நடிகர் சிவகார்த்திகேயன் தனியார் தொலைக்காட்சியில் நடந்த காமெடி நிகழ்ச்சியில் பங்கேற்று வெற்றிபெற்றவர் என்பது நம் அனைவருக்கும் நன்கு தெரிந்ததே. அதனைத்தொடர்ந்து அதே தொலைக்காட்சியில் கிட்டத்தட்ட எல்லா நிகழ்ச்சிகளிலும் பங்கேற்று தனது காமெடி மற்றும் மிமிக்ரி திறமை மூலம் ஒவ்வொருத்தர் வீடுகளிலும் ஒரு அங்கமாக மாறியவர்.
அதன்மூலம் பிரபலமான சிவகார்த்திகேயன் தனுஷ் நடித்த ’3’ படத்தில் தனுஷின் பள்ளித்தோழனாக தமிழ் சினிமாவில் அறிமுகமானார். முதல் படத்திலேயே இவரது அறிமுகக் காட்சிக்கு திரையரங்குகளில் விசில் சத்தம் காதைக் கிழித்தது. இதற்கெல்லாம் காரணம் சின்னத்திரை நிகழ்ச்சி மூலம் இவர் பெற்றுவைத்திருந்த குடும்பத்தலைவிகளின் நன்மதிப்புதான்.
டிவியில் இருக்கும்போதே பெண்கள், குழந்தைகள் உள்பட இளைஞர்களின் இதயங்களில் இடம்பிடித்துவிட்டார். முதல் படத்தையடுத்து பாண்டிராஜ் இயக்கத்தில் ’மெரினா’ படத்தில் கதாநாயகனாக அறிமுகமானார். அதனைத்தொடர்ந்து ’மனம்கொத்திப்பறவை’, ’கேடி பில்லா கில்லாடி ரங்கா’, ’எதிர் நீச்சல்’, ’வருத்தப்படாத வாலிபர் சங்கம்’ என அடுத்தடுத்த வெற்றிப்படங்களின் மூலம் தமிழ் சினிமாவில் அடுத்த நட்சத்திரமாக உயர்ந்தார்.
தனது கடினமான உழைப்பால் முன்னணி நடிகராக உயர்ந்தார். நடிகர் விஜயின் வெற்றி ஃபார்முலாவை பின்பற்றி குடும்பங்கள் ரசிக்கும் கமர்ஷியல் படங்களில் நடித்தார். இவரது நடிப்பில் சமீபத்தில் வெளியான ’டாக்டர்’ மற்றும் ’டான்’ ஆகிய படங்கள் அடுத்தடுத்து ரூ.100 கோடி வசூல் பட்டியலில் இணைந்தன.
முன்னதாக வியாபாரத்தில் விஜய் படங்களை நெருங்கிவிட்டார் சிவகார்த்திகேயன் என்று எல்லாம் பேச்சு எழுந்தது. இதனால் கொஞ்சம் அகலக்கால் வைத்த சிவகார்த்திகேயன் சில படங்களில் சறுக்கினார். சுதாரித்துக்கொண்டு மீண்டும் அடுத்தடுத்து வெற்றிப்படங்களை கொடுத்து வருகிறார்.
இந்நிலையில் தான் சிவகார்த்திகேயனுக்கு தற்போது எல்லா நடிகரையும்போல ரஜினி ஆக வேண்டும் என்ற ஆசை வந்துள்ளது போல. அதன்படி ரஜினி ஆக வேண்டும் என்றால் முதலில் அவரது படத்தலைப்பை தனது படத்திற்கு வைப்பது. அதன்படி சிவகார்த்திகேயனுக்கு இரண்டாவது முறை அப்படி ஒரு ஆசை வந்திருக்கிறது.
ரஜினிகாந்த் படத் தலைப்பான 'வேலைக்காரன்' படத்தை இதற்கு முன்பு தன் படத்திற்காக வைத்தவர் தற்போது அடுத்து நடிக்கும் 'மாவீரன்' படத்தலைப்பை வைத்திருக்கிறார்.
‘மண்டேலா’ படத்தை இயக்கிய மடோன் அஸ்வின் இயக்கும் புதிய படத்தில் சிவகார்த்திகேயன் நடிக்கிறார். இப்படத்தின் தலைப்பு அறிவிப்பு வீடியோ சமீபத்தில் வெளியானது. அதில் ரஜினி நடித்து வெளியான ’தளபதி’ கெட்டப்பில் தலைமுடி வைத்துக்கொண்டு சிவகார்த்திகேயன் வருகிறார். படத்திற்கு மாவீரன் என்று ரஜினி படத்தலைப்பு வேறு வைக்கப்பட்டுள்ளது. தொடர்ந்து இரண்டு படங்கள் வசூல் குவித்துவிட்டதால் அடுத்து ரஜினியாக சிவகார்த்திகேயன் துடிக்கிறார் என்று கோடம்பாக்கத்தில் கிசுகிசுக்கப்படுகிறது.
ரஜினி நடிப்பில் கடைசியாக வெளியான ’அண்ணாத்த’ படம் வெற்றி பெறவில்லை. வசூலும் குறைவுதான். இதனால் ரஜினி ஆகும் ஆசை சிவகார்த்திகேயனுக்கும் வந்துவிட்டதுபோல. ரஜினிகாந்த் நடித்த 'வேலைக்காரன்' படம் பெரிய வெற்றி பெற்றது. ஆனால், சிவகார்த்திகேயனின் 'வேலைக்காரன்' சராசரி வெற்றியையே பெற்றது. ரஜினி நடித்த 'மாவீரன்' தோல்வியடைந்தது. சிவகார்த்திகேயனின் 'மாவீரன்' என்ன ஆகும் என படம் வெளிவந்தால்தான் தெரியும். காத்திருப்போம்.
இதையும் படிங்க: ட்ரக்ஸுக்கு எதிராக களத்தில் இறங்கிய அஸ்ரா கார்க்... சபாஷ் சொன்ன நடிகர் விஷால்!
