சென்னை திரு.வி.க நகரைச் சேர்ந்தவர் உபயதுல்லா (39). இவருக்கு மனைவி நஸ்ரின் மற்றும் இரண்டு பெண் குழந்தைகள் உள்ளனர். கணவன் மனைவிக்கிடையே கருத்து வேறுபாடு காரணமாக, அடிக்கடி தகராறு ஏற்படும் எனக் கூறப்படுகிறது.
இந்நிலையில், கடந்த 2 ஆம் தேதியும் கணவன் மனைவிக்கிடையே தகராறு ஏற்பட்டு சண்டையாக மாறியுள்ளது. அப்போது, ஆத்திரமடைந்த மனைவி நஸ்ரின், அடுப்பில் சூடாக இருந்த எண்ணையை எடுத்து கணவர் மீது ஊற்றியுள்ளார். இதனால் வலி தாங்க முடியாமல் அலறிய உபயதுல்லாவின் சத்தம் கேட்டு அக்கம் பக்கத்தினர் ஓடி வந்து பார்த்தனர். அப்போது, உடல் முழுவதும் வெந்த நிலையில் அவர் உயிருக்கு போராடிக் கொண்டிருந்தார்.
உடனே, அருகில் வசிப்போர் அவரை மீட்டு கீழ்ப்பாக்கம் அரசு மருத்துவமனையில் தீவிர சிகிச்சைப்பிரிவில் அனுமதித்துள்ளனர். இதுதொடர்பாக, உடனே காவல்துறையினருக்கும் தகவல் தெரிவிக்கப்பட்டதையடுத்து, நஸ்ரின் மீது வழக்குப்பதிவு செய்து கைது செய்யப்பட்டுள்ளார். இதனிடையே, தீவிர சிகிச்சைப் பிரிவில் அனுமதிக்கப்பட்டிருந்த உபயதுல்லா நேற்று சிகிச்சை பலனின்றி உயிரிழந்தார். இதனையடுத்து, இவ்வழக்கை கொலை வழக்காக மாற்றிய காவல்துறையினர் அவரது மனைவியிடம் விசாரணை நடத்தி வருகின்றனர்.
இதையும் படிங்க: காதல் மனைவியின் நோய் போக்க போராடும் நவீன ஷாஜஹானின் சோகக்கதை!
