சுரங்கப் பாதையின் இறுதியில் வெளிச்சத்தை கண்டது போல, கரோனாவால் அறிவிக்கப்பட்ட நீண்ட ஊரடங்கிலிருந்து உலகம் மெல்ல மெல்ல மீண்டுவருகிறது. நோயச்சம் இருந்தாலும், மக்கள் இயல்பு வாழ்க்கைக்கு திரும்பிவருகின்றனர். சில நாடுகளில், குழந்தைகள் பள்ளிக்குச் செல்ல தயாராகவுள்ளனர். பெருந்தொற்று உலகையே அச்சுறுத்திவரும் வேளையில், அரசாங்கங்கள் பொருளாதாரச் சிக்கலை சரி செய்யும் பணியில் இறங்கியுள்ளது. ஆனால் தற்போதுள்ள இயல்பு நிலை, கடந்த காலத்தைப் போல இல்லை.
கரோனா வைரஸ் பரவலால் அனைவரும் முகக்கவசம் அணிவது, கைகுலுக்குவது மற்றும் அருகில் அமர்வதை தவிர்ப்பது இயல்பாகியுள்ளது. மக்கள் அச்சமற்று இருப்பது நோய்த்தொற்று கட்டுக்குள் வந்திருப்பதற்கான அறிகுறி என வரலாற்றாசிரியர்கள் கூறுகின்றனர். தற்போது வரை கரோனா தொற்று தடுப்பூசி ஆராய்ச்சியில் நம்பிக்கை அறிகுறிகள் ஏதுமில்லை.
நோய் தொற்றை கட்டுக்குள் வைத்திருக்கும் நாடுகள், ஊரடங்கை தளர்த்த விரும்புபவர்கள், கரோனாவை விட பசிக் கொடுமை மோசமானது என்பதை உணர்ந்துள்ளனர். வைரஸ் பரவும் இந்த சூழலில்தான் நாம் வாழ்ந்தாக வேண்டும் என்பதை உலக தலைவர்கள் தெளிவுபடுத்துகின்றனர். சிவப்பு மண்டலங்கள் மட்டும் தடை செய்யப்பட்ட பகுதிகளாக தொடர்கிறது.
இந்தியா போன்ற நாடுகளில், நோய் பற்றிய விழிப்புணர்வும், அதிகப்படியான மருத்துவ வசதிகளும் மக்களின் நம்பிக்கையை மீட்டெடுத்திருக்கிறது. உலகளவில் அலுவலகங்கள் அனைத்தும் புதிய விதிமுறைகளோடு திறக்கப்பட தயார் நிலையில் உள்ளன. சுழற்சி முறையில் பணியாளர்கள் வேலைக்கு செல்லவிருக்கின்றனர். மென்பொருள் நிறுவனங்கள் வீட்டிலிருந்து பணி செய்பவர்கள் எண்ணிக்கையை உயர்த்தத் திட்டமிட்டுள்ளன.
சில நாடுகளில் பள்ளிகள் திறக்கப்பட்டுள்ளன. பள்ளிகளை திறப்பது பொருளாதார முன்னேற்ற நடவடிக்கைகளில் ஒன்றாக பார்க்கப்படுகிறது. பள்ளிகள் திறக்காத வேளையில், பணிபுரியும் பெற்றோர்கள் பணிக்கு செல்ல முடியாமல் தவித்தனர். இதுவே ஜெர்மனியும், டென்மார்க்கும் பள்ளிகளை திறந்ததற்கான காரணமாகும். ஸ்வீடன் அரசு இதுவரை பள்ளிகளை மூடவில்லை என தெரிகிறது. ஆனால் தகுந்த இடைவெளியைப் பின்பற்றி பள்ளி நிர்வாகத்தை செயல்பட நடவடிக்கை எடுத்துள்ளது.
ஆஸ்திரியா இந்த வாரம் பள்ளிகளை திறக்கவுள்ளது. ஒவ்வொரு வகுப்பிலும் மாணவர்களை இரண்டு குழுக்களாக பிரித்து, திங்கள் முதல் புதன் வரை ஒரு குழுவும், வியாழன் மற்றும் வெள்ளி வரை ஒரு குழுவும் வகுப்பில் கலந்துகொள்ள ஏற்பாடு செய்யப்பட்டுள்ளது. வீட்டில் தங்கி பயில விரும்புபவர்களுக்கு ஆன்லைன் வகுப்புகள் உண்டு. பல நாடுகளில் 40 பேர் அமரும் வகுப்புகளில் 20 பேருக்கு மட்டுமே அனுமதி அளிக்கப்பட்டுள்ளது. ஜெர்மனியின் நியஸ்த்ரலிட்ஸ் நகரில் உள்ள உயர்நிலைப் பள்ளி ஒன்று மாணவர்களுக்கு சுயபரிசோதனை செய்து கொள்ளும் கருவியை வழங்கியுள்ளது.
இந்தியாவில் கோடை காலம் என்பதால், பள்ளிகள் அனைத்துக்கும் விடுமுறை விடப்பட்டுள்ளன. பத்து மற்றும் மேல்நிலை வகுப்புகளின் தேர்வுகளுக்கான ஏற்பாடுகள் நடைபெற்றுவருகின்றன. பல்கலைக்கழகங்கள் பலவும் ஆன்லைனில் வகுப்பெடுத்து வருகின்றன.
