குடியுரிமை திருத்தச் சட்டம்: கையெழுத்து இயக்கத்தை அறிவித்தது திமுக கூட்டணி!

சென்னை: குடியுரிமை திருத்தச் சட்டம், தேசிய குடிமக்கள் பதிவேடு, தேசிய மக்கள் தொகைப் பதிவேடு ஆகிய மூன்றையும் கண்டித்து தமிழ்நாட்டு மக்களிடம் கையெழுத்து இயக்கம் நடத்த திமுக கூட்டணிக் கட்சிகள் முடிவு செய்துள்ளன.

குடியுரிமை திருத்தச் சட்டம், தேசிய குடிமக்கள் பதிவேடு, தேசிய மக்கள் தொகைப் பதிவேடு ஆகிய மூன்று விவகாரங்கள் குறித்த அனைத்துக் கட்சிகளின் ஆலோசனைக் கூட்டம் அண்ணா அறிவாலயத்தில் இன்று நடைபெற்றது.

இதில் திமுக தலைவர் மு.க. ஸ்டாலின், கூட்டணி கட்சிகளான காங்கிரஸ், மார்க்சிஸ்ட் கம்யூனிஸ்ட் கட்சி, இந்திய கம்யூனிஸ்ட் கட்சி, மதிமுக, விடுதலைச் சிறுத்தைகள் கட்சி, ஐஜேகே, இந்திய யூனியன் முஸ்லீம் லீக், கொங்கு நாடு மக்கள் தேசியக் கட்சி உள்ளிட்ட கட்சித் தலைவர்கள் பங்கேற்றனர்.

கூட்டத்திற்குப் பின்னர் அனைத்துக் கட்சித் தலைவர்களும் கூட்டாகச் செய்தியாளர்களைச் சந்தித்துப் பேசினர். அப்போது பேசிய திமுக தலைவர் மு.க. ஸ்டாலின், ' இன்று நடைபெற்ற அனைத்துக் கட்சி கூட்டத்தில், அனைத்து மக்களையும் பாதிக்கும் குடியுரிமை திருத்தச் சட்டத்தை திரும்பப் பெற வேண்டும் என்றும், தேசிய குடிமக்கள் பதிவேடு, தேசிய மக்கள் பதிவேடு தயாரிக்க தமிழ்நாட்டில் அனுமதிக்கக் கூடாது என்றும் அரசை வலியுறுத்தி தீர்மானங்கள் நிறைவேற்றப்பட்டன' என்று தெரிவித்தார்.

குடியுரிமை திருத்தச் சட்டம் - கையெழுத்து இயக்கத்தை அறிவித்தது திமுக கூட்டணி

இம்மூன்று பிரச்னைகளிலும் மக்களிடம் ஆதரவு திரட்டும் வகையில், தமிழ்நாடு முழுவதும் மக்களைச் சந்தித்து மாபெரும் கையெழுத்து இயக்கம் தொடங்கவுள்ளதாகத் தெரிவித்த அவர், பிப்ரவரி 2ஆம் தேதி தொடங்கி 8ஆம் தேதிவரை நடைபெறக்கூடிய இக்கையெழுத்து இயக்க முடிவுகளை, குடியரசுத் தலைவரை நேரில் சந்தித்து கொடுக்கவுள்ளதாகவும் கூறினார்.

மாவட்டம், ஒன்றியம், நகரம் என அனைத்து இடங்களிலும், மதச்சார்பற்ற கூட்டணிக் கட்சி நிர்வாகிகள் மக்களை நேரடியாக சந்திக்க உள்ளனர் என்று கூறிய ஸ்டாலின், இதற்கு கட்சி சார்பற்ற இயக்கங்கள், மாணவர்கள் என அனைவரும் ஆதரவளிக்க வேண்டுமெனவும் கேட்டுக்கொண்டார்.

மேலும், காஞ்சிபுரம் அருகே பெரியார் சிலை உடைக்கப்பட்டிருப்பது கடுமையாகக் கண்டிக்கத்தக்கது என்ற திமுக தலைவர், 95 ஆண்டு காலம் சமூக நீதிக்காக போராடியவரின் சிலை உடைப்பு என்பது வேதனை தரக்கூடிய ஒன்று என்றார். இச்செயலில் ஈடுபட்ட சமூக விரோதிகளைக் காவல் துறையினர் உடனடியாகக் கைதுசெய்ய வேண்டுமெனவும் அவர் கேட்டுக்கொண்டார்.

எழுவர் விடுதலை விவகாரத்தில் உச்ச நீதிமன்றம் கேள்வி கேட்டிருப்பது மகிழ்ச்சி அளிக்கிறது என்ற மு.க. ஸ்டாலின், தற்போதாவது அதிமுக அரசு ஆளுநரைச் சந்தித்து எழுவர் விடுதலையை வலியுறுத்துமா என்றும் கேள்வி எழுப்பினார். தும்பைவிட்டு வாலைப்பிடிப்பது போல் நீட் விவகாரத்தில் நீதிமன்றம் செல்வதுபோல் தமிழ்நாடு அரசு நாடகமாடுவதாகவும் அவர் சாடினார்.

இதையும் படிங்க: ‘பாஜக கூட்டணி குறித்து தலைமைதான் முடிவு செய்யும்’ - அமைச்சர் காமராஜ்