மீண்டும் தொடங்கிய 'வணங்கான்' பட பணிகள்.. அருண் விஜய் நடிக்கிறார்!

பாலா இயக்கத்தில் சூர்யா நடித்து கைவிடப்பட்ட வணங்கான் படத்தில் தற்போது அருண் விஜய் நடித்து வருகிறார்.

சென்னை: தமிழ் சினிமாவில் தனது வித்தியாசமான படங்களின் மூலம் ரசிகர்கள் மத்தியில் தனியிடம் பிடித்தவர் இயக்குனர் பாலா. விக்ரம், சூர்யா போன்ற நடிகர்களுக்கு இயக்குனர் பாலா இயக்கிய சேது, நந்தா ஆகிய படங்கள் அவர்களது திரை வாழ்வில் திருப்புமுனையாக அமைந்தது. சேது படத்தின் மூலம் நடிகர் விக்ரமுக்கு வாய்ப்புகளை திறந்துவிட்டவர் நந்தா படத்தின்‌மூலம் சூர்யாவின் நடிப்பு திறமையை வெளிப்படுத்தியவர்.

சமீப காலமாக பாலா தனது சினிமா வாழ்வில் படங்கள் இல்லாமல் சற்று கடினமான காலகட்டத்தில் இருக்கிறார். விக்ரம் மகன் துருவ் விக்ரம் நடிப்பில் தெலுங்கு வெற்றிப் படமான அர்ஜுன் ரெட்டி படத்தை தமிழில் ரீமேக் செய்தார். ஆனால் படத்தை பார்த்து விக்ரம் தரப்பு கடுப்பாகி படத்தை அப்படியே ட்ராப் செய்துவிட்டனர்.

அதனை தொடர்ந்து நடிகர் சூர்யா நடிப்பில் வணங்கான் என்ற படத்தை பாலா இயக்கி வந்தார். ஆனால் படப்பிடிப்பு சமயத்தில் பாலாவுக்கும் சூர்யாவுக்கும் மனக்கசப்பு ஏற்பட்டதாக கூறப்படுகிறது. இதனால் வணங்கான் படத்தில் இருந்து விலகுவதாக சூர்யா அறிக்கை வெளியிட்டார். அதனை தொடர்ந்து தற்போது அருண் விஜய்யை வைத்து பாலா வணங்கான் படத்தை இயக்கி வருகிறார்.

தற்போது வணங்கான் படத்தின் முதல்கட்டப் படப்பிடிப்பு முடிவடைந்ததுள்ளதாக அறிவிக்கப்பட்டுள்ளது. இப்படத்தின் முதல்கட்டப் படப்பிடிப்பு கடந்த மாதம் கன்னியாகுமரியில் தொடங்கியது. மேலும் இந்த முதல் ஷெட்யூலில் படக்குழு முக்கிய காட்சிகளை படமாக்கியுள்ளது. அடுத்தக்கட்ட படப்பிடிப்பு திருவண்ணாமலையில் ஏப்ரல் 17ஆம் தேதி தொடங்குவதாக தெரிவிக்கப்பட்டுள்ளது.

அருண் விஜய் கதாநாயகனாக நடிக்கும் இந்தப் படத்தில், ​​ரோஷினி பிரகாஷ் கதாநாயகியாக நடிக்கிறார். பிரபல நடிகர்கள் பலர் நடிக்கும் இந்தப் படத்தில் சமுத்திரக்கனி முக்கிய கதாபாத்திரத்தில் நடிக்கிறார். ஜி.வி.பிரகாஷ் இசையமைக்க, கவிப்பேரரசு வைரமுத்து பாடல்களை எழுதுகிறார். ஆர்.பி.குருதேவ் ஒளிப்பதிவு பணியை மேற்கொள்கிறார். சில்வா இந்த படத்திற்கு ஆக்‌ஷன் காட்சிகளைக் கையாண்டுள்ளார்.

சூர்யா நடித்து வந்த படத்தில் தற்போது அருண் விஜய் நடித்து வருவதால் படத்தின் கதையில் மாற்றம் செய்யப்பட்டுள்ளதா என்று ரசிகர்கள் மத்தியில் எதிர்பார்ப்பு ஏற்பட்டுள்ளது. பொதுவாக பாலா படங்கள் கற்பனையை விட யதார்த்தம் கலந்து இருக்கும் என்று நாம் அனைவரும் அறிந்ததே.

ஏற்கனவே இயக்குனர் ஹரி சூர்யாவை வைத்து இயக்குவதாக இருந்த ’அருவா’ படத்தை கைவிட்டு அருண் விஜயை வைத்து யானை படத்தை இயக்கினார். இந்நிலையில் மீண்டும் சூர்யா நடித்து கைவிடப்பட்ட படத்தில் அருண் விஜய் நடிக்கிறார் என்பது குறிப்பிடத்தக்கது.

இதையும் படிங்க: பட்டையை கிளப்பும் 'மைனரு வேட்டி கட்டி' பாட்டு.. எழுதியவர் யார் தெரியுமா?