வத்தலக்குண்டு: திண்டுக்கல் மாவட்டம் வத்தலக்குண்டு அருகே எம்.வாடிப்பட்டி சமுத்திரம் கண்மாய் பகுதியில் மாற்றுத் திறனாளி ஐயப்ப பக்தர் ஒருவர் மூன்று சக்கர வாகனத்துடன் சேற்றில் சிக்கி தவித்துக் கொண்டிருப்பதாக காவல் கட்டுப்பாட்டுறைக்கு கிடைத்த தகவலின் அடிப்படையில் அங்கு சென்ற வத்தலக்குண்டு மற்றும் பட்டிவீரன்பட்டி போலீசார் மூன்று சக்கர வாகனத்துடன் சேற்றில் சிக்கி தவித்துக் கொண்டிருந்த ஐயப்ப பக்தரை பத்திரமாக மீட்டனர்
குறுக்குப் பாதையில் செல்ல கூகுள் மேப் உதவிய நாடினார்: இதுதொடர்பாக ஈடிவி பாரத்திடம் பேசிய வத்தலகுண்டு போலீசார், " மாவட்ட எஸ்.பி. அலுவலகத்திலிருந்து ஞாயிற்றுக்கிழமை நள்ளிரவில் தங்களுக்கு ஒரு அழைப்பு வந்ததாகவும், கர்நாடக நபர் மழையில் சிக்கிக் கொண்டிருப்பதால் அவரை சென்று காப்பாற்றும் படி கேட்டுக் கொள்ளப்பட்டதாகவும்" கூறினர்.
இதனையடுத்து மாவட்ட எஸ்.பி. அலுவலகம் அளித்த மொபைல் எண் இருக்கும் இடத்தை டவர் மூலம் கண்டறிந்து, அங்கு சென்றுள்ளனர். பின்னர் அவரையும் தொலைபேசி மூலம் தொடர்பு கொண்ட போது கன்னடத்தில் பேசியுள்ளார். ஒருவழியாக அவர் பேசியதைப் புரிந்து கொண்டு சென்ற போது, கடும் மழைக்கு நடுவே மாற்றுத் திறனாளிகளுக்காக வடிவமைக்கப்பட்ட இருசக்கர வாகனத்தில் தவித்துக் கொண்டிருந்ததாக போலீசார் கூறினர்.
விசாரணையில் அவர் கர்நாடக மாநிலம் மங்களூர் பகுதியைச் சேர்ந்த பரசுராமர் என்ற மாற்றுத்திறனாளி ஐயப்ப பக்தர் என்றும் தனது வாகனத்தில் சபரிமலை சென்று விட்டு மீண்டும் ஊர் திரும்பி கொண்டிருந்ததாகவும், விரைவாக ஊருக்கு செல்வதற்காக கூகுள் மேப்பைப் பார்த்து குறுக்குப்பாதையில் திரும்பியதால் சிக்கிக் கொண்தாகவும் கூறியுள்ளார்.
ஞாயிற்றுக் கிழமை இரவு 7 மணிக்கு வத்தலக்குண்டுவை அடுத்துள்ள எம்.வாடிப்பட்டி பகுதிக்குள் சென்றவர் தேசிய நெடுஞ்சாலையை தொடும் சாலையை தவற விட்டுவிட்டு சமுத்திரம் கண்மாய்க்கு செல்லும் சாலையில் சென்றுள்ளார். அங்குள்ள பாலத்தைக் கடந்தவர் எதிர்பாராத விதமாக கண்மாய் பகுதியில் இருந்த சேற்றில் வசமாக சிக்கி உள்ளார். இரவு நேரம் என்பதாலும் அப்பகுதியில் தொடர்ந்து மழை பெய்து கொண்டிருந்ததாலும் உதவிக்கு யாரும் வரவில்லை .
