சென்னை: பிரபல டோலிவுட் சினிமா தயாரிப்பாளர் தில் ராஜூ தயாரிப்பில் தயாராகியுள்ள திரைப்படம், வாரிசு. இயக்குநர் வம்சி இயக்கத்தில் உருவாகியுள்ள இத்திரைப்படத்தில் விஜய், ராஷ்மிகா மந்தனா உள்ளிட்டப் பலர் நடித்துள்ளனர்.
அடுத்த ஆண்டு பொங்கலுக்கு வாரிசு திரைப்படம் வெளியாகும் என அதிகாரப்பூர்வமாக அறிவிக்கப்பட்டு, அதன் விளம்பரப் பணிகள் முடுக்கி விடப்பட்டுள்ளன. தொடர்ந்து இத்திரைப்படத்தின் தமிழ்நாடு வெளியீட்டு உரிமையை செவன் ஸ்கிரீன் ஸ்டுடியோ வாங்கியது ஏற்கெனவே அதிகாரப்பூர்வமாக அறிவிக்கப்பட்டது.
இந்த நிலையில் வாரிசு திரைப்படத்தின் சென்னை, செங்கல்பட்டு, கோயம்புத்தூர் உள்ளிட்ட மாவட்டங்களின் வெளியீட்டு உரிமையை உதயநிதி ஸ்டாலினின் ரெட் ஜெயன்ட் மூவிஸ் நிறுவனம் வெளியிட உள்ளதாக தகவல்கள் வெளியாகியுள்ளன.
மேலும் சேலம் மாவட்டத்தில் 5 ஸ்டார் செந்திலும் மற்றும் திருச்சி மாவட்டத்தில் நாராயணசாமியும் வெளியிட உள்ளதாக தகவல்கள் வெளியாகி உள்ளன. அதேநேரம் அஜித்குமார் நடிப்பில் பொங்கலுக்கு வெளியாக உள்ள துணிவு திரைப்படத்தை தமிழ்நாடு முழுவதும் ரெட் ஜெயன்ட் நிறுவனம் வெளியிடுவதை அதிகாரப்பூர்வமாக அறிவித்திருந்தது குறிப்பிடத்தக்கது.
இதையும் படிங்க: விஜய்க்கு அபராதம் விதித்த போலீஸ்... பின்னணி என்ன?
