புதுச்சேரி என்றாலே மது என்ற வார்த்தையும் இணைந்து பேசப்படுகிறது. அந்தளவிற்கு புதுச்சேரிக்கும், மது விற்பனைக்கும் நீண்ட நெடிய தொடர்புண்டு. மற்ற மாநிலங்களைக் காட்டிலும் வெளிநாடு, உள்நாடு உள்ளிட்ட 800 வகைளான மதுபானங்கள் சற்று குறைந்த விலையில் கிடைப்பதே, இந்தப் பெயருக்குக் காரணம். ஆனால், கரோனா ஊரடங்கினால் இந்த நிலை முற்றிலும் மாறி, தமிழ்நாட்டைக் காட்டிலும் விலை உயர்ந்து விற்பனை செய்யப்பட்டு வருகிறது. இதனால், புதுச்சேரியில் மதுபானங்கள் விற்பனை கடுமையாக சரிந்துள்ளது.
இது குறித்து பெயர் சொல்ல விரும்பாத கலால் துறை அலுவலர் ஒருவர் கூறுகையில், 'கோவிட் வரி விதிப்பால் விற்பனை தொடங்கப்பட்ட முதல் நாளில் புதுச்சேரி, காரைக்காலைச் சேர்த்து மொத்தம் 3 கோடிய 83 லட்சம் ரூபாய்க்கு மதுபானம் விற்பனையாகியது. அதுவே, இரண்டாம் நாளில் இந்த இரண்டு பிராந்தியங்களையும் சேர்த்தே 1 கோடியே 35 லட்சம் ரூபாய்க்கு தான் மதுபானங்கள் விற்பனையாகின. இது நாளுக்கு நாள் குறைவாகவே, அரசுக்கு வரி வருவாய் வந்துள்ளது' என புள்ளி விவரத்தைக் கூறினார்.
சுற்றுலாப்பயணிகளின் வருகை தளர்வு அளித்தும்; தங்கும் விடுதிகள் திறக்க, மதுபாரில் மதுஅருந்த அனுமதி அளிக்கப்படாததால் விற்பனை குறைந்தது அரசுக்கு வரவேண்டிய வருவாயை குறைத்துள்ளது.
இது குறித்து எப்.எல்.டு ஒயின்ஸின் தலைவர் சுதாகர் கூறுகையில், 'புதுச்சேரியில் கிட்டத்தட்ட 350 மதுபானக் கடைகள் உள்ளன. மதுபானக் கடைகளை புதுப்பிக்க ஆண்டிற்கு ரூ.10 லட்சம் கட்டணம் செலுத்தி வருகிறோம். புதுவை மாநிலத்தில் 15 முதல் 60 வயது வரை, 70 விழுக்காடு பேர் மது அருந்துவார்கள். 30 விழுக்காடு நபர்கள் மதுபானங்களை மொத்தமாக வீட்டிற்கு வாங்கிச் சென்று குடிப்பார்கள்.
புதுச்சேரியில் வெளிமாநில மக்களை வைத்து தான் மது உள்ளிட்ட பெரும்பாலான வியாபாரங்கள், தொழில்கள் நடக்கின்றன. கரோனா காலத்திற்கு முன்பு மதுபானங்கள் நாளொன்றுக்கு 75 விழுக்காடு விற்பனையாகும். சனி, ஞாயிறு தினங்களில் 100 விழுக்காடு விற்பனையாகும். தற்போது 30லிருந்து 35 விழுக்காடு மட்டுமே விற்பனை நடைபெறுகிறது' என்றார்.
மேலும், இது குறித்து புதுச்சேரி மாநில மார்க்சிஸ்ட் லெனினிஸ்ட்(எம்.எல் ) கட்சியின் மாநிலச் செயலாளர் சோ. பாலகிருஷ்ணன் கூறுகையில், 'புதுச்சேரி மாநிலத்தில் மதுபானக் கடைகள் மீண்டும் திறக்கப்படுவது அவசியமற்றது. இந்த நெருக்கடியான காலத்தில், மதுபான விலையை அரசு உயர்த்தியுள்ளது. சாமானிய தொழிலாளர்கள் இந்த வரி விதிப்பினால் குடும்ப நெருக்கடியை சந்திக்க வேண்டிய நிலை ஏற்பட்டுள்ளது.
கரோனா நேரத்தில் பொதுமக்களின் உடல் ஆரோக்கியம் தான் முக்கியம். எனவே, அரசு தற்காலிகமாக மதுபானக்கடைகள் அனைத்தையும் மூடுவது என்பது பொதுமக்கள் நலன் கருதி செய்வது சிறப்பானதாக இருக்கும். புதுச்சேரியில் அனைத்து மதுக்கடைகளையும் நிரந்தரமாக மூட வேண்டும் என்ற விஷயத்தில் உறுதியாக நின்று மக்கள் மத்தியில் எங்கள் கட்சி சார்பில் பரப்புரை செய்து வருகிறோம்' என்றார்.
ஆட்டோ ஓட்டுநர் லிபாகரன் கூறுகையில், 'மதுபானங்களுக்கு கரோனா வரி உயர்த்தியுள்ளனர். இதற்கு மதுபானக் கடைகளை மொத்தமாக மூடிவிடுங்கள் பரவாயில்லை. கடையைத் திறந்து மது விலையை ஏற்றி, பிறகு அந்த வருமானத்தில் இலவச அரிசி கொடுக்கிறீர்கள். எதற்காக? என தனது ஆதங்கத்தை வெளிப்படுத்தினார்.
புதுச்சேரி கடந்த 15 ஆண்டுகளுக்கு முன் மத்திய அரசின் செல்லப்பிள்ளையாக விளங்கியது. அதனால் மாநிலத்துக்கு 75 விழுக்காடு மத்திய அரசு நிதியில் தங்கு தடையின்றி செயல்பட்டு வந்தது. தற்போது மாநில அரசின் 74 விழுக்காடு நிதியிலும்; மத்திய அரசின் 26 விழுக்காடு நிதியிலும் புதுச்சேரி அரசு இயங்கி வருவதால் மாநில வருவாய் குறைந்துள்ளது.
மேலும் மாநில வருவாய்க்கு தொழிற்சாலைகள் உற்பத்தி நிறுவனங்கள் இல்லாததால் சுற்றுலாவை நம்பி மட்டுமே இருக்கும் புதுச்சேரி, கரோனா காலத்தில் பெரும்பொருளாதார பின்னடைவை சந்தித்துள்ளனர் என பொருளாதார நோக்கர்கள் கருதுகின்றனர்.
இதையும் படிங்க: நடப்பாண்டில் மொத்த வரி வருவாய் 22.5% சரிவு
