கரோனா தொற்று பரவலை தடுக்க சென்னையில் தளர்வுகள் இல்லாத ஊரடங்கு விதிக்கப்பட்டுள்ளது. வடசென்னை பகுதிகளில் கரோனா பரவல் அதிகரித்துக்கொண்டே இருக்கிற சூழலில் இதை கட்டுப்படுத்த அதிரடிப்படை குவிக்கப்பட்டு வடசென்னை முழுவதையும் தீவிரமாக கண்காணித்து வருகின்றனர்.
மேலும் வடசென்னை பகுதிகளில் சோதனைச் சாவடிகள் அமைத்து காரணமில்லாமல் வெளியே சுற்றும் வாகன ஓட்டிகளை காவல் துறையினர் எச்சரித்தும் அவர்கள் வாகனத்தை பறிமுதல் செய்தும் வீட்டிற்கு அனுப்பி வைத்தனர்.
வண்ணாரப்பேட்டை காவல் துறையினர் தங்க சாலையில் சோதனைச் சாவடி அமைத்து காரணமில்லாமல் சுற்றித்திரியும் வாகனங்களை பறிமுதல் செய்துவருகின்றனர். இதனால் அங்கு பறிமுதல் செய்யப்பட்ட வாகனங்களின் எண்ணிக்கை அதிகரித்துவருகிறது.
