’பொழுது விடிந்தால் புதுப்புது பொய்களை அவிழ்த்து விடும் முதலமைச்சர் பழனிசாமி’

செய்த ஊழல்களுக்காக தமிழக மக்களிடம் மன்னிப்புக் கேட்டு விட்டு ஓய்வு எடுத்துக் கொள்வதற்கு பதில், மேடை தோறும் முதலமைச்சர் பொய்யும் புரட்டுகளையும் உளறிக் கொட்டுவதாக திமுக துணைப் பொதுச்செயலாளர் பொன்முடி கண்டனம் தெரிவித்துள்ளார்.

இது தொடர்பாக அவர் இன்று வெளியிட்டுள்ள கண்டன அறிக்கையில், ”விவசாயிகளின் கடன்களை தள்ளுபடி செய்ய முடியாது என்று உச்ச நீதிமன்றத்திற்கே சென்று தடை வாங்கிய முதலமைச்சர் பழனிசாமி, பிரச்சாரம் என்ற பெயரில், பச்சைப் பொய்களை, கட்டுக்கதைகளை அவிழ்த்து விடுகிறார். இலவச மின்சாரம் கேட்டுப் போராடிய விவசாயிகள் மீது துப்பாக்கிச்சூடு நடத்தி, கொத்துக் கொத்தாக கைது செய்தது அ.தி.மு.க. ஆட்சி. ஆனால் விவசாயிகள் மீது தி.மு.க. துப்பாக்கிச் சூடு நடத்தியதாக அப்பட்டமாக கோயபல்ஸ் பிரச்சாரத்தை பழனிசாமி தொடங்கியிருக்கிறார். விவசாயிகளுக்காக போராடிய பேராசிரியர் மீது தேசிய பாதுகாப்புச் சட்டத்தில் கைது செய்து, ஹைட்ரோ கார்பன் திட்டத்திற்காக போராடிய சேலம் மாணவி வளர்மதி மீது குண்டர் சட்டத்தைப் பாய்ச்சி மகிழ்ந்த பழனிசாமி, தி.மு.க.வை நோக்கி சுண்டு விரலை நீட்டக் கூட தகுதியில்லை.

கரோனாவில் விவசாயிகள் அவதிப்பட்ட போது, 5,000 ரூபாய் கொடுக்க மறுத்து, இலவச மின்சாரத்தை ரத்து செய்யும் ’உதய்’ திட்டத்திற்கு கையெழுத்துப் போட்ட ஆட்சி அ.தி.மு.க. ஆட்சி. விவசாயிகளுக்கு குறைந்தபட்ச ஆதார விலை இல்லை என்று கைவிரிக்கும் மூன்று வேளாண் சட்டங்களுக்கு கைதூக்கி, ஆதரவளித்து வாக்களித்து விட்டு, இன்று விவசாயிகள் முன்பு நின்று மனசாட்சியின்றி நாடகமாடுபவர் பழனிசாமி. இப்போது கூட விவசாயிகளுக்குக் கடன் தள்ளுபடி, எங்கள் தலைவர் வாக்குறுதியளித்த பிறகு நடந்ததே தவிர, அதற்கு முன்பு வரை கடனைத் தள்ளுபடி செய்ய முடியாது என்றவர்தான் இவர்.

முதலமைச்சர் பழனிசாமிக்கு இன்றுள்ள ஒரே சிந்தனை, பொழுது விடிந்தால் தி.மு.க. மீது என்ன பொய் சொல்வது? அ.தி.மு.க. சாதித்தது என்று எந்த பொய்யைச் சொல்வது என்பது தான். நான்கு ஆண்டுகளாக வெறும் டெண்டர் கொள்ளை, ஊழல், கமிஷன், கரெப்ஷன், கலெக்ஷனுக்காக ஆட்சி நடத்தும் முதலமைச்சர் பழனிசாமிக்கு விவசாயிகளுக்கு தி.மு.க. செய்த சாதனைகளையோ, ஈழத் தமிழருக்கும், பேரறிவாளன் உள்ளிட்ட ஏழு பேர் விடுதலைக்காக ஆற்றிய பணிகளையோ குறை கூற துளி கூட அருகதை இல்லை.

ஆகவே, ’என்னால் இயலவில்லை. பதவி சுகமும், ஊழலில் மலை போல் குவிந்திருக்கும் கரன்சிகளும் என் கண்களை மறைக்கிறது. இன்னும் மூன்று மாதங்களுக்கு என்னை விட்டு விடுங்கள் ப்ளீஸ்’ என்று கைகூப்பி தமிழக மக்களிடம் மன்னிப்புக் கேட்டு விட்டு, ஓய்வு எடுத்துக் கொள்வதற்குப் பதில், தான் ஏதோ தமிழகத்தின் தனிப்பெருந்தலைவர் என்று நினைத்துக் கொண்டு எங்கள் தலைவரை விவாதத்திற்கு அழைப்பதோடு, மேடை தோறும் பொய்யும் புரட்டுகளையும் உளறிக் கொட்டிவருகிறார்” என்று கடுமையாக விமர்சித்துள்ளார்.

இதையும் படிங்க: பெட்ரோல், டீசல் விலையை குறைக்க மத்திய அரசு தயாராக இல்லை- கே.எஸ்.அழகிரி