நாகப்பட்டினம்: மயிலாடுதுறை மாவட்டத்தில் உள்ள நியாய விலைக் கடைகளில், குடும்ப அட்டைதாரர்களுக்கு வழங்கப்படும் பருப்பு வகைகள் இருப்பு இல்லாததால் பொதுமக்கள் அவதிக்குள்ளாகி வருகின்றனர்.
மயிலாடுதுறை மாவட்டத்தில் மயிலாடுதுறை, குத்தாலம், தரங்கம்பாடி, சீர்காழி ஆகிய நான்கு தாலுகாக்களிலும் முழு நேர நியாய விலைக் கடை, பகுதி நேர நியாய விலைக் கடை என மொத்தம் 432 நியாய விலைக் கடைகள் உள்ளன. இக்கடைகள் மூலம் ஒவ்வொரு மாதமும் 1ஆம் தேதி முதல் 10ஆம் தேதிக்குள் அனைத்து குடும்ப அட்டைதாரர்களுக்கும் பருப்பு, பாமாயில், சர்க்கரை, கோதுமை, அரிசி மற்றும் மண்ணெண்ணெய் ஆகிய பொருட்கள் விநியோகம் செய்யப்பட்டு வருகிறது. இந்த நிலையில், தற்போது மாவட்டத்தில் உள்ள பல்வேறு நியாய விலைக் கடைகளில் பருப்பு இருப்பு இல்லாததால் மக்கள் கடும் அவதிக்குள்ளாகி வருகின்றனர்.
இது குறித்து பொதுமக்கள் கூறுகையில், “பருப்பு இருப்பு இல்லை, அடுத்த வாரம் வந்துவிடும், அப்போது வந்து வாங்கிக் கொள்ளுங்கள் என கடை ஊழியர்கள் கூறுகின்றனர், கடந்த மாதமும் இதே போல் தான் கூறி அலைக்கழித்தார்கள். இதே போல் தான் மண்ணெண்ணெய் வழங்குவதிலும் காலதாமதம் ஏற்படுகிறது” என குற்றம் சாட்டுகின்றனர்.
இது குறித்து மாவட்ட வட்ட வழங்கல் அலுவலரை தொடர்பு கொண்டு கேட்டபோது, “தமிழ்நாடு நுகர்பொருள் வாணிபக் கழக முதுநிலை மண்டல மேலாளர் மூலம் மாவட்டத்திற்கு தேவையான பொருட்கள் கொள்முதல் செய்யப்பட்டு அனைத்து நியாய விலைக்கடைகளிலும் இருப்பு வைக்கப்பட்டு, விநியோகம் செய்யப்படும்.
ஆனால் தற்போது தேர்தல் நடத்தை விதிமுறை அமலில் உள்ளதால், வாகனங்களில் பொருட்கள் ஏற்றி வருவதற்கு காலதாமதம் ஆகிறது. பருப்பு, பாமாயில் உள்ளிட்ட பொருட்களுக்கு ஆறு மாதத்திற்கு ஒரு முறை டெண்டர் விடப்படுகிறது, இந்த முறை காலதாமதம் ஏற்பட்டுள்ளது. எனவே, ஓரிரு நாட்களில் பொருட்கள் வந்துவிடும், அதன் பின்னர் அனைத்து குடும்ப அட்டைதாரர்களுக்கும் பொருட்கள் விநியோகம் செய்யப்படும்” என விளக்கமளித்தார்.
