புதுச்சேரி மக்களவைத் தொகுதியில் காங்கிரஸ் கட்சி சார்பில் போட்டியிடும் வேட்பாளர் முன்னாள் சபாநாயகர் வைத்திலிங்கத்தை ஆதரித்து புதுச்சேரி ராஜீவ் காந்தி சிலை அருகே உள்ள மைதானத்தில் நடைபெற்ற பரப்புரை பொதுக் கூட்டத்தில் திமுக தலைவர் ஸ்டாலின் பங்கேற்றார்.
கூட்டத்தில் மு.க.ஸ்டாலின் பேசியதாவது,
புதுச்சேரிக்கு மாநில அந்தஸ்து பெற்றுத் தருகிறேன் என்று வாக்குறுதி அளித்து கடந்தமுறை மக்களவைத் தேர்தலில் வெற்றிபெற்ற என்ஆர் காங்கிரஸ், ஏன் அதை செய்யவில்லை. புதுச்சேரிக்கு மாநில அந்தஸ்து கேட்டது முதன் முதலில் திமுகதான். இந்தியாவிற்கு பிரதமர் மோடி, தமிழ்நாட்டிற்கு எடப்பாடி பழனிசாமி, புதுச்சேரிக்கு கிரண்பேடி என மூன்று பேரும் மக்களுக்கு தொல்லை கொடுத்துக் கொண்டிருக்கிறார்கள்.
தமிழ்நாடு ஆளுநர் தனியாக ஒரு ஆட்சி செய்து கொண்டிருக்கிறார். அதை தட்டிக்கேட்க எடப்பாடிக்கு தைரியம் இல்லை. ஆனால் புதுச்சேரியில் ஆளுநர் கிரண்பேடி அராஜகத்தை முதலமைச்சர் நாராயணசாமி எதிர்த்துப் போராடிக் கொண்டிருக்கிறார். புதுச்சேரிக்கு மாநில அந்தஸ்து வழங்கப்படும் என்று கூறிய ராகுல்காந்திதான் அடுத்த பிரதமர். அதனால், புதுச்சேரிக்கு மாநில அந்தஸ்து கிடைப்பது நிச்சயம், என்றார்.
பொதுக்கூட்டத்தில் முதல் அமைச்சர் நாராயணசாமி மாநில காங்கிரஸ் கட்சி தலைவர் நமச்சிவாயம், காங்கிரஸ் கட்சி மேலிட பார்வையாளர் சஞ்சய் தத் மற்றும் கூட்டணி கட்சித் தலைவர்கள் பங்கேற்றனர்.
