலா செல்ல விரும்பி வீட்டில் அனுமதி பெற்று கிளம்புகிறார். அங்கு மற்றொரு லண்டன் வாழ் இந்தியரான ராகுலை சந்திக்கிறார். பிறகென்ன? மோதலில் தொடங்கி ராகுலுடன் காதல் பிறக்கிறது.
தொடர்ந்து சுற்றுலாப் பயணம் முடிந்து தங்களது நிஜ வாழ்க்கைக்கு திரும்பும் இருவரும் மீண்டும் எவ்வாறு சந்திக்கிறார்கள்? எங்கே சந்திக்கிறார்கள்? இருவரும் இணைந்தார்களா என்பதை இளமை பொங்க விவரித்திருக்கும் இந்தத் திரைப்படம், வெளியான காலகட்டம் தொடங்கி இன்றுவரை, இளைஞர்கள் தொடங்கி அனைத்து தரப்பு மக்களையும் ஈர்த்து கொண்டாட்டத்தில் ஆழ்த்தி வருகிறது.
ஏற்கனவே பார்த்து சலித்த கிளிஷே கதையாக தோன்றத்தான் செய்யும். ஏனெனில், கடந்த 25 ஆண்டுகளில் வெளியான பல காதல் கதைகளுக்கும் இப்படமே தொடக்கப் புள்ளியாக அமைந்தது என்பது மறுக்க முடியாத உண்மை.
”இந்திய சினிமா வரலாற்றில் நீண்ட காலம் திரையரங்கில் ஓடிய திரைப்படம்” எனும் டிடிஎல்ஜேவின் சாதனையை வேறு எந்த ஒரு இந்தியத் திரைப்படமும் அவ்வளவு எளிதாக முறியடித்துவிட முடியாது. மும்பையில் உள்ள ’மராத்தி மந்திர்’ திரையரங்கில் தொடர்ந்து 20 ஆண்டுகளுக்கு இந்தப் படம் ஓடித் தீர்த்தது. பெரும்பாலான காட்சிகளில் திரையரங்கின் இருக்கைகள் முழுவதுமாக நிரம்பி இருந்ததே இப்படத்திற்கு மக்கள் அளித்த வரவேற்பிற்கான சான்று.
என்ஆர்ஐ எனப்படும் வெளிநாடு வாழ் இந்தியர்களின் காதலை அழகுறப் படமாக்கி ஒருபக்கம் இப்படம் ’ட்ரெண்ட்செட்’ அமைத்துக் கொடுத்தது என்றால், மக்களின் மனதுக்கு மேலும் நெருக்கமாக இப்படம் மாறியதற்கு மற்றுமொரு காரணம் அதன் இளமை ததும்பும் பாடல்கள்! ஜதின்-லலித் இணையரால் கம்போஸ் செய்யப்பட்ட இப்படத்தின் பாடல்கள் ஒவ்வொன்றும், மென்மையான காற்றைப் போல நம்மை வருடிச் செல்ல இன்றளவும் மறப்பதில்லை!
”துஜே தேக்கா தோயே ஜானா ஸனம்” பாடலை முணுமுணுக்காத இந்தியர்களை விரல்விட்டு எண்ணி விடலாம். தன் கனவு நாயகனை விவரிக்கும் கஜோலின் அறிமுகப் பாடல் அழகியதொரு கவிதை. பின் நாள்களில் திரையுலகில் காட்சிப்படுத்தப்பட்ட இந்த வகையான ஏராளமான பாடல்களுக்கு இப்பாடலே ஆரம்பப் புள்ளி.
தமிழ் திருமணங்களுக்கு ’கடவுள் அமைத்து வைத்த மேடை’ பாடல் என்றால், வட இந்தியத் திருமணங்களுக்கு ’மெஹந்தி லகாகே ரக்னா’ பாடல். இந்தப் பாடல் ஒலிக்காத வட இந்திய திருமணங்கள் எவையேனும் உள்ளனவா என்பது குறித்து தனி ஆராய்ச்சி ஒன்றையே நடத்தலாம்!
ஜோடி, பூவெல்லாம் கேட்டுப்பார் என காதலன்/காதலியின் வீட்டிற்குச் சென்று தங்கி, அவர்களது குடும்பத்துடன் ஒன்றி, காதலில் வெற்றி பெறும் கதைக்களத்தை டிரெண்ட் செட் ஆக்கியது இந்தத் திரைப்படமே! கஜோலின் தந்தையான அம்ரிஷ் பூரியின் மனதில் இடம்பிடிக்க ஷாருக் செய்யும் சுட்டித்தனங்கள் என்றைக்குமே ரசிக்க வைப்பவை.
கஜோலின் தாயாக நடித்த சரிதா ஜலால், ஷாருக்கின் தந்தையாக நடித்த அனுபம் கெர், மிகக் க்யூட்டான ரோலில் தோன்றிய மந்த்ரா பேடி, சிறு கதாபாத்திரத்தில் வந்து செல்லும் இயக்குநர் கரண் ஜோஹர் என அனைத்து கதாபாத்திரங்களும் மலரும் நினைவுகளை அளிக்கத்தக்கவையே!
கிளைமாக்ஸில் ’ஜா சிம்ரன்.....ஜா’ என, ரயில் நிலையத்தில் அழகிய இசையின் பின்னணியில் கஜோலை ஷாருக் உடன் அம்ரிஷ் பூரி வழியனுப்பி வைக்கும் காட்சி, எத்தனை முறை, எத்தனை இந்தியப் படங்களில் மீண்டும் மீண்டும் படமாக்கப்பட்டது என்பதை எண்ணுவது, ’வானத்தைப் போல’ திரைப்படத்தில் விஜயகாந்தின் கையில் கொடுத்து எண்ண சொல்லப்பட்ட மண்ணுக்கு சமம்!
இறுதியாக, டிடிஎல்ஜேவை ஒரு வெற்றிகரமான பாலிவுட் திரைப்படம் எனும் குறுகிய வட்டத்தில் நிச்சயம் அடைத்துவிட முடியாது. வார இறுதியில் குடும்பத்துடன் மராத்தி மந்திரில் இப்படம் பார்ப்பதை 20 வருட கலாச்சாரமாக்கி சாதனைப் படைத்து, பெரும்பான்மை இந்தியர்களின் மனதில் சிம்மாசனமிட்டு அமர்ந்திருக்கும் இந்தப் படத்திற்கு வயது இன்றைக்கு 25.
இன்னும் காலம் கடந்து அனைத்து இந்தியர்களாலும் இந்தப் படம் கொண்டாடித் தீர்க்கப்பட வாழ்த்துக்கள்!
இதையும் படிங்க : ”நான் அழகான நடிகன் இல்லை, நடிகைகளுக்கு மத்தியில் கூச்சமாகவே உணருவேன்” - ஷாருக்கான்
