சீனாவின் ஹூபே மாகாணத்திலுள்ள வூஹான் நகரில் கடந்தாண்டு இறுதியில் கோவிட் 19 (கொரோனா) வைரஸ் தொற்று பரவத்தொடங்கியது. சீனாவின் மற்ற பகுதிகளுக்கும் பரவிய கோவிட் 19 வைரஸ் தற்போது அமெரிக்கா, இந்தியா, இத்தாலி ஆகிய நாடுகளுக்கும் வேகமாகப் பரவிவருகிறது.
மற்ற நாடுகளில் கோவிட் 19 வைரஸ் தொற்றின் தாக்கம் அதிகரித்தாலும் சீனாவில் கடந்த சில நாள்களாகவே இதன் தாக்கம் படிப்படியாக குறைந்துவந்தது. அதிலும் குறிப்பாக ஹூபே மாகணத்தைத் தவிர மற்ற பகுதிகளில் வைரஸின் தாக்கம் பெரிதும் குறைந்துவிட்டது.
இந்நிலையில் சீனாவின் தேசிய சுகாதார ஆணையம் சமீபத்தில் வெளியிட்டுள்ள அறிக்கையில், "கோவிட் 19 வைரஸ் தொற்றால் நேற்று 22 பேர் மட்டுமே உயிரிழந்தனர். அதில் ஒருவரைத் தவிர மற்ற அனைவரும் ஹூபே மாகணத்தைச் சேர்ந்தவர்கள். புதிதாக 40 பேர் இந்த வைரஸ் தொற்றால் பாதிக்கப்பட்டுள்ளனர். அவர்களில் பெரும்பாலானோர் ஹூபே மாகாணத்தைச் சேர்ந்தவர்கள்" என்று தெரிவிக்கப்பட்டுள்ளது.
ஜனவரி முதல் வாரம் முதல் கோவிட் 19 வைரஸ் தொற்றால் ஏற்படும் உயிரிழப்புகளிலேயே இதுதான் குறைவு என்பது குறிப்பிடத்தக்கது.
ஹூபே மாகணத்திலும் வைரஸ் தொற்றின் தாக்கம் குறைவதால், அந்த மாகாணத்தில் ஜனவரி முதல் வாரத்திலிருந்து போக்குவரத்துக்கு விதிக்கப்பட்டுள்ள தடையை நீக்குவது தொடர்பாக ஆலோசித்துவருவதாகவும் சுகாதாரத் துறை அலுவலர் ஒருவர் தெரிவித்துள்ளார்.
கடந்த சில நாள்களில் சீனாவுக்கு வந்த 67 பேருக்கு கோவிட் 19 வைரஸ் தொற்று இருப்பது உறுதிசெய்யப்பட்டது. சீனாவுக்கு வரும் வெளியாள்கள் வைரஸ் தொற்றால் பாதிக்கப்பட்டுவருவதால் அந்நாட்டில் கோவிட் 19 வைரஸ் தொற்று மீண்டும் அதிகரிக்கலாம் என்று அஞ்சப்படுகிறது.
இதையும் படிங்க: இத்தாலியில் ஒரே நாளில் 133 பேர் கொரோனாவால் உயிரிழப்பு!
