தேனி: தேனி மாவட்டம் போடி ராசிங்கபுரத்தைச் சேர்ந்த சேதுபதி என்ற நடராஜன் என்பவர் புதிய வீடு கட்டி வந்துள்ளார். அப்போது வீடு கட்ட போதிய பணம் இல்லாத நிலையில் என்ன செய்வதென்று தெரியாமல் சுற்றித் திரிந்த நடராஜன்,
கடந்த 2014ஆம் ஆண்டு அன்று நடராஜன் வசிக்கும் அதே பகுதியில் வீட்டில் தனியாக இருந்த சுருளிமல்லம்மாள் (வயது 85) என்ற மூதாட்டியை கீழே தள்ளிவிட்டு அவரின் முகத்தை தலையணையால் அழுத்தி மூச்சை நிறுத்தி கொலை செய்துள்ளார்.
மேலும் அவர் அணிந்திருந்த 3 சவரன் நகையை பறித்துச் சென்றுள்ளார். அதே ஆண்டு குப்பிநாயக்கன்பட்டி பகுதியில் வீட்டில் தனியாக இருந்த தங்கம்மாள் (வயது 77) என்ற மூதாட்டியையும் கொலை செய்துவிட்டு, அவர் அவர் அணிந்திருந்த கவரிங் நகைகளைக் கொள்ளையடித்துச் சென்றுள்ளார்.
இந்த இரண்டு மூதாட்டிகளின் இறப்பில் மர்மம் இருப்பதாக அவர்களது உறவினர்கள் கொடுத்த புகாரின் அடிப்படையில் போடி தாலுகா காவல் துறையினர் விசாரணை மேற்கொண்டனர். அப்போது போடி ராசிங்கபுரத்தைச் சேர்ந்த சேதுபதி என்ற நாகராஜன் கொலை செய்து நகைகளைப் பறித்துச் சென்றது தெரிய வந்தது.
இதைத்தொடர்ந்து கொலை வழக்கு பதிவு செய்யப்பட்டது. இந்த இரண்டு கொலை வழக்குகளும் தேனி மாவட்ட ஒருங்கிணைந்த நீதிமன்றத்தில் உள்ள மகிளா விரைவு நீதிமன்றத்தில் நடைபெற்று வந்தது. இந்த வழக்கு விசாரணை முடிவுற்று தடயங்கள் மற்றும் சாட்சிகளின் அடிப்படையில் நீதிபதி கோபிநாதன் தீர்ப்பு வழங்கினார்.
அதன்படி மூதாட்டிகள் இருவரை கொலை செய்த குற்றத்திற்காக ஆயுள் தண்டனையும் 1000 ரூபாய் அபராதமும் விதிக்கப்பட்டது. அதே போல் நகையை திருடிச் சென்ற குற்றத்திற்காக பத்தாண்டுகள் சிறை தண்டனை மற்றும் ஆயிரம் ரூபாய் அபராதம் விதிக்கப்பட்டது.
இரு பிரிவுகளில் தீர்ப்பு வழங்கியதோடு இந்த தீர்ப்பை ஏக காலத்திற்கு அனுபவிக்க வேண்டும் என மகிளா விரைவு நீதிமன்ற நீதிபதி கோபிநாதன் தீர்ப்பு வழங்கியுள்ளார். இதனைத் தொடர்ந்து குற்றவாளியை மதுரை மத்திய சிறையில் அடைக்க காவல்துறையினர் பாதுகாப்புடன் அழைத்துச் சென்றனர்.
இதையும் படிங்க: முதலமைச்சர் மாநில இளைஞர் விருது! விண்ணப்பிக்கும் முறை இதுதான்!
