ஜனநாயகக் கடமையாற்றிய ராகுல்!

டெல்லி: டெல்லியில் உள்ள வாக்குச்சாவடி மையங்களில் காங்கிரஸ் தலைவர் ராகுல்காந்தி, டெல்லி முதலமைச்சர் அரவிந்த் கெஜ்ரிவால் ஆகியோர் தங்களது வாக்கினை செலுத்தினர்.

17ஆவது மக்களவைத் தேர்தல் ஏழு கட்டங்களாக நடைபெறுகிறது. இதில், பிகார், ஹரியானா, மத்தியப் பிரதேசம், உத்தரப் பிரதேசம், மேற்கு வங்கம், டெல்லி ஆகிய மாநிலங்களில் இன்று ஆறாம் கட்ட வாக்குப்பதிவு நடைபெற்றுவருகிறது. காலை முதல் முக்கிய அரசியல் கட்சித் தலைவர்கள், பிரமுகர்கள், சினிமா பிரபலங்கள், தங்களுடைய ஜனநாயகக் கடமையை ஆற்றி வருகின்றனர்.

இதில் ஒரு பகுதியாக, காங்கிரஸ் கட்சியின் தலைவர் ராகுல்காந்தி, அவுரங்கசெப் மார்க்கத்தில் உள்ள பள்ளியில் வாக்களித்தார். வெளியே வந்த அவர் செய்தியாளர்களிடம் கூறுகையில், பணம் மதிப்பிழப்பு, விவசாய பிரச்னை, ரஃபேல் ஊழல் ஆகியவை இத்தேர்தல் முடிவில் எதிரொலிக்கும். தேர்தல் பரப்புரையின்போது வெறுப்பை மட்டுமே மோடி வெளிப்படுத்தினார். நான் அன்பை மட்டுமே வெளிப்படுத்தினேன். அன்பு ஜெயிக்கும் என்கிற எனக்கு நம்பிக்கை உள்ளது" என்றார்.

இதே வாக்குச்சாவடியில், மத்திய வெளியுறவுத் துறை அமைச்சர் சுஷ்மா சுவராஜ் வாக்களித்தார். டெல்லி முதலமைச்சர் அரவிந்த் கெஜ்ரிவால், டெல்லியில் உள்ள சிவில் லைனில் உள்ள வாக்குச் சாவடியில் வாக்களித்தார்.