விழுப்புரம்: விழுப்புரத்திலிருந்து புதுச்சேரி வரை தினமும் இயக்கப்படும் பயணிகள் மின்சார ரயில் இன்று காலை வழக்கம் போல் 6 மணிக்கு விழுப்புரம் ரயில் நிலையத்திலிருந்து புறப்பட்டது. 8 பெட்டிகள் கொண்ட இந்த மின்சார ரயில் விழுப்புரம் ரயில் நிலையத்தை கடந்து இடதுபுறமாக புதுச்சேரி மார்க்க ரயில் பாதையில் திரும்பிய போது எதிர்பாராத விதமாக 6-வது ரயில் பெட்டியின் சக்கரம் ரயில் பாதையிலிருந்து திடீரென இறங்கி தடம் புரண்டது.
லோகோ பைலட் இதனை கவனித்து விரைவாக ரயிலை நிறுத்தியதால் ஒரு பெரிய விபத்து தவிர்க்கப்பட்டது. மெதுவாக ரயில் சென்றதால் ரயில் பெட்டி தடம் இறங்கியதன் சப்தம் கேட்டதால் ஓட்டுநர் ரயிலை நிறுத்தினார். இதனால் 6-வது பெட்டி மற்றும் இடதுபுற சக்கரம் தடம் புரண்டு இறங்கியது.
சுமார் 3 மணி நேரப் போராடத்துக்குப் பின்னர் சீரமைக்கப்பட்டது. ரயிலில் இருந்த பயணிகள் அனைவரும் கீழே இறக்கி விடப்பட்டு வேறு வாகனங்களில் செல்ல அறிவுறுத்தப்பட்டனர். பெட்டி சாயவோ விபத்து ஏதும் ஏற்படவில்லை. அதிர்ஷ்டவசமாக பயணிகள் உயிர் தப்பினர். தகவலறிந்த விழுப்புரம் ரயில்வே ஊழியர்கள் விரைந்து வந்து, தடம் புரண்ட ரயிலை ரயில் பாதையிலிருந்து மீட்கும் பணியில் ஈடுபட்டனர்.
விசாரணை முடிந்த பின்னரே தடம் புரண்டதற்கான காரணம் தெரியவரும் என்று ரயில்வே அதிகாரி ஒருவர் தெரிவித்தார். ரயில் தடம் புரண்டதால் விழுப்புரம் பாதையில் காலை 8.30 மணி வரை ரயில் சேவைகள் பாதிக்கப்பட்டன.
