திருநெல்வேலி: தமிழ்நாடு சட்டப்பேரவைத் தேர்தலுக்கான வேட்புமனு தாக்கல் நாளை (மார்ச் 19) நிறைவுபெறுகிறது. இதையடுத்து திமுக, அதிமுக உள்ளிட்ட அனைத்துக் கட்சி வேட்பாளர்களும் வேட்புமனு தாக்கல் செய்துவருகின்றனர்.
இந்தச் சூழ்நிலையில் திருநெல்வேலி மாவட்டம் நாங்குநேரி தொகுதியில் அதிமுக வேட்பாளர் ஒருவரை மாற்ற கட்சித் தலைமை முடிவெடுத்துள்ளது என்று பரபரப்பாகப் பேசப்படுகிறது.
அதாவது திருநெல்வேலி மாவட்டம் நாங்குநேரி தொகுதியில் போட்டியிடும் அதிமுக வேட்பாளர் தச்சை கணேசராஜாவை மாற்றிவிட்டு ஏற்கனவே அங்கு சட்டப்பேரவை உறுப்பினராக உள்ள ரெட்டியார்பட்டி நாராயணனை வேட்பாளராக அறிவிக்கப்போவதாகத் தகவல் கசிந்துள்ளது.
தச்சை கணேசராஜா திருநெல்வேலி மாநகர மாவட்ட அதிமுக செயலாளராக உள்ளார். இவர் திருநெல்வேலி சட்டப்பேரவைத் தொகுதியில் போட்டியிடுவதற்கு அதிக ஆர்வம் காட்டிவந்தார். ஆனால் திருநெல்வேலி சட்டப்பேரவைத் தொகுதியில் அதிமுக கூட்டணி சார்பில் பாஜக மாநிலத் துணைத் தலைவர் நயினார் நாகேந்திரன் போட்டியிடுவதால் கணேசராஜாவுக்கு திருநெல்வேலியில் வாய்ப்பு மறுக்கப்பட்டது.
திட்டமிட்டப்படி திருநெல்வேலி தொகுதி அதிமுக கூட்டணியில் பாஜக ஒதுக்கப்பட்டு அங்கு நயினார் நாகேந்திரன் போட்டியிடுவது உறுதியான நிலையில் தச்சை கணேசராஜாவுக்கு நாங்குநேரி சட்டப்பேரவைத் தொகுதியில் போட்டியிட வாய்ப்பு வழங்கப்பட்டது.
அங்கு அவர் வேட்புமனு தாக்கல் செய்து தீவிர பரப்புரையில் ஈடுபட்டுவருகிறார். திமுக கூட்டணி கட்சியான காங்கிரசைச் சேர்ந்த ரூபி மனோகரன் நாங்குநேரியில் போட்டியிடுகிறார்.
நாங்குநேரி தொகுதியில் நாடார், பட்டியலின சமூகத்தைச் சேர்ந்த மக்களே அதிகம் வசிக்கின்றனர். ஆனால் அதிமுகவில் போட்டியிடும் கணேசராஜா தேவர் சமுதாயத்தைச் சேர்ந்தவர். எனவே அவருக்கு வெற்றி வாய்ப்பு மிக மிகக் குறைவு என்று கூறப்படுகிறது.
மேலும், காங்கிரஸ் வேட்பாளர் ரூபி மனோகரன் கடந்த இரண்டு ஆண்டுகளாகவே நாங்குநேரியில் முகாமிட்டுப் பல்வேறு பணிகளில் ஈடுபட்டுவருகிறார். இவர் 2019இல் நடைபெற்ற நாங்குநேரி தொகுதி இடைத்தேர்தலில் போட்டியிட்டுத் தோல்வியைச் சந்தித்தார்.
இருப்பினும் இந்த முறை எப்படியும் வெற்றி பெற்றே தீர வேண்டும் என இரண்டு ஆண்டுகளாகப் பல்வேறு பொது நிகழ்ச்சிகளில் பங்கேற்று மக்களைச் சந்தித்துவருகிறார். அதனால் அவருக்கு வெற்றி வாய்ப்பு அதிகம் இருப்பதாக அரசியல் வட்டாரங்கள் தெரிவிக்கின்றன.
இதுபோன்ற சூழ்நிலையில் தேவர் சமூகத்தைச் சேர்ந்த கணேசராஜா போட்டியிடுவதால் அதிமுகவுக்கு நாங்குநேரியில் கடும் பின்னடைவு ஏற்படும் என்று கட்சியின் தலைமைக்குத் தகவல் தெரிவிக்கப்பட்டுள்ளது.
அதன் அடிப்படையில் கணேசராஜாவை மாற்றிவிட்டு தற்போது அங்கு சட்டப்பேரவை உறுப்பினராக உள்ள ரெட்டியார்பட்டி நாராயணனை வேட்பாளராக நியமிக்கப்பட உள்ளதாகக் கூறப்படுகிறது.
இதற்காக தச்சை கணேசராஜா இன்று (மார்ச் 18) அவசர அவசரமாக சென்னைக்குப் பயணம்செய்துள்ளதாகவும் கூறப்படுகிறது. அவர் நாங்குநேரி தொகுதியில் இன்று பரப்புரையில் ஈடுபடவில்லை என்பது குறிப்பிடத்தக்கது.
தேர்தல் நெருங்கும் நேரத்தில் அதிமுக வேட்பாளர் மாற்றப்படுவதாக வெளியான தகவல் அதிமுகவினரிடையே அதிர்ச்சியை ஏற்படுத்தியுள்ளது.
இதையும் படிங்க: திருநெல்வேலி தொகுதி பாஜக வேட்பாளருக்கு ஆதரவாக மத்திய அமைச்சர் பரப்புரை