திண்டுக்கல் கட்டுப்பாட்டு அறைக்கு தகவல் சொன்ன கர்நாடகா போலீசார்: இதனைத் தொடர்ந்து சுமார் 7மணி நேரம் சேற்றில் சிக்கி தவித்துக் கொண்டிருந்த பரசுராமர் தமது உறவினர்கள் மூலம் கர்நாடக காவல்துறைக்கு தகவல் கொடுத்துள்ளார். கர்நாடகாவில் இருந்து திண்டுக்கல் காவல்துறை கட்டுப்பாட்டறைக்கு தகவல் கொடுக்கப்பட்டது. இதையடுத்து போலீசார் நள்ளிரவு 2 மணிக்கு ஐயப்ப பக்தரை பத்திரமாக மீட்டு உள்ளனர்
மீட்கப்பட்ட ஐயப்ப பக்தரை பாதுகாப்பான இடத்தில் தங்க வைத்த போலீசார் அவருக்கு உணவு வழங்கினர் மறுநாள் காலை சேற்றில் சிக்கிய மூன்று சக்கர வாகனத்தை மீட்ட போலீசார் ஐயப்ப பக்தரை சொந்த ஊருக்கு பத்திரமாக ஊருக்கு அனுப்பி வைத்தனர் . இதனிடையே விரைந்து செயல்பட்ட தமிழ்நாடு போலீசாருக்கு கர்நாடகா போலீசார் பாராட்டுகளையும் நன்றியும் தெரிவித்தனர்
பத்திரமாக மீட்பு: இது குறித்து வத்தலகுண்டு போலீசாரிடம் கேட்டபோது: "ஐயப்பன் கோவிலுக்கு சென்று விட்டு வத்தலக்குண்டு வழியே கர்நாடகா நோக்கி சென்ற ஐயப்ப பக்தர் வத்தலகுண்டு பகுதியில் கூகுள் மேப்பை பார்த்து குறுக்கு வழியில் செல்வதற்காக முயற்சி செய்துபோது சகதியில் சிக்கி உள்ளார். இது குறித்து அந்த மாற்றுத்திறனாளி ஐய்யப்ப பகதர் கர்நாடகாவில் உள்ள பெங்களூர் போலீசாருக்கு கைபேசி மூலம் தகவல் தெரிவித்துள்ளார்.
இதைத் தொடர்ந்து திண்டுக்கல் காவல் கட்டுப்பாட்டு அறைக்கு தகவல் தெரிவிக்கப்பட்டு திண்டுக்கலில் இருந்து வாக்கி டாக்கி வழியாக எங்களுக்கு அலர்ட் செய்யப்பட்டது. இரவு நேரத்தில் ரோந்து பணியில் இருந்ததால் உடனடியாக அந்த இடத்திற்கு விரைந்து சென்றோம். உடனடியாக அவரை மீட்டு வத்தலகுண்டு காவல் நிலையத்திற்கு அழைத்து வந்தோம். பிறகு காலையில் சென்று அவரது மூன்று சக்கர வாகனத்தையும் எடுத்து வந்து அவரிடம் கொடுத்து அனுப்பி அவரது ஊருக்கு அனுப்பி வைத்தோம்,"என்றனர்.
முன்னுதாரணமாய் திகழும் பரசுராமர்: குழந்தைப் பருவம் முதல் மாற்றுத்திறனாளியாக இருக்கும் பரசுராமர், ஆரம்பத்தில் சில காலம் வறுமையின் காரணமாக பிச்சை எடுத்து வந்தார். அது அவருக்கு மிகுந்த மனவேதனையை அளித்து வந்த நிலையில், தமது குடும்பத்தை வறுமையில் இருந்து மீட்க வேண்டும் என்றும் அவர் முடிவெடுத்தார்.
இதையடுத்து, பிச்சை எடுப்பதை கைவிட்ட பரசுராமர், பகல் வேளையில் உணவு விநியோகம் செய்யும் பிரபல தனியார் நிறுவனத்திலும், இரவில் பாதுகாவலர் பணியையும் மேற்கொண்டு வருகிறார். தமது கடும் உழைப்பின் மூலம் வாழ்வில் முன்னேறிவரும் பரசுராமர் பிறருக்கு முன்னுதாரணமாக திகழ்வதாக சமூக வலைதளங்களில் பாராட்டுகள் குவிந்த வண்ணம் உள்ளன.
இவர் பணிபுரியும் நிறுவனத்தின் மேலாளர் தேஜா ஈடிவி பாரத்திடம் கூறும்போது, " பரசுராமரை எண்ணி நான் மிகவும் பெருமைப்படுகிறேன். மிகவும் உற்சாகமாக பணிபுரியும் இவர் இன்றைய இளைஞர்களுக்கு முன்னுதாரணமாக திகழ்கிறார். ஒன்பதாம் வகுப்பு வரை படித்துள்ள பரசுராமர் எப்போதும் தமது குடும்பத்தின் முன்னேற்றத்தையே ஒற்றை நோக்கமாய் கொண்டு சுழன்று வருகிறார்" என்று தேஜா தெரிவித்தார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
