ஸ்டெர்லைட் துப்பாக்கிச் சூடு: ஒரு நபர் கமிஷன் முன்பு வழக்கறிஞர்கள் ஆஜர்!

தூத்துக்குடி: ஸ்டெர்லைட் துப்பாக்கிச் சூடு தொடர்பாக மக்கள் உரிமைப் பாதுகாப்பு மைய வழக்கறிஞர்கள் ஒருநபர் கமிஷனில் நேரில் ஆஜராகி இன்று விளக்கமளித்தனர்.

தூத்துக்குடியில் கடந்த ஆண்டு ஸ்டெர்லைட் ஆலைக்கு எதிராக மே 22ஆம் தேதி அன்று நடைபெற்ற போராட்டத்தில் காவல் துறையினர் துப்பாக்கிச்சூடு நடத்தியதில் 13 பேர் சுட்டுக் கொலை செய்யப்பட்டனர். இந்த துப்பாக்கிச் சூடு சம்பவம் குறித்து விசாரணை நடத்தி அறிக்கை தாக்கல் செய்ய தமிழ்நாடு அரசு ஓய்வு பெற்ற நீதிபதி அருணா ஜெகதீசன் தலைமையில் ஒரு நபர் ஆணையத்தை அமைத்து உத்தரவிட்டது.

நீதிபதி அருணா ஜெகதீசன் தலைமையிலான ஒரு நபர் ஆணையம் தூத்துக்குடியில் அரசு சுற்றுலா மாளிகை முகாம் அலுவலகத்தில் தனது விசாரணையை நடத்தி வருகிறார். ஒரு நபர் ஆணையத்தின் 16ஆவது கட்ட விசாரணை 12ஆம் தேதி தொடங்கி நாளையுடன் நிறைவு பெறவுள்ளது.

இதில் 4ஆம் நாள் விசாரணையில் ஆஜராகி விளக்கம் அளிப்பதற்காக மனித உரிமை பாதுகாப்பு மைய வழக்கறிஞர்கள் ஜிம்ராஜ் மில்டன், பார்வேந்தன் ஆகியோருக்கு சம்மன் அனுப்பப்பட்டிருந்தது. அதன்பேரில் இன்று ஒரு நபர் ஆணையத்தில் ஆஜராகி விளக்கம் அளிப்பதற்காக வழக்கறிஞர்கள் பார்வேந்தன், ஜிம்ராஜ் மில்டன், பார்த்தசாரதி, ஹரிராகவன் ஆகியோர் வந்திருந்தனர்.

இதில் வழக்கறிஞர் பார்வேந்தன் செய்தியாளர்களிடம் தெரிவிக்கையில், “ஸ்டெர்லைட் ஆலைக்கு எதிரான போராட்டத்தில் நடைபெற்ற அரச பயங்கரவாதத்தில் 13 பேர் சுட்டுக் கொலை செய்யப்பட்டனர். போராட்டத்தில் பலியான நபர்களுக்கு உரிய நீதி கிடைக்க வேண்டும், பாதிக்கப்பட்ட மக்களுக்கு நிவாரணம் வேண்டும் என்று உயர் நீதிமன்றத்தில் ஒரு மனுத்தாக்கல் செய்து இறந்தவர்களின் உடலை உடற்கூறாய்வு செய்யக்கூடாது, பாதிக்கப்பட்ட மக்களுக்கு உரிய நீதி கிடைக்க வேண்டும் என்று கோரியிருந்தோம்.

வழக்கின் பேரில், பாதிக்கப்பட்ட மக்களுக்கு உரியச் சட்ட உதவி வழங்கலாம் என்ற ஆணையை நீதிபதிகள் பிறப்பித்தனர். அந்த ஆணையையொட்டி அதற்காக அமைக்கப்பட்டுள்ள ஒரு நபர் ஆணையத்தில் நீதிபதி விசாரணைக்கு ஆஜராக இன்று எங்களுக்கு குறிப்பாணை அனுப்பப்பட்டிருந்தது. அழைப்பாணை பேரில் நாங்கள் வந்திருக்கிறோம்.

ஸ்டெர்லைட் துப்பாக்கிச் சூடு தொடர்பாக 450 பக்க ஆவணங்களைத் தாக்கல் செய்ய உள்ளோம். இந்த வழக்கில் குற்றஞ்சாட்டப்பட்டிருக்கிற மாவட்ட காவல் கண்காணிப்பாளர், மாவட்ட ஆட்சியர், ஸ்டெர்லைட் சட்ட ஆலோசகராக இருந்த சத்திய பிரியா ஆகியோர் மீது கொலை வழக்குப்பதிவு செய்யப்பட வேண்டும். ஆகவே இந்த துப்பாக்கிச்சூடு கண்டிக்கத்தக்கது மட்டுமல்லாமல், அந்த துப்பாக்கிச் சூட்டில் ஈடுபட்ட அத்தனை அரசு அலுவலர்களும் தண்டிக்கப்பட வேண்டும்” என்று தெரிவித்தார்.