இந்திய விமான போக்குவரத்துத் துறையில் ஒரு காலத்தில் கோலோச்சிய ஏர் இந்தியா நிறுவனம், தற்போது வர்த்தகச் சரிவின் காரணமாக பெரும் வீழ்ச்சியைக் கண்டுள்ளது. ஏறத்தாழ 90,000 கோடி ரூபாய் கடனில் சிக்கித்தவிக்கும் அந்நிறுவனத்தை விற்பனைசெய்ய பலமுறை ஏல விண்ணப்பங்கள் கோரப்பட்டும் யாரும் முன்வரவில்லை என அறியமுடிகிறது.
இதனிடையே, அந்நிறுவனத்தைக் கைப்பற்ற டாடா குழுமம் உள்ளிட்ட பல்வேறு நிறுவனங்கள் தற்போது போட்டியிட்டுவருகின்றன. இந்நிலையில், இந்நிறுவனத்தைக் கைப்பற்றும் முயற்சியில் ஏர் இந்தியாவின் ஊழியர்களில் ஒரு குழு திட்டமிட்டுவருவதாக அறியமுடிகிறது. தனியார் நிறுவனங்களுடன் சேர்ந்து ஏலத்தில் கலந்துகொள்ளவுள்ள ஏர் இந்தியா ஊழியர்களின் குழுவுக்கு, அதன் வணிக இயக்குநர் மீனாட்சி மல்லிக் வழிகாட்டிவருகிறார்.
ஒரு ஊழியர் 1 லட்சம் ரூபாய் முதலீடு என்ற முடிவின்படி, ஊழியர்கள் குழு பணத்தைத் திரட்ட உள்ளது. இத்திட்டத்தின்படி, ஏர் இந்தியா ஊழியர்கள் 51% பங்குகளைக் கைப்பற்ற வேண்டும் என முடிவுசெய்யப்பட்டுள்ளது. ஏர் இந்தியா ஊழியர்கள் 51% பங்குகளை வைத்திருந்தால், அதன் மீதான அதிகாரம் அவர்களிடமே நீடித்திருக்கும்.
மீதமுள்ள 49% பங்குகளை தனியார் முதலீட்டு நிறுவனம் நிர்வாகம் செய்யலாம்.
முதற்கட்டமாக ஏர் இந்தியா நிறுவனத்தைக் கைப்பற்ற முதலில் விருப்ப விண்ணப்பம் கொடுக்கும், முதற்கட்டத்தை வெற்றியடைந்த பின்பு ஊழியர்கள் மற்றும் பிற தனியார் முதலீட்டு நிறுவனங்களிடமிருந்து பணம் திரட்டப்படும்.
இதேவேளையில் டாடா விமான போக்குவரத்து குழுமம் - சிங்கப்பூர் ஏர்லைன்ஸ் கூட்டணியானது விஸ்தாரா நிறுவனத்தின் வாயிலாக ஏர் இந்தியாவைக் கைப்பற்றும் முயற்சியில் ஈடுபட்டுவருவது குறிப்பிடத்தக்கது.
இதையும் படிங்க : விஜய் மல்லையாவின் ரூ.14 கோடி சொத்து பிரான்ஸ் நாட்டில் பறிமுதல்!
