சத்தீஸ்கர்: ராய்ப்பூரில் 'அமர் ஜவான் ஜோதி' திட்டத்திற்கு காங்கிரஸ் தலைவர் ராகுல் காந்தி, பிப்ரவரி 3ஆம் தேதி அடிக்கல் நாட்டுவார் என்று அம்மாநில முதலமைச்சர் பூபேஷ் பாகேல் நேற்று (ஜன 29) அறிவித்தார்.
இது குறித்து, பூபேஷ் பாகல் நேற்று (ஜன 29) தனது ட்விட்டர் பக்கத்தில், “பல தலைமுறைகளுக்கு இந்திய வீரர்கள் போரில் மரணம் அடைந்த தியாக வரலாறுகள் உத்வேகம் அளித்து வருகின்றன. ஆனால் நாட்டுக்காகப் போரிடாதோருக்கு இது பற்றி எதுவும் தெரியாது.
சத்தீஸ்கரில் ராணுவ வீரர்களின் தியாகத்தைப் போற்றும் வகையில் அமர் ஜவான் ஜோதி அமைக்கப்பட உள்ளது. வரும் பிப்ரவரி 3ஆம் தேதி அன்று சத்தீஸ்கர் மாநிலத்தில் அமைய உள்ள இந்த அமர் ஜவான் ஜோதிக்கு காங்கிரஸ் தலைவர் ராகுல் காந்தி அடிக்கல் நாட்டுவார்” எனப் பதிவிட்டிருந்தார்.
மேலும் இது தொடர்பாக பாகல் வெளியிட்டிருந்த அறிக்கையில், “அமர் ஜவான் ஜோதி 4ஆவது பட்டாலியன், சத்தீஸ்கர் ஆயுதப்படை மானா, ராய்ப்பூர் வளாகத்தில் கட்டப்படும். தியாகிகளின் நினைவாக சத்தீஸ்கர் அமர் ஜவான் ஜோதி தீபம் தொடர்ந்து ஏற்றப்படும். பிப்ரவரி 3ஆம் தேதி நினைவிடத்துக்கான பூமி பூஜை விழா நடைபெறவுள்ளது.
காங்கிரஸ் கட்சிக்கு தியாக வரலாறு உண்டு. தேச சேவைக்காக தங்கள் அனைத்தையும் தியாகம் செய்த பல தலைசிறந்த தலைவர்கள் உள்ளனர். தியாகங்களை எப்படி மதிக்க வேண்டும் என்பது கட்சிக்கு தெரியும். தியாகிகளை மதிக்காத எந்த சமூகமும் இல்லை என்பதற்கு நமது சாட்சி எடுத்துக்காட்டாக உள்ளது.
1972 ஆம் ஆண்டு, இந்தியாவின் முதல் பெண் பிரதமர் இந்திரா காந்தி, டெல்லியில், வீரமரணம் அடைந்த வீர வீரர்களை போற்றும் வகையில், அமர்ஜவான் ஜோதியை ஏற்றி வைத்தார். ஆனால் ஜோதியை ஏற்றும் இடத்தினை மத்திய அரசு மாற்றியது. இந்தியா கேட்டில் அமர் ஜவான் ஜோதியின் நித்திய சுடர் பார்வையாளர்களுக்குத் தெரிந்தது மற்றும் நாட்டின் தியாகிகளுக்கு பெருமை மற்றும் நன்றியுணர்வை ஏற்படுத்தியது.
அமர் ஜவான் ஜோதியை இடமாற்றம் செய்யும் மத்திய அரசின் நடவடிக்கை குறித்து அதிருப்தி அடைந்தேன். இது எனது உணர்வுகளை புண்படுத்தியுள்ளது. ஆனால் இப்போது சத்தீஸ்கர் அமர் ஜவான் ஜோதியின் சுடர் ராய்ப்பூரில் உள்ள தியாகிகளின் நினைவாக ஏற்றப்படும்.
சீருடை அணிந்து நாட்டிற்காக உயிர் தியாகம் செய்த சத்தீஸ்கர் மகன்களின் தியாகத்தையும், சத்தீஸ்கரில் உயிர் தியாகம் செய்த நாட்டின் துணிச்சலான நெஞ்சங்களையும் ‘சத்தீஸ்கர் அமர் ஜவான் ஜோதி’ மூலம் போற்றுவோம்.
சத்தீஸ்கரில் உள்ள அமர் ஜவான் ஜோதியில் தியாகிகளின் பெயர்கள், நினைவு கோபுரம் மற்றும் விவிஐபி தளம் ஆகியவையும் அமைக்கப்படும். பிரவுன் மார்பிள் கற்களால் தியாகிகளின் பெயர்கள் பொறிக்கப்பட்ட சுவர் கட்டப்படும். இந்த பிறை வடிவ சுவர் சுமார் 25 அடி உயரத்தில் சுமார் 100 அடி நீளமும், இந்த சுவரின் தடிமன் 3 அடியும் இருக்கும்.
நினைவு கோபுரம் மணற்கல், பழுப்பு வெள்ளை பளிங்கு கிரானைட் ஆகியவற்றால் பிறை வடிவ சுவரின் முன் அமைக்கப்படும். அதன் மேல் ஒரு நினைவுச் சின்னம் வைக்கப்படும். நினைவுக் கோபுரத்தின் முன் தளத்தில் துப்பாக்கி மற்றும் ஹெல்மெட் அடையாள வடிவில் இருக்கும். நிலத்தடி குழாய்கள் மூலம் எரிபொருள் விநியோகம் மூலம் 24 மணி நேரமும் பற்றவைக்கப்படும் இந்தச் சின்னத்தின் முன் சத்தீஸ்கர் அமர் ஜவான் ஜோதி சுடர் ஏற்றப்படும்.
நினைவு கோபுரத்திற்கு சற்று முன்புறம் கோட்டை போன்ற இரண்டு மாடி கட்டடம் கட்டப்படும். இதன் அடிப்பகுதியின் நீளம் 150 அடியாகவும், அகலம் 90 அடியாகவும் இருக்கும். இந்த கட்டிடத்தின் உயரம் 40 அடி இருக்கும். சத்தீஸ்கர் அமர் ஜவான் ஜோதி விரைவில் நாட்டிற்கு பெருமை சேர்க்கும் இடமாக அமையும்” எனத் தெரிவித்துள்ளார்.
