புதுச்சேரி சுகாதாரத் துறை அமைச்சர் மல்லாடி கிருஷ்ணாராவ் நேற்று பேட்டி அளித்தபோது, துணைநிலை ஆளுநர் தன்னிச்சையாக முடிவெடுத்து அலுவலர்களுக்கு உத்தரவிட்டு குழப்பத்தை உருவாக்கிவருகிறார் எனத் தெரிவித்திருந்தார். இதற்குப் புதுச்சேரி துணைநிலை ஆளுநர் கிரண்பேடி வெளியிட்டுள்ள வாட்ஸ்அப் பதிவில் கூறியிருப்பதாவது:
அறிவார்ந்த செயல்பாடுகளுடன் கரோனா பாதிப்புகளைக் குறைப்பதற்கு நிர்வாகத்திற்கு தற்போதைய தேவை ஒருங்கிணைந்த ஒத்துழைப்புடன்கூடிய பங்களிப்பு, தொற்று குறைவதற்காகச் செய்யப்படும் செயல்பாடுகள் போன்றதாகும்.
அனைவரும் ஒருங்கிணைந்த செயல்பாடுகளுடன் ஈடுபட்டு மக்களுக்கு பாதுகாப்பு வழங்குவதையும், பாதிக்கப்பட்டவர்களின் உயிர்களைக் காப்பாற்றுவதையும் நம்முடைய குறிக்கோளாக கொள்ள வேண்டும்.
கரோனா பரவலைக் கட்டுப்படுத்துவதில் உள்ள சவால்களைப் பற்றியும் அந்தச் சவால்களை எதிர்கொள்வதைப் பற்றிய சுருக்கமான செய்திகள், சிறந்த நோய் எதிர்ப்பு சக்தி மருந்துகள், பாதுகாப்பான முறைகள் பற்றி மக்களிடம் தெரிவிக்கின்றோம்.
அதற்கு மக்கள் எவ்வாறு ஒத்துழைக்கின்றனர் என்பது பற்றியும், நிர்வாகச் செயல்பாடுகளை எவ்வாறு மேம்படுத்த முடியும் என்பது பற்றியும் ஆலோசித்துவருகிறோம். இதன் மூலமாக கோவிட் பரவுவதைக் கட்டுப்படுத்துவதற்கு வாய்ப்பு இருப்பதாகக் கருதுகிறோம்.
நாங்கள் உங்களுடைய நிர்வாகம் சார்ந்து போட்டியிடவில்லை. மாறாக, உங்களுடன் ஒத்துழைப்புடன் செயல்பட்டு கரோனா பரவலைக் கட்டுப்படுத்துவதற்கான பொதுவான நோக்கத்திற்காக உழைக்கிறோம். புதுச்சேரி மக்களின் நல்வாழ்வு, பாதுகாப்பு இன்றியமையாதது ஆகும்.
கரோனா பரவலைக் கட்டுப்படுத்துவதற்கு எடுக்கப்படுகிற அனைத்து முயற்சிகளையும் துணைநிலை ஆளுநர் அலுவலகம் வரவேற்கிறது. எங்களுடைய நோக்கங்களைச் சந்தேகிக்க தேவை இல்லை. ஒவ்வொருவருடைய மதிப்புமிக்க பங்களிப்பையும் ஆளுநர் மாளிகை மதிக்கிறது என்பதைப் புரிந்துகொண்டு பாராட்ட வேண்டும். கரோனா மனிதர்களுடைய எதிரி. இதைக் கட்டுப்படுத்த ஒருங்கிணைந்த பொறுப்புடன் செயல்படுவோம்.
இவ்வாறு அவர் தெரிவித்துள்ளார்.
