இஸ்லாமாபாத் : பாகிஸ்தானில் மேற்கொண்டிருந்த பல்வேறு வளர்ச்சி மற்றும் உள்கட்டமைப்பு பணிகளுக்கான நிதி பங்களிப்பை வழங்காமல் சீனா காலம் தாழ்த்தி வருவதால் அரசின் கழுத்தை நெறிக்கும் அளவுக்கு பொருளாதார நெருக்கடி ஏற்பட்டு உள்ளதாக தகவல் வெளியாகி உள்ளது.
பாகிஸ்தானின் ஷாசாத் குழுமத்தின் துணை நிறுவனமாக பெட்ரோலியம் எக்ஸ்புளோரேசன் பிரைவேட் லிமிடட் நிறுவனத்துடன் போட்டுக் கொண்ட ஒப்பந்தத்தை மீறியதாக சீன தேசிய பெட்ரோலிய கழகத்திற்கு 20 லட்சத்து 48 ஆயிரம் அமெரிக்க டாலர்களை அபராதமாக விதித்து பாகிஸ்தான் சிவில் நீதிமன்றம் தீர்ப்பு வழங்கியது.
இதன் விளைவாக பாகிஸ்தான் - சீனா இடையிலான பொருளாதார உறவு ஸ்தம்பித்து காணப்படுவதாக கூறப்படுகிறது. பாகிஸ்தானில் மேற்கொண்டு இருந்த பல்வேறு வளர்ச்சி மற்றும் உள்கட்டமைப்பு பணிகளுக்கான நிதி பங்களிப்பை சீனா நிறுத்து வைத்து உள்ளது.
சீனா - பாகிஸ்தானின் பொருளாதார வழித் தடத்தில் மெயின் லைன் 1 மற்றும் கராச்சி - பெஷவார் இடையிலான ரயில்வே பணி, கராச்சி வட்ட ரயில்வே பணிகள் உள்ளிட்ட உள்கட்டமைப்பு பணிகள் மேற்கொள்ளப்பட்டு வந்தன. தற்போது பாகிஸ்தானுக்கான நிதி பங்களிப்பை சீனா நிறுத்தி உள்ளதால் இந்த பணிகள் கிடப்பில் போடப்பட்டு உள்ளன.
இதையும் படிங்க : சூடான் ராணுவ மோதல் - பலி எண்ணிக்கை அதிகரிப்பு! இந்தியர்களை மீட்க மத்திய அரசு தீவிரம்!
பாகிஸ்தானில் நிலவும் மின் பற்றாக்குறையை போக்க சீனாவுடன் 3 பில்லியன் டாலர் மதிப்பிலான மின் கொள்முதல் ஒப்பந்தம் போடும் முயற்சியையும் சீனா கிடப்பில் போட்டு உள்ளது. அதேநேரம் மின் கொள்முதல் ஒப்பந்தங்களை மறுபரிசீலனை செய்யுமாறு பாகிஸ்தான் பலமுறை அறிவுறுத்தி வரும் போதும் சீனா மறுத்து வருகிறது.
இந்த ஒப்பந்தம் தொடர்பாக பாகிஸ்தான் அரசுடன், மேற்கொண்ட ஒப்பந்தங்களை திருத்தும் நிலையில் இல்லை என சீன வங்கிகள் தெளிவுபடுத்தி உள்ளன. இதனால் பாகிஸ்தானில் எரிசக்தி, மின், ரயில்வே உள்ளிட்ட பணிகளில் ஈடுபட்டு உள்ள 30க்கும் மேற்பட்ட சீன நிறுவனங்கள் தங்களது பணிகளை கிடப்பில் போட்டு உள்ளன.
ஒருபுறம் இந்தியாவுடன் எல்லைப் பிரச்சினை, மறுபுறம் உள்நாட்டில் நிலவும் பொருளாதார நெருக்கடி, மின், எரிசக்தி, எரிபொருள், உணவு பற்றாக்குறையால் நிலவும் அமைதியில்லா சூழல் உள்ளிட்ட காரணங்களால் தவித்து வரும் பாகிஸ்தானுக்கு, தற்போது சீனாவுடனான பொருளாதார சுணக்கம் பேரிடியை ஏற்படுத்தி உள்ளது.
நாட்டின் எரிபொருள் பிரச்சினையை தீர்க்க ரஷ்யாவிடம் மலிவு விலை கச்சா எண்ணெய் பெறவும், உலக நாணய நிதியத்தின் கடன் உதவியை பெறவும் பாகிஸ்தான் போட்ட திட்டங்கள் பாழாய் போனது குறிப்பிடத்தக்கது.
இதையும் படிங்க : உ.பி. உள்ளாட்சி தேர்தலில் இஸ்லாமியர்களுக்கு 300 சீட் - பாஜக போடும் திட்டம் என்ன?
