சென்னை கேகே நகரைச் சேர்ந்தவர் ஜனார்த்தனன். இவருக்கு நர்மதா என்பவருடன் திருமணமாகி இரண்டு குழந்தைகள் உள்ளது. சவுதி அரேபியாவில் பணியாற்றும் ஜனார்த்தனன், கடந்த 2019 மே மாதம் ஊர் திரும்பியுள்ளார். இந்நிலையில், தனது மனைவிக்கும் திருநின்றவூர் காவல் உதவி ஆய்வாளர் ராஜேஷ் என்பவருக்கும் தொடர்பு உள்ளதாகவும், இதனைத் தட்டிக்கேட்டதால் காவல் உதவி ஆய்வாளர் தனக்கு கொலை மிரட்டல் விடுத்ததாகவும் ஜனார்த்தனன் தெரிவித்துள்ளார்.
கடந்த ஞாயிற்றுக்கிழமை காலை ராயலா நகர் அருகேயுள்ள பூங்கா ஒன்றில் தனது மனைவியும், உதவி ஆய்வாளர் ராஜேஷ் என்பவரும் ஒன்றாக சந்தித்துக்கொண்டபோது, அவர்களைப் பின்தொடர்ந்து புகைப்படம் எடுத்ததாகவும், இதனைப் பார்த்த உதவி ஆய்வாளர், தன்னை மிகக் கடுமையாக தாக்கியதாகவும் கூறியுள்ளார். மேலும், தன் குழந்தைகள் பெயரில் வாங்கிய 5 கோடி ரூபாய் சொத்துகளை மனைவி நர்மதா, உதவி ஆய்வாளருடன் சேர்ந்து அபகரித்துள்ளதாகவும் குற்றம்சாட்டியுள்ளார்.
இதுகுறித்து ராயலா நகர், அசோக் நகர், தி.நகர் ஆகிய காவல் நிலையங்களில் புகார் கொடுத்ததாகவும், ஆனால் இதுவரை நடவடிக்கை எடுக்கவில்லை எனவும் தெரிவித்துள்ளார். இதனால் சென்னை காவல் ஆணையரை சந்தித்து நடவடிக்கை எடுக்கும்படி புகார் அளித்துள்ளதாக ஜனார்த்தனன் தெரிவித்துள்ளார்.
இதையும் படிங்க: பவானி ஆற்றில் குதித்து தற்கொலைக்கு முயன்றவர் உயிருடன் மீட்பு!
