சேலம்: மேட்டூர் அருகேயுள்ள கூழையூர் கிராமத்தைச் சேர்ந்த சிவக்குமார் என்பவர் மகன் தனுஷ்(19). நீட் தேர்வு பயம் காரணமாகத் தூக்கிட்டு தற்கொலை செய்துகொண்டார். இச்சம்பவம் மாநிலம் முழுவதிலும் பெரும் சோகத்தையும், அதிர்வலைகளையும் ஏற்படுத்தியுள்ளது.
இந்த நிலையில் திமுக மாநில இளைஞரணி செயலாளரும், சட்டப்பேரவை உறுப்பினருமான உதயநிதி ஸ்டாலின் இறந்த மாணவர் தனுஷின் உடலுக்கு நேரில் சென்று மலர் மாலை வைத்து அஞ்சலி செலுத்திவிட்டு, பெற்றோருக்கு ஆறுதல் தெரிவித்தார்.
மேலும் நிதியுதவியாக இறந்த மாணவரின் குடும்பத்தாருக்கு 10 லட்சம் ரூபாய் வழங்கினார். இவருடன் பள்ளிக் கல்வித் துறை அமைச்சர் அன்பில் மகேஷ் பொய்யாமொழி, சட்டத்துறை அமைச்சர் ரகுபதி மற்றும் விளையாட்டுத்துறை அமைச்சர் மெய்யநாதன் உள்ளிட்டோரும் நேரில் வந்து அஞ்சலி செலுத்திப் பெற்றோருக்கு ஆறுதல் தெரிவித்தனர்.
பின்னர் செய்தியாளர்களுக்குப் பேட்டியளித்த உதயநிதி ஸ்டாலின், "நீட் தேர்வு நிரந்தரமாக வேண்டாம், நீட் தேர்வால் ஒட்டுமொத்த மாணவர்கள் பாதிக்கப்படுகிறார்கள் என்பதால்தான் திமுக தேர்தல் அறிக்கையில் நீட் தேர்வை ரத்து செய்வோம் என்றும், இதற்கு முயற்சி எடுப்போம் என்றும் தெரிவித்து இருந்தோம்.
இதுபோல் அதிமுகவின் தேர்தல் அறிக்கையிலும் தெரிவிக்கப்பட்டு இருந்தது. நீட் தேர்வு நிராகரிக்கப்பட வேண்டும். சட்டப்பேரவையில் மீண்டும் நீட் தேர்வுக்கு எதிராக மசோதா நிறைவேற்றப்பட்டு ஒன்றிய அரசுக்கு அனுப்பி வைக்கப்பட உள்ளது. ஏற்கனவே இரண்டு முறை சட்டப்பேரவையில் மசோதா நிறைவேற்றி அனுப்பி வைக்கப்பட்டிருந்தது. ஆனால் அது நிராகரிக்கப்பட்டுள்ளது.
திமுக ஆட்சிக்கு வந்து 120 நாட்கள் தான் ஆகிறது. குறுகிய காலத்தில் சட்டப் போராட்டம் நடத்த இயலவில்லை. தமிழ்நாடு முதலமைச்சர் நல்ல முடிவை எடுப்பார். இது குறித்து சட்ட வல்லுநர்களுடன் பேசி, ஒன்றிய அரசிடம் இது குறித்து வலியுறுத்தியுள்ளனர்.
இது ஒரு மாணவரின் பிரச்சினை மட்டுமல்ல, எல்லாம் வீட்டு மாணவர்களின் பிரச்னையாகும். எல்லாம் அரசியல்வாதிகளின் குழந்தைகளும் இதனால் பாதிக்கப்படுகிறார்கள்.
எனவே தான் நீட்தேர்வு நிச்சயம் வேண்டாம் எனத் தொடர்ந்து ஒன்றிய அரசிடம் வலியுறுத்தி வருகிறோம். திமுக ஆட்சி மாணவர்களுக்குத் துணையாக இருக்கும். எனவே மாணவர்கள் அச்சப்படத் தேவையில்லை. யாரும் தற்கொலை செய்து கொள்ள வேண்டாம்" என்று தெரிவித்தார்.
