சென்னை: சேத்துபட்டில் நடைபெற்ற தமிழ்நாடு பாரத சாரண சாரணியர் இயக்கத்தின் மாநிலத்தலைவராக அன்பில் மகேஷ் பொய்யாமொழி பதவி ஏற்பு விழாவில் பேசுகையில், 'அரசுப்பள்ளி மாணவர்களுக்கான பயிற்சி, ஆசிரியர்கள் மூலம் தொடர்ந்து வழங்கப்பட்டு வருகிறது. கடந்த ஆண்டை விட இந்த ஆண்டு அதிக அளவில் மாணவர்கள் நீட் தேர்வில் தேர்ச்சி பெற்றுள்ளனர்’ என அமைச்சர் அன்பில் மகேஷ் தெரிவித்துள்ளார்.
பாரத சாரண சாரணியர் இயக்கத்தில் தலைவராகப்பொறுப்பேற்ற பின் செய்தியாளர்களிடம் பேசிய பள்ளிக்கல்வித்துறை அமைச்சர் அன்பில் மகேஷ் பொய்யாமொழி, 'தமிழ்நாடு சார்ந்த சாரணர் இயக்கத்திற்குப் போட்டியின்றி தேர்வு செய்யப்பட்டுள்ளேன் என்று கூறுகின்றனர். இனிமேல் தான் எங்களுக்கு போட்டியே இருக்கிறது. இந்த இயக்கத்தில் தற்போது 4 லட்சம் சாரண சாரணியர்கள் உள்ளனர். இதனை 10 லட்சமாக உயர்த்த வேண்டி உள்ளது. மேலும் பள்ளிகளுக்கு செல்லும்பொழுது பள்ளி சார்ந்த இயக்கம் செயல்படுகிறதா என்பது குறித்தும் ஆய்வு செய்ய உள்ளேன்.
சாரண சாரணிய இயக்கத்தில் ஏற்கெனவே 19 முகாம்கள் உள்ளன. அந்த முகாம்களை மீண்டும் நடத்த வேண்டும் என ஒரு முயற்சி உள்ளது. மாவட்ட மாநில அளவிலும் தேசிய அளவிலும் இந்த முகாம்கள் நடத்துவதற்கு நடவடிக்கைகள் எடுக்கப்பட உள்ளது.
சாரண சாரணியர் இயக்கம் உள்ளிட்டப் பிற செயல்பாடுகளை எவ்வாறு பள்ளி மாணவர்களுக்கு அளிக்கலாம் என்பது குறித்து வரும் 21ஆம் தேதி மாவட்ட முதன்மைக்கல்வி அலுவலர்களுடன் நடைபெறும் ஆலோசனைக்கூட்டத்தில் விவாதிக்க உள்ளோம். சாரண சாரணியர் இயக்கத்திற்கு முதல் முறையாக 27 லட்ச ரூபாய் அரசு நிதி ஒதுக்கி உள்ளது. மேலும் தொடர்ந்து எங்களின் செயல்பாடுகளைப் பார்த்து வரும் காலங்களில் நிதி அதிக அளவில் ஒதுக்கப்படும்.
மாநில தலைமை அலுவலகம் பொதுப்பணித்துறையின் கட்டுப்பாட்டில் உள்ள இடத்தில் இயங்கி வருகிறது. இந்த இடத்திற்கு மகாத்மா காந்தி வந்து சென்றார் என்பது வரலாறு. அந்த இடத்தில் மேலும் செயல்பாடுகளை அதிகரிப்பதற்கான அனுமதி பெறுவதற்கு முதலமைச்சரிடம் கோரிக்கை வைப்போம்.
நீட் தேர்விற்கு அரசுப்பள்ளி மாணவர்களுக்கு அரசு சார்பில் பயிற்சி வழங்கப்பட்டு வருகிறது. நீட்டிலிருந்து விலக்கு பெறுவதற்கான சட்டப்போராட்டம் தொடர்ந்து நடைபெற்று வந்தாலும், அரசுப்பள்ளி மாணவர்களுக்கான பயிற்சி ஆசிரியர் மூலம் தொடர்ந்து வழங்கப்பட்டு வருகிறது.
கடந்த ஆண்டை விட இந்த ஆண்டு அதிக அளவில் மாணவர்கள் தேர்ச்சி பெற்றுள்ளனர். இதனை அடுத்த கட்டத்திற்கு கொண்டு செல்லவும் நடவடிக்கை மேற்கொள்வோம். எலைட் எனப்படும் மார்பில் பள்ளிகள் சாதாரணக்கல்வி நிறுவனங்களில் மாணவர்கள் சேர்வதற்கு கொண்டுவரப்படவில்லை. ஐஐடி, ஐஐஎம் போன்ற கல்வி நிறுவனங்களில் மாணவர்கள் சேர்வதற்காகவே மாதிரிப்பள்ளிகள் கொண்டுவரப்பட்டுள்ளன. ஐஐடி, ஐஐஎம் போன்ற கல்வி நிறுவனங்களில் ஒற்றை இலக்கத்தில் மாணவர்கள் சேர்வதை மூன்று இலக்கமாக மாற்ற வேண்டும் என்பதற்காகவே மாதிரிப்பள்ளிகள் தொடங்கப்பட்டுள்ளது.
அரசுப்பள்ளி மாணவர்களுக்குத்தேவையான அளவு கூடுதல் பயிற்சிகள் வழங்கப்படும். கடந்த இரண்டு ஆண்டுகளாக கரோனா காலத்தில் மாணவர்கள் கற்பிப்பதில் சிரமம் ஏற்பட்டது. வருங்காலத்தில் மாணவர்களுக்குப் பயிற்சி அளித்து அதிகளவில் தேர்ச்சி பெற நடவடிக்கை மேற்கொள்ளப்படும்” எனத் தெரிவித்தார்.
இந்த நிகழ்ச்சியில் அன்பில் மகேஷ் பொய்யாமொழியோடு, மாநில ஆணையராக பள்ளிக்கல்வித்துறை ஆணையர் நந்தகுமாரும், மாநில துணைத் தலைவர்களாக தமிழ்நாடு பாடநூல் கல்வியியல் மற்றும் பணிகள் கழகத்தின் செயலாளர் கண்ணப்பன் உள்ளிட்டவர்களும் பதவி ஏற்றுக்கொண்டனர். அதனைத்தொடர்ந்து பாரத சாரண சாரணியர் இயக்கத்தில் சிறப்பாக செயல்பட்டவர்களுக்கு விருது வழங்கப்பட்டது.
இதையும் படிங்க: நீட் தேர்வில் வெற்றிபெற்ற 4 பழங்குடியின மாணவர்கள்
