காஷ்மீர்: வடக்கு காஷ்மீரின் குப்வாரா மாவட்டத்தில் எல்லையை மீறி இரண்டு பயங்கரவாதிகள் ஊடுருவ முயன்றனர். இதனைக் கண்ட ராணுவ வீரர்கள் மற்றும் காவல் துறையினர் இணைந்து பயங்கரவாதிகளை சுட்டுக் கொன்றனர். இதனைத் தொடர்ந்து, ஹந்த்வாரா - நாவ்கான் மாநில நெடுஞ்சாலையில் அருகே உள்ள பத்புரா கிராமத்தில் மோட்டார் ஷெல் என்று கூறப்படும் வெடிபொருள் மீட்கப்பட்டது.
முன்னதாக, மே 3 ஆம் தேதி, வடக்கு காஷ்மீரின் குப்வாரா மாவட்டத்திலுள்ள மச்சில் செக்டாரின் பிஞ்சாட் என்னும் பகுதியில் பயங்கரவாதிகளுக்கும், பாதுகாப்பு படையினருக்கும் இடையே நடந்த துப்பாக்கிச் சூட்டில் இரண்டு பயங்கரவாதிகள் கொல்லப்பட்டனர்.
இதனால், தொடர்ந்து அந்த பகுதியில் பாதுகாப்பு படையினர் தீவிர தேடுதல் வேட்டையில் ஈடுபட்டு வந்த நிலையில் தற்போது எல்லை மீறி ஊருக்குள் ஊடுருவ முயன்ற இரண்டு பயங்கரவாதிகள் சுட்டுக் கொல்லப்பட்டுள்ளனர்.
இது குறித்து காவல் துறை செய்தி தொடர்பாளர் வெளியிட்டுள்ள ட்விட்டரில், “ராணுவ வீரர்களும் காவல் துறையினரும் இணைந்து நடத்திய கூட்டு நடவடிக்கையில், குப்வாரா எல்லை பகுதிக்குள் ஊடுருவ முயன்ற இரண்டு பயங்கரவாதிகள் சுட்டுக்கொல்லைப்பட்டனர்” என குறிப்பிட்டுள்ளார்.
இதையும் படிங்க: பெண் பயணியிடம் அநாகரீகமாக நடந்து கொண்ட ஓட்டுநர்.. பெங்களூருவில் நடந்தது என்ன?
