மதுரை: மதுரை நாடாளுமன்றத் தேர்தலில் மக்கள் எதிர்பார்த்தது போலவே திமுக கூட்டணியில் அங்கம் வகித்த மார்க்சிஸ்ட் கம்யூனிஸ்ட் கட்சியின் வேட்பாளர் சு.வெங்கடேசன் வெற்றி பெற்றுள்ளார். தேர்தல் பரப்புரையின்போதே 2 லட்சம் வாக்குகள் வித்தியாசத்தில் வெற்றி பெறுவேன் என்று அவர் தெரிவித்திருந்த நிலையில், சுமார் 2,09,409 வாக்குகள் வித்தியாசத்தில் தனக்கு அடுத்தபடியாக வந்த பாஜக வேட்பாளர் ராம.சீனிவாசனை வீழ்த்தியிருக்கிறார்.
சு.வெங்கடேசனின் வெற்றி சாத்தியமானது எப்படி?: மதுரை நாடாளுமன்றத் தொகுதிக்கு உட்பட்ட மேலூர், மதுரை கிழக்கு, மதுரை மேற்கு, மதுரை வடக்கு, மதுரை தெற்கு மற்றும் மதுரை மத்தி ஆகிய சட்டமன்றத் தொகுதிகளில் அந்தந்த பகுதி வாக்காளர்களை மையப்படுத்தி தனது தொகுதி மேம்பாட்டு நிதியைத் திட்டமிட்டு செலவு செய்தார் என்றும், இதில் எந்தவித விமர்சனங்களுக்கும் இடம் தராமல் தொகுதி நிதி முழுவதுமாக சென்று சேருவதற்கு இவரது கவனமும் அக்கறையும் கூடுதலாக இருந்தது என்றும் மதுரை வட்டாரத்தில் உள்ள பெரும்பான்மையான மக்கள் கூறுகின்றனர்.
கடந்த 17-ஆவது நாடாளுமன்றத் தேர்தலின்போது இடம் பெற்ற அதே கூட்டணிக் கட்சிகளின் பலத்தோடு, கூடுதலாக மக்கள் நீதி மய்யம் உள்ளிட்ட சில கட்சிகளின் வருகை திமுக கூட்டணியை இந்த முறை மேலும் பலப்படுத்தியது. மேலும், முக்கியக் கட்சிகள் அனைத்தும் திமுக கூட்டணியில் இடம் பெற்ற காரணத்தால், இவர்களது பரப்புரை பலமும் சு.வெங்கடேசனுக்கு கூடுதல் பலமாக மாறியுள்ளது.
அதிமுக வாக்கு சதவிகித இழப்பு: அதிமுக சார்பாக வேட்பாளராகக் களமிறக்கப்பட்ட டாக்டர்.சரவணன், தொகுதியில் நன்கு அறிமுகமானவர் என்றாலும், திமுக, மதிமுக, பாஜக, அதிமுக என பல கட்சிகள் மாறியவர் என்ற முத்திரையும் விமர்சனமும் இருந்தது. ஆனாலும், முக்குலத்தோர் சமூகத்தினர் அதிகமாக உள்ள மதுரை நாடாளுமன்றத் தொகுதியில் அதிமுகவுக்கு பொதுவாக செல்வாக்கு இருக்கும். இந்த சூழலில், எடப்பாடி பழனிசாமி ஆட்சிப் பொறுப்பில் இருந்தபோது, வன்னியர் சமூகத்தினருக்கு வழங்கிய 10.5 விழுக்காடு இட ஒதுக்கீடு, அந்த ஆதரவு நிலையில் சலசலப்பை ஏற்படுத்தியிருந்ததாகக் கூறப்படுகிறது.
இதுமட்டும் அல்லாது, அதிமுக தற்போது பிளவுபட்டு டிடிவி தினகரனின் அமமுக, ஓபிஎஸ் அணி என பிரிந்து நின்றதும் அக்கட்சிக்குப் பெரும் பின்னடைவை ஏற்படுத்தியுள்ளது. இந்தக் குழப்பம் காரணமாக அதிமுகவுக்கு கிடைக்கவேண்டிய வாக்குகள் பாஜக வேட்பாளர் ராம.சீனிவாசனுக்கு சென்றதால், அதிமுக வேட்பாளர் சரவணன் 3வது இடத்திற்கு தள்ளப்பட்டுள்ளார்.
மதுரை நாடாளுமன்றத் தொகுதியின் அதிமுக பொறுப்பாளராக முன்னாள் அமைச்சர் செல்லூர் ராஜூவும் அவருடன் இணைந்து அதிமுக முன்னாள் அமைச்சர் உதயகுமார், சட்டமன்ற உறுப்பினர் ராஜன் செல்லப்பா ஆகியோரும் களப்பணிகளை மேற்கொண்டனர் என்றபோதும், அதிமுக இந்த முறை கணிசமான தனது வாக்கு சதவிகிதத்தை இழந்திருக்கிறது.
2019 நாடாளுமன்றத் தேர்தல்: கடந்த 2019-ஆம் ஆண்டு நடைபெற்ற நாடாளுமன்றத் தேர்தலில் சு.வெங்கடேசன் 4,47,075 வாக்குகள் பெற்றிருந்தார். அவருக்கு அடுத்தபடியாக அதிமுக சார்பாகப் போட்டியிட்ட வி.வி.ஆர்.ராஜ் சத்யன் 3,07,680 வாக்குகள் பெற்றிருந்தார். ஆனால், இந்த முறை சு.வெங்கடேசன் 4,30,323 வாக்குகள் பெற்றிருந்த நிலையில், அவருக்கு அடுத்தபடியாக பாஜக வேட்பாளர் ராம சீனிவாசன் 2,20,914 வாக்குகளையும், அதிமுகவின் வேட்பாளர் சரவணன் 2,04,804 வாக்குகளையும் பெற்று 3வது இடத்திற்கு தள்ளப்பட்டுவிட்டார்.
கடந்த நாடாளுமன்றத் தேர்தலின்போது வாக்காளர்களின் கவனத்தை ஈர்த்த மக்கள் நீதி மய்யம் மதுரை தொகுதியில் 85,048 வாக்குகளும், நாம் தமிழர் கட்சி வேட்பாளர் 42,901 வாக்குகளும் பெற்றனர். ஆனால், இந்த முறை திமுக கூட்டணியில் மநீம எந்தவித தாக்கத்தையும் ஏற்படுத்தவில்லை. அதேசமயம், நாம் தமிழர் கட்சி 92,879 வாக்குகள் பெற்று வியப்பை ஏற்படுத்தி உள்ளது.
மேலும், கடந்த முறை 10,16,026 வாக்குகள் மதுரை நாடாளுமன்றத் தொகுதியில் பதிவாகியிருந்த நிலையில், இந்த முறை 9,86,969 வாக்குகளே பதிவாகியிருந்தது. புதிய வாக்காளர்கள் அதிகரித்தும்கூட பதிவான வாக்குகளின் விழுக்காடு 2024 நாடாளுமன்றத் தேர்தலில் குறைந்துள்ளது குறிப்பிடத்தகுந்தது.
இதையும் படிங்க: “அதிமுகவுடன் கூட்டணி வைத்திருந்தால்..” - அண்ணாமலை கூறுவது என்ன?