விழாக்கள் அல்லது நிகழ்வுகளில் இரண்டு குடும்பங்களுக்கு மேல் கலந்துகொள்ளக் கூடாது என ஜெர்மனி அரசாங்கம் நிபந்தனை விதித்துள்ளது. நியூசிலாந்தும் ஆஸ்திரேலியாவும் இதேபோன்ற நிபந்தனைகளை விதித்துள்ளன. திங்கள் அன்று பிரான்ஸ் அரசாங்கம் தனது ஊரடங்கு விதியை தளர்த்தியது. இரண்டு மாதங்களுக்குப் பிறகு பிரான்ஸ் மக்கள் அனுமதியின்றி வீடுகளை விட்டு வெளிவரத் தொடங்கியுள்ளனர். பாரிஸ் மெட்ரோ ரயிலின் இருக்கைகள், தகுந்த இடைவெளியுடன் அமைக்கப்பட்டு வருகின்றன. ஸ்பெயினிலும் ஊரடங்கு உத்தரவு தளர்த்தப்பட்டுள்ளது.
ஆஸ்திரிய தலைநகரம் வியன்னாவில் கட்டப்பட்டுள்ள ஒரு பூங்கா, தகுந்த இடைவெளியை மனதில் கொண்டு வடிவமைக்கப்படுள்ளது. ஒவ்வொரு நுழைவு வாயிலிலும் ஒரு கதவு உண்டு, ஒரு நேரத்தில் ஒருவர் மட்டுமே அதன் வழியாக செல்ல அனுமதிக்கப்படுவர். மற்றவர்கள் தங்கள் நேரம் வரும்வரை காத்திருக்க வேண்டும்.
ஊரடங்கை தளர்த்தும் முன்பு நான்கு முக்கிய காரணிகளை மனதில் கொள்ள வேண்டும் என துறை சார்ந்த நிபுணர்கள் தெரிவிக்கின்றனர். அவை பின்வருமாறு...
1. கரோனாவால் பாதிக்கப்பட்ட அனைவருக்கும் மருத்துவ சேவைகளை வழங்கும் தரும் திறன் இருக்க வேண்டும்.
2. அறிகுறியற்ற நோயாளிகளை பரிசோதனை செய்வதற்கான கருவிகள் எளிதில் கிடைக்க வழிவகை செய்ய வேண்டும்.
3. ஒவ்வொரு நோயாளியையும், அவர்களோடு தொடர்புடையவர்களையும் கண்காணிப்பதற்கான வசதி இருக்க வேண்டும்.
4. கரோனாவல் பாதிக்கப்பட்டவர்கள் எண்ணிக்கை இரண்டு வாரங்களாக கீழ்நோக்கி சென்றிருக்க வேண்டும்.
இந்தியாவில் செவ்வாய் கிழமை முதல் டெல்லியில் இருந்து நாட்டின் பல்வேறு மாநில தலைநகரங்களுக்கு 15 சிறப்பு ரயில்கள் ஏற்பாடு செய்யப்பட்டுள்ளன. குறைந்த அளவில் பேருந்து மற்றும் பிற வாகனங்களை இயக்குவதற்கான சாத்தியக்கூறுகள் தென்படுகின்றன. பேருந்துகளில் அதற்கு ஏற்றார்போல் ஏற்பாடு செய்யப்படும். இதற்காக இந்தியாவின் சாலைப் போக்குவரத்து நிறுவனங்கள் புதிய விதிமுறைகளை வகுக்க திட்டமிட்டுள்ளன.
வேலைவாய்ப்புத் தேடி 4.5 கோடி இந்தியர்கள் ஒரு மாநிலத்தில் இருந்து மற்றொரு மாநிலத்துக்கு பயணிப்பதாக ஒரு புள்ளிவிவரம் தெரிவிக்கிறது. ஊரடங்கால் வெளிமாநிலத் தொழிலாளர்கள் பலர் தங்கள் வாழ்வாதாரத்தை இழந்து, நாதியற்றவர்களாக தவித்துவருகின்றனர். அதில் சிலர் தங்கள் சொந்த ஊர்களுக்கு நடந்தே செல்கின்றனர். இவர்கள் தங்கள் சொந்த ஊர்களுக்கு திரும்ப, சிறப்பு ரயில்களும் பேருந்துகளும் இயக்கப்படுகின்றன. அதேபோல் வெளிநாட்டில் சிக்கியுள்ள இந்தியர்களை மீட்க சிறப்பு விமானம் ஏற்பாடு செய்யப்பட்டுள்ளது.
திங்களன்று ஷாங்காயில் உள்ள டிஸ்னிலேண்ட் திறக்கப்பட்டது. அங்கு வருபவர்கள் முகக்கவசம் அணிந்து, தகுந்த இடைவெளியைப் பின்பற்ற வேண்டும் என அந்நிர்வாகம் வலியுறுத்தியுள்ளது. சீன அரசாங்கம் டிஸ்னிலேண்டில் 24,000 பேருக்கு மேல் அனுமதிக்கக் கூடாது என தெரிவித்துள்ளது. இது மற்ற நாட்களில் வருகை தருபவர்கள் எண்ணிக்கையில் மூன்றில் ஒரு பங்கு ஆகும். ஊரடங்குக்குப் பிறகு திறக்கப்படும் முதல் கேலிக்கை பூங்கா இதுவாகும். இதன் காரணமாக டிஸ்னி நிறுவனத்தின் பங்குகள் 8 மடங்கு அதிகரித்துள்ளன.
இதையும் வாசிங்க: கரோனா போரில் வெற்றி கண்ட வியட்நாம் - திட்டங்களும் நடவடிக்கைகளும்..!
