திருச்சி : திருச்சி மாவட்டம், ஸ்ரீரங்கம் பகுதியைச் சேர்ந்தவர் தலை வெட்டி சந்துரு என்ற சந்திரமோகன். இவர் கடந்த 2020ம் ஆண்டு ஸ்ரீரங்கம் ரயில்வே பாலம் பகுதியில் வெட்டிப் படுகொலை செய்யப்பட்டார். இதுகுறித்து வழக்குப்பதிவு செய்த ஸ்ரீரங்கம் போலீசார், ரயில்வே குடியிருப்பைச் சேர்ந்த ரவுடி ஆட்டுக்குட்டி சுரேஷ் அவரது அண்ணன் சரவணன் உள்ளிட்டோரை கைது செய்தனர்.
பின்னர் ஜாமீனில் வெளியே வந்த ஆட்டுக்குட்டி சுரேஷ் தனது மனைவி ராகினியுடன் நேற்றிரவு நாவல்பட்டு பகுதியில் உள்ள கோயிலுக்குச் சென்று விட்டு வீடு திரும்பிக் கொண்டிருந்தார். அப்போது ஸ்ரீரங்கம் அம்பேத்கர் நகர் அருகே தேங்காய் குடோன் பகுதியில் பைக்குகளில் வந்த கும்பல் ஆட்டுக்குட்டி சுரேஷை வழி மறித்து அரிவாளால் சரமாரியாக தாக்கி உள்ளனர். இதனை தடுக்க முயன்ற அவரது மனைவிக்கும் அரிவாள் வெட்டு விழுந்துள்ளது. இதில், ஆட்டுக்குட்டி சுரேஷ் சம்பவ இடத்திலேயே உயிரிழந்தார்.
இது குறித்த தகவல் போலீசாருக்கு தெரிவிக்கப்பட்டது. இத்தகவலின் அடிப்படையில், திருச்சி மாநகர துணை கமிஷனர் செல்வகுமார், ஸ்ரீரங்கம் உதவி கமிஷனர் நிவேதா லட்சுமி மற்றும் போலீசார் சம்பவ இடத்திற்கு உடலைக் கைப்பற்றி பிரேத பரிசோதனைக்கு அரசு மருத்துவமனைக்கு அனுப்பி வைத்தனர்.
இதையும் படிங்க : கருணாநிதியே போயிட்டாரு; அப்புறம் எதுக்கு பேனா சிலை? ஆர்.எஸ்.பாரதி பேச்சுக்கு சிவி சண்முகம் பதிலடி!
மேலும், காயமடைந்த ராகினியை மீட்டு திருச்சி அரசு மருத்துவமனையில் சிகிச்சைக்காக அனுமதித்தனர். இந்த கொலை சம்பவம் தொடர்பாக போலீசார் வழக்குப்பதிவு செய்து விசாரணை மேற்கொண்டனர். இந்த கொலை சம்பவத்தில் தொடர்புடைய திருவானைக்காவல் சக்தி நகரைச் சேர்ந்த ஜம்பு என்ற ஜம்புகேஸ்வரன், ஸ்ரீரங்கம் அருகே வண்ணத்துப்பூச்சி பூங்கா பகுதியில் பதுங்கி இருப்பதாக போலீசாருக்கு தகவல் கிடைத்தது.
இன்ஸ்பெக்டர் ராஜகோபால் தலைமையிலான போலீசார் அங்கு சென்ற போது, ஒரு கும்பல் போலீசாரைக் கண்டதும் தப்பி ஓடியது. போலீசார் அவர்களை சுற்றி வளைத்து பிடிக்க முயன்ற போது, ஜம்புகேஸ்வரன் (36) போலீசாரை அரிவாளால் தாக்கி விட்டு தப்ப முயன்றார். அதனால் போலீசார் ஜம்புகேஸ்வரனின் இடது காலில் துப்பாக்கியால் சுட்டு பிடித்தனர்.
மேலும், இவருடன் ஸ்ரீரங்கம் கீழவாசல் பகுதியைச் சேர்ந்த நந்தகுமார் (28), விமல் ராஜ் (24) கீழவாசல் பகுதியைச் சேர்ந்த சூரிய பிரகாஷ் (31), பாலகிருஷ்ணன் (29) ஆகியோரை போலீசார் கைது செய்தனர். அவர்களிடமிருந்து ஐந்து அரிவாள்களையும் பறிமுதல் செய்தனர். தப்பியோடிய பிரசாத் என்ற வாலிபரை, போலீசார் தேடி வருகின்றனர்.
இதுகுறித்து திருச்சி மாநகர காவல் ஆணையர் காமினி கூறுகையில், " ஜம்புகேஸ்வரனை பிடிக்க முயன்ற போது போலீசாரை தாக்கி விட்டு தப்பிச் சென்றதால் தற்காப்புக்காக போலீசார் அவரை இடது காலில் சுட்டு பிடித்தனர்" என தெரிவித்தார்.
