சென்னை: இம்சை அரசன் 23ஆம் புலிகேசி, புலி, இரும்பு கோட்டை முரட்டு சிங்கம், கசட தபற உள்ளிட்ட படங்களை இயக்கி மக்கள் மனதில் இடம் பிடித்தவர், இயக்குநர் சிம்புதேவன். இதனையடுத்து சிம்புதேவன் யோகி பாபுவை கதாநாயகனாக வைத்து ‘போட்’ என்னும் படத்தை இயக்கியுள்ளார். இந்த படம் தமிழ், தெலுங்கு, மலையாளம், கன்னடம், இந்தி ஆகிய மொழிகளில் வெளியாகிறது.
ஜிப்ரான் இசையமைக்கும் இப்படத்திற்கு மாதேஷ் மாணிக்கம் ஒளிப்பதிவு செய்துள்ளார். இப்படம் முழுவதும் கடலில் படமாக்கப்பட்டு, சர்வைவல் த்ரில்லர் ஜானரில் எடுக்கப்பட்டுள்ளது. இதனையடுத்து இப்படத்தின் டீசர் இன்று வெளியாகும் என படக்குழு அறிவித்துள்ளது. டீசர் வெளியிட்டு விழா இன்று துபாயில் நடக்கிறது. போட் பட டீசரை தமிழில் விஜய் சேதுபதி வெளியிடுகிறார்.
டிமான்டி காலனி 2 டிரெய்லர்: அஜய் ஞானமுத்து இயக்கத்தில் அருள்நிதி, ப்ரியா பவானி சங்கர், அருண் பாண்டியன் உள்ளிட்ட பலர் நடித்துள்ள திரைப்படம் ‘டிமான்டி காலனி 2’. இத்திரைப்படத்திற்கு சாம்.சி.எஸ் இசையமைத்துள்ளார். கடந்த ஆண்டு நவம்பர் மாதம் தொடங்கிய டிமான்டி காலனி இரண்டாம் பாகத்தின் படப்பிடிப்பு, தற்போது இறுதிக் கட்டத்தை எட்டியுள்ளது.
படத்தின் போஸ்ட் புரோடக்ஷன் பணிகள் நடைபெற்று வரும் நிலையில், படத்தின் டிரெய்லர் இன்று (டிச.16) வெளியாகவுள்ளது. டிமான்டி காலனி படத்தின் முதல் பாகம் கடந்த 2015ஆம் ஆண்டு வெளியாகி, ரசிகர்கள் மத்தியில் மிகப்பெரும் வரவேற்பை பெற்றது. டிமான்டி காலனி திரைப்படம் வெளியானபோது ரசிகர்களுக்கு புது விதமான த்ரில் அனுபவத்தையும் கொடுத்தது.
மது போதையில் நான்கு நண்பர்கள் ஒரு பங்களாவில் சிக்கிக் கொண்டு, அங்கு ஏற்படும் திகில் அனுபவங்களே டிமான்டி காலனி முதல் பாகத்தின் கதைக்களமாகும். அந்த படத்தின் இரண்டாம் பாகம் என்பதால் ரசிகர்களிடையே எதிர்பார்ப்பை ஏற்படுத்தியுள்ளது. முன்னதாக அஜய் ஞானமுத்து இயக்கத்தில் விக்ரம் நடித்த கோப்ரா திரைப்படம், பாக்ஸ் ஆபிஸில் எதிர்பார்த்த வெற்றியை பெறவில்லை என்பது குறிப்பிடத்தக்கது.
இதையும் படிங்க: சர்வதேச திரைப்பட விழாவில் கவனத்தை ஈர்த்த கிடா! ஓடிடியில் வெளியீடு!
